༄༅། །ཕྱི་ལོ་ ༢༠༢༡ ཟླ་ ༡༡ ཚེས་ ༡༣ ཉིན་གྱི་དགོང་དྲོ་བོད་མིའི་སྒྲིག་འཛུགས་བཀའ་དྲུང་ཡིག་ཚང་གི་གོ་སྒྲིག་འོག་དཔལ་ལྡན་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་ཕེབས་སྐྱེལ་དང་། བཀའ་ཤག་སྐབས་བཅུ་དྲུག་པའི་བཀའ་བློན་རྣམ་པ་ཕེབས་བསུ། དེ་བཞིན་རྒྱ་བལ་འབྲུག་གསུམ་གྱི་ས་གནས་འགོ་འཛིན་རྣམ་པ་དང་མཉམ་འབྲེལ་ཚོགས་པ་ཁག་གི་འགན་འཛིན་རྣམ་པ་ཕེབས་སྐྱེལ་བཅས་ཀྱི་སླད་དུ་བཞུགས་སྒར་རྡ་ས་བོད་ཀྱི་ཟློས་གར་ཚོགས་ཁང་དུ་གསོལ་སྟོན་དང་བོད་ཀྱི་ཐུན་མོང་མིན་པའི་གཞས་སྣ་འཁྲབ་སྟོན་གྱི་མཛད་སྒོ་ཚོགས་ཡོད་པ་དང་།
མཛད་སྒོར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། དཔལ་ལྡན་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དཔལ་ལྡན་ཚོགས་གཞོན་སྒྲོལ་མ་ཚེ་རིང་མཆོག ཁྲིམས་ཞིབ་པ་གཞན་ཀརྨ་དགྲ་འདུལ་མཆོག ཁྲིམས་ཞིབ་པ་གཞན་བསྟན་འཛིན་ལུང་རྟོགས་མཆོག ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག དབུས་འོས་བསྡུ་ལས་ཁང་གི་འགན་འཛིན་དང་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་གཅིག་ལྕོགས་དཔེ་ཟུར་དབང་འདུས་ཚེ་རིང་ལགས།སྤྱི་ཁྱབ་རྩིས་ཞིབ་ལས་ཁང་གི་སྤྱི་ཁྱབ་འགན་འཛིན་ཨརྱ་པདྨ་དགྲ་འདུལ་ལགས། བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས། ནང་སྲིད་དྲུང་ཆེ་ཤོ་ཟུར་ཚེ་དབང་སྒྲོལ་མ་ལགས་སོགས་ཕེབས་ཡོད།
དེ་ཡང་མཛད་སྒོའི་ཐོག་མར་དཔལ་ལྡན་རྒྱུད་སྨད་གྲྭ་ཚང་གི་དགེ་འདུན་པ་བརྒྱད་ནས་བཀྲ་ཤིས་སྨོན་ཚིག་གསུང་འདོན་གནང་རྗེས་བཀའ་དྲུང་ཡིག་ཚང་གི་དྲུང་ཆེ་ཆུ་སྐྱ་སྦྲ་གཉིས་ཚེ་རྒྱལ་ལགས་ཀྱིས་ཕེབས་བསུ་དང་མཛད་རིམ་སྐོར་ངོ་སྤྲོད་གསུང་བཤད་གནང་ཡོད། དེ་རྗེས་བོད་ཀྱི་ཟློས་གར་ཚོགས་པ་ནས་བོད་ཆོལ་ཁ་གསུམ་གྱི་གཞས་སྣ་འཁྲབ་སྟོན་གཟིགས་འབུལ་ཞུས་ཡོད། དེ་ནས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་བཤད་གནང་དོན། འདས་པའི་ཟླ་བ་ལྔའི་ནང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དགོངས་བཞེད་དང་བོད་མི་མང་སྤྱི་འཐུས་ལྷན་ཚོགས་ནས་གཏན་འབེབས་གནང་བའི་ཁྲིམས་དང་སྒྲིག་གཞི་ཁག་དང་མཐུན་པའི་ཐོག་ལས་ཀ་བྱས་ཡོད་སྐོར་དང་། ས་གནས་འགོ་འཛིན་དང་མཉམ་འབྲེལ་ཚོགས་པའི་འགན་འཛིན་རྣམ་པས་ལྷག་བསམ་ཟོལ་མེད་ཀྱིས་བོད་སྤྱི་པའི་ཆེད་དུ་ཕྱག་ལས་གནང་དགོས་པའི་གལ་གནད་སོགས་ཀྱི་སྐོར་གསུང་བཤད་གནང་གྲུབ་མཚམས་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་གསུང་བཤད་གནང་དོན།
སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དགོངས་བཞེད་དང་ཆོལ་ཁ་ཆོས་ལུགས་དབྱེ་བ་མེད་པར་ལས་དོན་བསྒྲུབ་རྒྱུའི་ཆོད་སེམས་བརྟན་པོ་ཡོད། རང་ཉིད་ཀྱིས་མི་ལོ་༣༧ རིང་སློབ་གྲྭའི་ནང་ལས་ཀ་བྱས་པའི་སྐབས་དྲང་པོ་དྲང་གཞག་དང་སྒྲིག་གཞི་དང་མཐུན་པའི་ཐོག་ལས་ཀ་བྱས་ཡོད་པ་གཞིས་བྱེས་བོད་རིགས་སྤུན་ཟླ་ཡོངས་ལ་ཞུ་འདོད་བྱུང་། ཞེས་དང་། སློབ་གྲྭ་དང་གཞིས་འགོ་གཉིས་མཐུན་དང་མ་མཐུན་ཡོང་གི་སྟབས་སློབ་གྲྭར་གྱོང་རག་གི་ཡོད། དེར་བརྟེན་ས་གནས་འགོ་འཛིན་རྣམ་པས་སློབ་གྲྭར་གཟིགས་སྐྱོང་དང་མཐུན་འགྱུར་རོགས་རམ་གནང་རོགས། ཕ་མར་སློབ་སྟོན་གནང་རོགས། ཞེས་འབོད་སྐུལ་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་ཡོད།
དེ་ནས་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་གསུང་བཤད་གནང་དོན། ངས་ཕྱི་ལོ་༡༩༩༡ སྔོན་ཙམ་ནས་དབང་བསྒྱུར་དང་བཙན་གནོད་འོག་ཡོད་པའི་གཞིས་ལུས་བོད་རིགས་སྤུན་ཟླ་རྣམས་ཀྱི་ཆེད་དུ་ལས་ཀ་བྱས་ཡོད། དཔལ་ལྡན་སྲིད་སྐྱོང་མཆོག་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དཔལ་ལྡན་ཚོགས་གཞོན་སྒྲོལ་མ་ཚེ་རིང་མཆོག དེ་བཞིན་བོད་མི་མང་སྤྱི་འཐུས་ལྷན་ཚོགས་ནས་རེ་བ་གནང་བ་ལྟར་རང་ཉིད་ནས་དྲང་པོ་དྲང་གཞག་དང་ལྷག་བསམ་རྣམ་དག་གིས་ཞབས་འདེགས་ཞུ་རྒྱུའི་ཆོད་སེམས་བརྟན་པོ་ཡོད་པ་དང་། ལྷག་པར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཕྱྭའི་ཐད་ལྷ་མི་ཟུང་འབྲེལ་ཐོག་ནས་ཕྱག་ལས་གནང་དགོས་པ། རྒྱ་གར་གཞུང་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཕྱྭའི་ཆེད་དུ་མཐུན་འགྱུར་རོགས་རམ་གནང་དང་གནང་བཞིན་པར་གོ་སྐབས་འདི་བརྒྱུད་ཐུགས་རྗེ་ཆེ་ཞུ་རྒྱུ་ཡིན། བོད་མི་ཚོས་དགྲ་དགའ་གཉེན་སྡུག་གི་ལས་ཀ་མ་གནང་རོགས་ཞེས་འབོད་སྐུལ་ཞུ་རྒྱུ་ཡིན་ཞེས་སོགས་ཀྱི་སྐོར་གསུང་བཤད་གནང་།
ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་གསུང་བཤད་གནང་དོན། བཀའ་བློན་རྒྱ་རི་སྒྲོལ་མ་མཆོག་དང་བཀའ་བློན་ལྕང་ར་ཐར་ལམ་སྒྲོལ་མ་མཆོག་དང་ལྷན་དུ་བོད་དོན་ཆེད་དུ་ཞབས་འདེགས་བསྒྲུབ་རྒྱུའི་གོ་སྐབས་བྱུང་བར་རང་ཉིད་ཧ་ཅང་དགའ་སྤོབས་ཡོད། བོད་མི་རྣམས་རྒྱ་གར་ལ་བཙན་བྱོལ་དུ་འབྱོར་རྗེས་ས་དང་གནམ་མ་གཏོགས་ངོ་ཤེས་མེད་པའི་སྐབས་མི་རབས་རྒན་པ་རྣམ་པས་སྐུ་ལས་ཧ་ཅང་བསྐྱོན་ཡོད་སྟབས་གོ་སྐབས་འདི་བརྒྱུད་མི་རབས་རྒན་པ་རྣམས་ལ་ཐུགས་རྗེ་ཆེ་ཞུ་རྒྱུ་ཡིན། གཞོན་སྐྱེས་ཚོས་བོད་ཀྱི་རྒྱལ་རབས་ལོ་རྒྱུས་ཤེས་རྟོགས་ཡོད་པའི་སྒོ་ནས་བོད་མིའི་འཐབ་རྩོད་རྒྱུན་སྐྱོང་མཐར་སྐྱེལ་བྱེད་རྒྱུ་གལ་ཆེན་པོ་རེད། དེ་བཞིན་ང་ཚོས་འཐབ་བྱུས་ལྡན་པའི་ལས་འགུལ་སྤེལ་དགོས་པ་དང་། རྒྱ་ནག་སྟོབས་ཆེན་རྒྱལ་ཁབ་ཡིན་ཡང་རྒྱ་ནག་ལ་ཁྱིམ་མཚེས་རྒྱལ་ཁབ་རྣམས་དང་། འཕགས་བོད་ས་མཚམས། ཐའེ་ཝན་སོགས་དང་འབྲེལ་བའི་དཀའ་ངལ་མང་དག་འཕྲད་བཞིན་ཡོད་སྟབས་ང་ཚོས་གོ་སྐབས་དམ་འཛིན་གྱིས་ཕྱག་ལས་གནང་དགོས་ཞེས་སོགས་ཀྱི་སྐོར་གསུངས།
དེ་རྗེས་དཔལ་ལྡན་སྲིད་སྐྱོང་མཆོག་གིས་གཞིས་བྱེས་བོད་མི་ཚང་མས་ཐུགས་འཚབ་གནང་མི་དགོས་པའི་སྐོར་དང་། ང་ཚོས་ཧུར་ཐག་གིས་བོད་དོན་སླད་དུ་ཞབས་འདེགས་ཞུ་རྒྱུའི་ཆོད་སེམས་བརྟན་པོ་ཡོད་པའི་སྐོར་གསུངས་པ་དང་འབྲེལ་དཔལ་ལྡན་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་གི་སྐོར་ངོ་སྤྲོད་དང་ཐུགས་རྗེ་ཆེ་ཞུའི་གསུང་བཤད་གནང་གྲུབ་མཚམས་དཔལ་ལྡན་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་ལ་མཇལ་དར་ཕུལ་གནང་ཡོད། དེ་ནས་དཔལ་ལྡན་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་གིས། སྐབས་བཅུ་དྲུག་པའི་བཀའ་ཤག་གི་ལས་དོན་ཁག་ལམ་ལྷོངས་ཡོང་བའི་སྨོན་འདུན་ཞུས་གནང་བ་དང་འབྲེལ་ཁོང་གིས་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་དང་ཨོསྟྲེ་ལི་ཡཱ་སྐུ་ཚབ་དོན་གཅོད་ཁང་སོགས་ཀྱིས་གཙོས་བཙན་བྱོལ་བོད་མིའི་སྤྱི་ཚོགས་ནང་ད་བར་མི་ལོ་ ༤༠ ཙམ་རིང་ལྷག་བསམ་རྣམ་དག་གིས་ཞབས་འདེགས་ཞུས་གནང་བ་སོགས་ཀྱི་སྐོར་གསུངས། མཐར་ནང་སྲིད་དྲུང་ཆེ་ཤོ་ཟུར་ཚེ་དབང་སྒྲོལ་མ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་ལེགས་པར་གྲོལ་ཡོད་པ་བཅས།།
