༄༅། །འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་ཁོར་ཡུག་ཚོགས་ཆེན་ཐེངས་ ༢༦ (COP26) དེ་བཞིན་སི་ཀོ་ཊི་ལེན་ཌིའི་ས་གནས་གྷི་ལཱ་སི་གོ་གྲོང་ཁྱེར་དུ་འཚོགས་བཞིན་པ་དང་བསྟུན། བོད་མིའི་སྒྲིག་འཛུགས་ཀྱི་བོད་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་བདེ་ཆེན་དཔལ་མོ་ལགས་དང་། རྒྱལ་སྤྱིའི་བོད་དོན་འབྲེལ་མཐུད་ཁང་གི་ཨེ་ཤི་ཡའི་ས་གནས་འབྲེལ་མཐུད་པ་དང་ཁོར་ཡུག་ཉམས་ཞིབ་པ་འབུམ་རམས་པ་བློ་བཟང་དབྱངས་མཚོ་ལགས། རྒྱལ་སྤྱིའི་བོད་དོན་ལས་འགུལ་ཁང་གི་ཉམས་ཞིབ་པ་པདྨ་བསྟན་འཛིན་ལགས། བོད་རང་བཙན་སློབ་ཕྲུག་ཚོགས་པའི་ལས་འགུལ་འགན་འཛིན་པདྨ་སྒྲོལ་མ་ལགས། བོད་གནས་ལྟ་ཞིབ་ཁང་གི་ཉམས་ཞིབ་པ་རྒན་པ་བསྟན་འཛིན་ཆོས་སྐྱིད་ལགས་བཅས་ས་གནས་སུ་ཆེད་ཕེབས་ཀྱིས་འཛམ་གླིང་གི་རྒྱལ་ཁབ་ཁག་གི་དབུ་ཁྲིད་རྣམ་པར་མཉམ་འབྲེལ་རྒྱལ་ཚོགས་ཀྱི་གོ་ལའི་ཁོར་ཡུག་ཚོགས་ཆེན་ཐེངས་ ༢༦ པའི་ཐོག་བོད་མཐོ་སྒང་གི་ཁོར་ཡུག་གི་གལ་གནད་སྐོར་གྲོས་བསྡུར་གནང་དགོས་པའི་འབོད་སྐུལ་གྱི་ལས་འགུལ་སྤེལ་བཞིན་ཡོད།

དེ་ཡང་བོད་མིའི་སྐུ་ཚབ་ཐུན་མོང་གིས་བཱངྒ་ལ་དེཤ་དང་ལྷོ་ཨ་ཕི་རི་ཀའི་སྐུ་ཚབ་རྣམ་པ། དེ་བཞིན་སི་ཀོ་ཊི་ལེན་ཌིའི་སྲིད་བློན་ནི་ཀོ་ལ་ (Nicola Sturgeon) མཆོག་དང་། ཨ་རིའི་སྲིད་འཛིན་གཞོན་པ་ཟུར་པ་ཨེ་ལི་བྷར་ཊི་ཨར་ནོལ་ཌི་ (Albert Arnold Gore Jr) མཆོག ཨ་རིའི་ཧོ་ལི་ཝོ་ཌིའི་གློག་བརྙན་འཁྲབ་སྟོན་པ་གྲགས་ཅན་ལེའོ་ནར་ཌོ་ཌི་ཁེབ་རིའོ་(Leonardo DiCaprio) ལགས། ཨ་རིའི་སྲིད་འཛིན་མཆོག་གི་སྐུ་ཚབ་ཇོན་ཀེ་རེ་ (John Kerry) མཆོག་བཅས་ལ་བོད་ཀྱི་ཁོར་ཡུག་གི་གལ་གནད་སྐོར་གླེང་སློང་གནང་ཡོད་པ་མ་ཟད། རྒྱལ་ཁབ་གཞན་གྱི་སྐུ་ཚབ་དང་གནད་ཡོད་མི་སྣ་ཁག་གཅིག་ལའང་བོད་མཐོ་སྒང་གི་ཁོར་ཡུག་སྲུང་སྐྱོབ་དང་གོ་རྟོགས་སྐོར་དོན་ཚན་ལྔ་འཁོད་པའི་འགྲེམས་ཤོག་འགྲེམས་སྤེལ་གནང་ཐུབ་ཡོད།འདི་ལོའི་མཉམ་འབྲེལ་རྒྱལ་ཚོགས་ཀྱི་གོ་ལའི་ཁོར་ཡུག་ཚོགས་ཆེན་ཐེངས་ ༢༦ པའི་ཐོག་རྒྱ་ནག་གི་སྲིད་འཛིན་ཞི་ཅིན་ཕིང་གིས་ཁོང་མཉམ་ཞུགས་བྱ་རྒྱུ་མིན་པའི་གསལ་བསྒྲགས་སྤེལ་ཡོད། བོད་ཀྱི་སྐུ་ཚབ་རྣམ་པས་མཐུན་ཕྱོགས་རྒྱལ་ཁབ་ཁག་གི་སྐུ་ཚབ་རྣམ་པ་ཚོ་དང་ལྷན་དུ་ཉིན་ཤས་རིང་མུ་མཐུད་བོད་མཐོ་སྒང་གི་ཁོར་ཡུག་གི་གལ་གནད་སྐོར་ཞུ་གཏུག་གི་ལས་འགུལ་སྤེལ་རྒྱུ་ཡིན་པ་མ་ཟད། འཛམ་གླིང་གི་ཁོར་ཡུག་ལས་འགུལ་བ་དང་གཞུང་ཁོངས་མིན་པའི་ཚོགས་པ་སོགས་དང་ལྷན་མཐུན་གྲོགས་བཟོ་རྒྱུ་དང་། དེ་བཞིན་ཨིན་ཡུལ་གྱི་མཐོ་སློབ་གྲགས་ཅན་ཁག་ཏུ་བོད་ཀྱི་ཁོར་ཡུག་གི་གལ་གནད་སྐོར་བགྲོ་གླེང་གནང་རྒྱུ་ཡིན་པ་བཅས།།