༄༅། །ཕྱི་ལོ་༢༠༢༡ཟླ་༡༡ ཚེས་༡༧ ཉིན་བོད་ཀྱི་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ཕ་རཱན་སིའི་རྒྱལ་ས་པེ་རི་སིའི་མེ་འཁོར་འབབ་ཚུགས་གྷར་ཌུ་ནོར་ཌི་(Gare du Nord)ལ་ཕེབས་འབྱོར་བྱུང་སྐབས་ས་གནས་བོད་རིགས་ཚོགས་པ་དང་། བོད་རང་བཙན་སློབ་ཕྲུག་ཚོགས་པ། དེ་བཞིན་བོད་མིའི་ཚོགས་པ་སྐྱིད་སྡུག་ཁག་གིས་ཕེབས་བསུའི་སྣེ་ལེན་གཟབ་རྒྱས་ཞུས་གནང་ཡོད། 

དེ་ཡང་ཕ་རཱན་སིའི་བོད་རང་བཙན་སློབ་ཕྲུག་ཚོགས་པས་ཕྱི་ལོ་༢༠༢༡ཟླ་༡༡ཚེས་༡༨ནས་༢༣བར་དོན་གྲུབ་དབང་ཆེན་ལགས་ཀྱི་པེ་རི་སི་སྐོར་སྐྱོད་གོ་སྒྲིག་གནང་གི་ཡོད་པ་དང་། ལས་རིམ་ནང་འཁོར་པ་ལྟར་ན། དོན་གྲུབ་དབང་ཆེན་ལགས་ཀྱིས་གསར་འགོད་པ་དང་། ཆབ་སྲིད་པ། དེ་བཞིན་གང་ཟག་སྒེར་སོགས་ལ་ཐུག་འཕྲད་ཀྱིས་ཕྱི་ལོ་༢༠༠༨ ལོའི་པེ་ཅིང་ཨོ་རྩེད་འགྲན་ཚོགས་རྒྱ་ནག་ནང་ཚོགས་རྗེས་ཁོང་གིས་རྒྱ་ནག་གི་བཙོན་ཁང་ནང་གནར་སྤྱོད་མྱངས་པའི་ཉམས་མྱོང་དང་། དེ་བཞིན་བོད་ནང་གི་བོད་མི་ཚོས་དཀའ་སྡུག་མྱངས་པའི་སྐོར་ངོ་སྤྲོད་གནང་རྒྱུ་ཡིན་ཞིང་། དོན་གྲུབ་དབང་ཆེན་ལགས་ཀྱིས་རྒྱ་ནག་ནག་གི་བཙོན་ཁང་ནང་དཀའ་སྡུག་མྱངས་པའི་སྐོར་ངོ་སྤྲོད་གནང་བ་བརྒྱུད་ཕྱི་ལོ་༢༠༢༢ ལོའི་པེ་ཅིང་ཨོ་རྩེད་འགྲན་ཚོགས་སྐབས་བོད་ཀྱི་གནད་དོན་དེ་མདུན་དུ་བསླེབ་ཐུབ་རེ་བ་གནང་གི་ཡོད།

སྤྱིར་རྒྱ་ནག་གཞུང་གིས་རྒྱལ་སྤྱིའི་ཨོ་རྩེད་འགྲན་ཚོགས་ཀྱི་རྩ་འཛིན་བཞིན་འགྲོ་བ་མིའི་ཐོབ་ཐང་ཡར་རྒྱས་གཏང་རྒྱུའི་ཁས་ལེན་ཞུས་ཐོག་ཕྱི་ལོ་༢༠༠༨ལོའི་ཨོ་རྩེད་འགྲན་ཚོགས་གོ་སྒྲིག་ཞུ་རྒྱུའི་གོ་སྐབས་ཐོབ་ཡོད་ཀྱང་། རྒྱ་ནག་གཞུང་གིས་ཁས་ལེན་དེ་དག་མ་སྒྲུབ་པ་མ་ཟད། དེ་ལས་ལྡོག་སྟེ་བོད་ནང་གི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བཏང་སྟབས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་མུ་མཐུད་ཇེ་སྡུག་ཇེ་ཞན་དུ་འགྲོ་བཞིན་ཡོད། ཕྱི་ལོ་༢༠༢༡ཟླ་༡༡ཚེས་༢༠ཉིན་དོན་གྲུབ་དབང་ཆེན་ལགས་པེ་རི་སིར་བོད་ཀྱི་ཚོགས་པ་ཁག་ལྔས་གོ་སྒྲིག་ཞུས་པའི་ཕྱི་ལོ་༢༠༢༢ལོའི་པེ་ཅིང་ཨོ་རྩེད་འགྲན་ཚོགས་ལ་ངོ་རྒོལ་གྱི་ལས་རིམ་ནང་མཉམ་ཞུགས་གནང་རྒྱུ་ཡིན་པ་མ་ཟད། བོད་མི་རྣམས་ལ་རང་ཉིད་ཀྱི་གློག་བརྙན་འཇིགས་བྲལ་ ཞེས་པ་གཟིགས་འབུལ་ཞུ་རྒྱུ་དང་འབྲེལ། གློག་བརྙན་དེ་བཟོ་སྐབས་ཀྱི་ཉམས་མྱོང་དང་དཀའ་སྡུག་ཇི་བྱུང་སོགས་ཀྱི་སྐོར་གཏམ་བཤད་གནང་རྒྱུ་རེད་འདུག  གཞན་ཡང་ཁོང་གིས་སྐོར་སྐྱོད་སྐབས་གང་ཟག་སྒེར་དང་། གསར་འགོད་པ། ཆབ་སྲིད་མི་སྣ་སོགས་ཀྱི་གསུང་བཤད་རྣམས་བརྙན་ལེན་གྱིས་དེ་དག་ཕྱིས་སུ་སྐོར་བསྐྱོད་མཇུག་སྒྲིལ་མཚམས་རྒྱལ་སྤྱིའི་ཨོ་ལེམ་ཕིག་རྩེད་འགྲན་ཚོགས་ཆུང་ (International Olympic Committee) ལ་དབུལ་རྒྱུ་རེད་འདུག་བཅས།།