༄༅། །ཕྱི་ལོ་ ༢༠༢༡ ཟླ་ ༡༡ ཚེས་ ༧ ཉིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་འགྲོ་བ་མིའི་ཐོབ་ཐང་ཚན་པའི་འགན་འཛིན་འབྲུག་བསྟན་སྐྱིད་ལགས་བེལ་ཇི་ཡམ་གྱི་གྲོང་ཁྱེར་ཨན་ཌི་ཝབ་ (Antwerp) ནང་ཕེབས་འབྱོར་གྱིས་ས་གནས་བོད་པའི་གཞོན་སྐྱེས་ཁག་གཅིག་དང་ལྷན་དུ་ཚོགས་འདུ་ཚོགས་ཏེ་ཉེ་ཆར་དཔལ་ལྡན་སྲིད་སྐྱོང་མཆོག་གིས་སུད་སིའི་ནང་དང་བླངས་བོད་དོན་ཞུ་གཏུག་ལས་འགུལ་གྱི་ལས་གཞི་དབུ་འབྱེད་གནང་བའི་སྐོར་ངོ་སྤྲོད་གསུང་བཤད་གནང་ཡོད་པ་དང་། བེལ་ཇི་ཡམ་བོད་རིགས་ཚོགས་པས་ཚོགས་འདུ་གོ་སྒྲིག་གནང་ཡོད། 

དེ་ཡང་བེལ་ཇི་ཡམ་སྐུ་ཚབ་དོན་གཅོད་ཁང་གི་ལས་བྱེད་རིག་འཛིན་ལགས་ཀྱིས་དང་བླངས་བོད་དོན་ཞུ་གཏུག་ལས་འགུལ་གྱི་ལས་གཞིའི་དགོས་པ་དམིགས་ཡུལ་དང་། བོད་དོན་ཞུ་གཏུག་སླད་དུ་ཕྱག་ལས་གནང་འདོད་ཡོད་མཁན་བོད་མི་རྣམས་ལ་མཚོན་ན་ལས་གཞི་དེ་ནི་གོ་སྐབས་ཧ་ཅང་རྩ་ཆེན་པོ་ཡིན་ཞིང་། བོད་མི་སྤྱི་དང་ལྷག་པར་བོད་པའི་མི་རབས་གསར་པའི་གཞོན་སྐྱེས་ཚོ་དང་བླངས་བོད་དོན་ཞུ་གཏུག་ལས་འགུལ་གྱི་ལས་གཞིའི་ནང་མཉམ་ཞུགས་གནང་དགོས་པའི་འབོད་སྐུལ་གནང་ཡོད།དེ་རྗེས་ཕྱི་དྲིལ་ལས་ཁུངས་ཀྱི་འགྲོ་བ་མིའི་ཐོབ་ཐང་ཚན་པའི་འགན་འཛིན་འབྲུག་བསྟན་སྐྱིད་ལགས་ཀྱིས་བོད་པའི་གཞོན་སྐྱེས་རྣམས་གང་མང་དང་བླངས་བོད་དོན་ཞུ་གཏུག་ལས་འགུལ་གྱི་ལས་གཞིའི་ནང་མཉམ་ཞུགས་གནང་དགོས་པའི་གལ་གནད་དང་། བོད་པའི་གཞོན་སྐྱེས་རྣམས་ཀྱིས་བོད་དོན་ཞུ་གཏུག་ལས་འགུལ་གྱི་ཆེད་དུ་འགན་འཁུར་མང་ཙམ་གནང་དགོས་པ་སོགས་ཀྱི་སྐོར་གསུངས།  ཕྱི་ཚེས་༨ ཉིན་འབྲུག་བསྟན་སྐྱིད་ལགས་དང་རིག་འཛིན་ལགས་རྣམ་གཉིས་ནི་དར་ལེནྜའི་རྒྱལ་ས་ཨམ་སི་ཊར་ཌམ (Amsterdam) དུ་ཆེད་ཕེབས་ཀྱིས་ས་གནས་ཀྱི་བོད་པའི་གཞོན་སྐྱེས་ཁག་གཅིག་དང་ལྷན་དུ་ཚོགས་འདུ་ཚོགས་ཏེ་དང་བླངས་བོད་དོན་ཞུ་གཏུག་ལས་འགུལ་གྱི་ལས་གཞིའི་སྐོར་ངོ་སྤྲོད་དང་། ས་གནས་ཀྱི་བོད་མི་སྤྱི་དང་ལྷག་པར་གཞོན་སྐྱེས་རྣམས་ལས་གཞི་དེའི་ནང་མཉམ་ཞུགས་གནང་དགོས་པའི་གལ་གནད་སོགས་ཀྱི་སྐོར་གསུངས། ཚོགས་འདུ་དེ་བཞིན་ས་གནས་བོད་རིགས་ཚོགས་པས་གོ་སྒྲིག་གནང་ཡོད་པ་བཅས།།