༄༅། །ཕྱི་ལོ་ ༢༠༢༡ ཟླ་ ༡༡ ཚེས་ ༦ ཉིན་ལྕམ་སྐུ་ཨ་ཌ་ལེ་སི་(Adalys)ལགས་དང་ལྕམ་སྐུ་ཀ་རི་ན་(Karina)ལགས་གཉིས་ཀྱི་གོ་སྒྲིག་འོག་བེལ་ཇི་ཡམ་གྱི་གྲོང་ཁྱེར་ཨན་ཌི་ཝབ་ (Antwerp) ནང་ལ་ཊིན་ཨ་མི་རི་ཀའི་ (Latin America) ཞལ་ལག་དང་རིག་གཞུང་དུས་སྟོན་སྲུང་བརྩི་ཞུས་ཡོད་པ་དང་། སྐབས་དེར་བེལ་ཇི་ཡམ་གྱི་བོད་རིགས་ཚོགས་པ་ལ་ཊིན་ཨ་མི་རི་ཀའི་ཞལ་ལག་དང་རིག་གཞུང་དུས་སྟོན་ཐོག་མཉམ་ཞུགས་ཀྱིས་བོད་ཀྱི་ཞལ་ལག་དང་རིག་གཞུང་སྒྲིག་གཤོམ་ཞུས་ཐུབ་ཡོད།

དེ་ཡང་གོང་ཚེས་ཉིན་གྱི་དགོང་དྲོ་དམིགས་བསལ་སྐུ་མགྲོན་བེལ་ཇི་ཡམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཞལ་ལག་དང་རིག་གཞུང་དུས་སྟོན་ཐོག་མཉམ་ཞུགས་ཀྱིས་བོད་མི་ལ་ཊིན་ཨ་མི་རི་ཀའི་ཞལ་ལག་དང་རིག་གཞུང་དུས་སྟོན་ཐོག་མཉམ་ཞུགས་གནང་ཐུབ་པ་དེ་ནི་ཧ་ཅང་གལ་ཆེན་པོ་ཆགས་ཡོད་པའི་སྐོར་དང་། བོད་ནི་དབང་བསྒྱུར་བྱས་པའི་རྒྱལ་ཁབ་ཅིག་ཡིན་ཞིང་། བོད་ནང་ཆོས་དད་དང་། རིག་གཞུང་། སྐད་ཡིག་སོགས་ཀྱི་རང་དབང་མེད་སྟབས། བཙན་བྱོལ་དུ་ཡོད་པའི་བོད་མི་རྣམས་ཀྱིས་རང་གི་ཐུན་མོང་མིན་པའི་ཞལ་ལག་དང་རིག་གཞུང་མི་ཉམས་རྒྱུན་འཛིན་དང་ཉམས་པ་སླར་གསོ་གནང་རྒྱུ་ཧ་ཅང་གལ་ཆེན་པོ་ཡིན་སྐོར་སོགས་གསུངས།དེ་རྗེས་བེལ་ཇི་ཡམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ཞལ་ལག་དང་རིག་གཞུང་དུས་སྟོན་གོ་སྒྲིག་གནང་མཁན་ལྕམ་སྐུ་ཨ་ཌ་ལེ་སི་(Adalys)ལགས་དང་ལྕམ་སྐུ་ཀ་རི་ན་(Karina)ལགས་གཉིས་ལ་ཐུགས་ཆེ་ཞུའི་མཚོན་ཆེད་དུ་ཁ་བཏགས་རེ་གནང་རྗེས་བོད་པའི་གཞོན་སྐྱེས་ཁག་གཅིག་དང་ཐུག་འཕྲད་གནང་སྟེ་ཉེ་ཆར་སུད་སིར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དབུ་འབྱེད་གནང་བའི་དང་བླངས་བོད་དོན་ཞུ་གཏུག་ལས་འགུལ་གྱི་ལས་གཞི་སྐོར་ངོ་སྤྲོད་དང་། དང་བླངས་བོད་དོན་ཞུ་གཏུག་ལས་འགུལ་གྱི་ལས་གཞི་དེ་བཞིན་བེལ་ཇི་ཡམ་གྱི་གྲོང་ཁྱེར་ཨན་ཌི་ཝབ་ (Antwerp) ནང་དུའང་དབུ་འབྱེད་གནང་གཏན་འཁེལ་ཡོད་པས་བོད་པའི་གཞོན་སྐྱེས་རྣམས་དབུ་འབྱེད་མཛད་སྒོར་མཉམ་ཞུགས་གནང་དགོས་པའི་རེ་སྐུལ་གནང་ཡོད་པ་བཅས།།