༄༅། །ཕྱི་ལོ་ ༢༠༢༡ ཟླ་ ༡༡ ཚེས་ ༡༠ རེས་གཟའ་ལྷག་པ་ཉིན་གྱི་སྔ་དྲོ་རྡ་ས་གངས་སྐྱིད་སྲིད་སྐྱོང་ཚོགས་ཁང་དུ་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་གི་མདུན་དུ་བཀའ་ཤག་སྐབས་བཅུ་དྲུག་པའི་བཀའ་བློན་རྒྱ་རི་སྒྲོལ་མ་མཆོག་གིས་ལས་ཁུར་དང་གསང་རྒྱའི་དམ་བཅའ་ཕུལ་རྗེས་ཉིན་རྒྱབ་བོད་མིའི་སྒྲིག་འཛུགས་བདེ་སྲུང་ལས་ཁུངས་ཀྱི་བཀའ་བློན་གྱི་ཐུགས་འགན་དངོས་སུ་བཞེས་གནང་ཡོད།
དེ་ཡང་གོང་ཚེས་ཉིན་གྱི་ཉིན་རྒྱབ་བདེ་སྲུང་ལས་ཁུངས་ཀྱི་དྲུང་ཆེ་ཀརྨ་རིན་ཆེན་ལགས་ཀྱིས་གཙོས་བདེ་སྲུང་ལས་ཁུངས་ཀྱི་ལས་བྱེད་ཡོངས་ནས་བཀའ་བློན་རྒྱ་རི་སྒྲོལ་མ་མཆོག་བདེ་སྲུང་ལས་ཁུངས་སུ་ཕེབས་བསུའི་སྣེ་ལེན་གཟབ་རྒྱས་ཞུས་ཡོད། དེ་རྗེས་བཀའ་བློན་མཆོག་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་ཕུལ་བ་དང་བསྟུན་བཀའ་བློན་ལས་ཁུངས་སུ་ཕེབས་ཡོད་པ་དང་། སྐབས་དེར་བདེ་སྲུང་ལས་ཁུངས་ཀྱི་ལས་བྱེད་རྣམ་པས་བཀའ་བློན་མཆོག་ལ་འཚམས་འདྲིའི་ཁ་བཏགས་ཕུལ་གྲུབ་མཚམས་བདེ་སྲུང་ལས་ཁུངས་ཀྱི་དྲུང་ཆེ་ཀརྨ་རིན་ཆེན་ལགས་ཀྱིས་བཀའ་བློན་མཆོག་ལ་བདེ་སྲུང་ལས་ཁུངས་ཀྱི་ལས་བྱེད་རྣམ་པ་དང་ལས་བྱེད་རྣམ་པའི་ལས་འགན་སོགས་ཀྱི་སྐོར་ངོ་སྤྲོད་གནང་ཡོད་པ་བཅས།།
