༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༡ ཟླ་ ༡༡ ཚེས་ ༡༠ ཉིན་གྱི་ཉིན་རྒྱབ་ཆུ་ཚོད་ ༡།༣༠ ཐོག་ཐའེ་ཝན་དུ་བཅའ་སྡོད་ཁེ་ཎ་ཌ་གཞུང་ཚབ་ཁང་གི་ཆབ་སྲིད་དང་དཔལ་འབྱོར་སྡེ་ཚན་གྱི་འགན་འཛིན་སྐུ་ཞབས་(Martin Laflamme) ལགས་དང་། རིག་གཞུང་སྡེ་ཚན་གྱི་འགན་འཛིན་ལྕམ་(Chloe Chen) ལགས་གཉིས་ཆེད་ཕེབས་གནང་བ་ལྟར་འདི་ག་དོན་གཅོད་ལགས་དང་དྲུང་ཆེ་གཉིས་བར་སྤྱི་ཡོངས་བོད་དོན་སྐོར་ཕན་ཚུན་བཀའ་མོལ་ལྷུག་པོ་བྱུང་ཡོད།
དེ་ཡང་ཐོག་མར་སྐུ་ཞབས་(Martin Laflamme) ལགས་ནས་ཁོང་བོད་ཀྱི་རྒྱལ་ས་ལྷ་ས་དང་། ཁམས། ཨ་མདོའི་ལུར་པར་འགྲོ་མྱོང་ཡོད་པའི་སྐོར་ངོ་སྤྲོད་མདོར་བསྡུས་དང་འབྲེལ་དེ་རིང་བོད་ཀྱི་སྐུ་ཚབ་དོན་གཅོད་ལས་ཁུངས་སུ་བཅར་རྒྱུ་བྱུང་བར་ཤིན་ཏུ་དགའ་པོ་བྱུང་བ་དང་། ༸གོང་ས་༸སྐྱབས་མགོན་ཆེན་པོ་མཆོག་གི་སྐུ་གཟུགས་འཕྲོད་བཞེས་ཀྱི་གནས་སྟངས་དང་། དོན་གཅོད་ལས་ཁུངས་ཀྱི་ངོ་བོ། ལས་དོན་གང་དང་གང་སྒྲུབ་བཞིན་པའི་སྐོར་ཤེས་འདོད་ཡོད་པའི་བསམ་ཚུལ་གསུངས། སྐུ་ཚབ་དོན་གཅོད་འབའ་བ་སྐལ་བཟང་རྒྱལ་མཚན་ལགས་ནས་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་ཀྱི་མཚན་གནས་ཡོད་ཙང་དུས་རྒྱུན་ནས་འབྲེལ་ཡོད་ཡིག་ཚང་གི་དྲུང་ཆེ་ལགས་དང་འབྲེལ་བ་ཞུས་ཏེ། ༸གོང་ས་མཆོག་གི་སྐུའི་འཕྲོད་བཞེས་སྐོར་བཀའ་འདྲི་ཞུ་བཞིན་ཡོད། དགའ་འོས་པ་ཞིག་ལ་ཕྱི་ལུགས་དང་སྲོལ་རྒྱུན་ཟུང་འབྲེལ་ཐོག་༸སྐུའི་འཕྲོད་བཞེས་ཐོག་དུས་ཚོད་ངེས་ཅན་ནང་བརྟག་དཔྱད་གནང་བཞིན་པ་ལྟར་སྐུ་གཟུགས་ཧ་ཅང་བདེ་ཐང་ཡོད་པ་དང་། འཛམ་གླིང་ཡོངས་ནད་ཡམས་རྐྱེན་གྱིས་ཕྱི་ཕྱོགས་སུ་ཆིབས་བསྒྱུར་གནང་མ་ཐུབ་པ་ཡིན་ནའང་། འཆར་ཅན་དྲ་ལམ་བརྒྱུད་མཛད་པ་ཇི་ལྟར་སྐྱོང་བཞིན་པའི་སྐོར་ངོ་སྤྲོད་མདོར་ཙམ་ཞུས། 
དེ་ནས་སྐུ་ཚབ་དོན་གཅོད་ལགས་ནས་དགའ་བསུའི་འཚམས་འདྲི་ཞུས་རྗེས་ལས་ཁུངས་སྐོར་ངོ་སྤྲོད་ཞུས་དོན། ཕྱི་ལོ་ ༡༩༩༧ ལོར་༸གོང་ས་༸སྐྱབས་མགོན་ཆེན་པོ་མཆོག་ཐའེ་ཝན་དུ་ཆིབས་བསྒྱུར་ཐེངས་དང་པོ་གནང་སྟེ་དེའི་སྐབས་ཀྱི་ཐའེ་ཝན་སྲིད་འཛིན་ལི་ཏིན་ཧེའི་མཆོག་དང་མཇལ་འཕྲད་ཀྱིས་ཐུགས་གཏན་འཁེལ་བ་ལྟར། ཕྱི་ལོ་ ༡༩༩༨ ལོར་༸གོང་ས་༸སྐྱབས་མགོན་ཆེན་པོ་མཆོག་གི་བོད་ཀྱི་ནང་ཆོས་ཐེབས་རྩའི་ངོ་བོ་ཐོག་དེབ་སྐྱེལ་ཞུས་ཏེ་གསར་འཛུགས་གནང་བ་དང་། ཕྱི་ལོ་ ༢༠༠༠ ལོའི་རྗེས་ཁྲིན་ཧྲེའུ་པཎ་མཆོག་སྲིད་འཛིན་སྐབས་ཕྱི་འབྲེལ་དོན་གཅོད་ལས་ཁུངས་ལ་དངོས་སུ་ངོས་ལེན་བྱས་པའི་རྒྱབ་ལྗོངས་ངོ་སྤྲོད་དང་འབྲེལ་དོན་ཁང་ཁྱབ་ཁོངས་འོག་ནང་ཆོས་འཛིན་གྲྭའི་གནས་སྟངས་དང་། ལོ་རེར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་དེབ་ཕྲེང་རེ་དང་། ཀུན་གསལ་འོད་སྣང་དུས་དེབ་འདོན་ཐེངས་བཞི་རེ། གངས་ལྗོངས་དཔེ་སྐྲུན་ཁང་ནས་བོད་ཀྱི་རྒྱལ་རབས་ལོ་རྒྱུས་དང་། རིག་གཞུང་རྩ་མེད། ཁོར་ཡུག་གཏོར་སྐྱོན། ངག་རྒྱུན་ལོ་རྒྱུས་སོགས་ལོ་རེར་དེབ་གྲངས་བཞི་རེ་ཙམ་དཔར་སྐྲུན་འགྲེམས་སྤེལ། དེ་བཞིན་རྒྱ་ཡིག་ཡིག་གཟུགས་གསར་པའི་ཐོག་ཕྱོགས་སྒྲིག་གིས་གློག་འཕྲིན་བརྒྱུད་ཕྱོགས་ཁག་སོ་སོར་བཏང་ལུགས་གཏོང་སྟངས་ཀྱི་གནས་ཚུལ་སོགས་ངོ་སྤྲོད་ཞིབ་རྒྱས་ཞུས།
དེ་རྗེས་འགན་འཛིན་གཉིས་ནས་ཐའེ་ཝན་ནང་བོད་མིའི་གནས་སྟངས་སྐོར་བཀའ་འདྲི་ཞུས་སྐབས། དོན་གཅོད་དང་དྲུང་ཆེ་གཉིས་ནས་ཆོས་ཚོགས་དང་དགེ་འདུན་པའི་ཞལ་གྲངས། གཏན་སྡོད་བོད་མི་ཇི་ཡོད་བཅས་ངོ་སྤྲོད་ཞུས་རྗེས། བོད་མི་ཚོས་ཕྱིར་བསྐྱོད་ལག་དེབ་སེར་པོ་བསྣམས་ཏེ་ཐའེ་ཝན་ལ་ཐོངས་མཆན་ཞུས་སྐབས་ཀྱི་དཀའ་ངལ་ཇི་འཕྲད་སྐོར་ལའང་ངོ་སྤྲོད་མཐིལ་ཕྱིན་ཞུས་པ་དང་། དེར་གཞུང་ཚབ་ཀྱི་འགན་འཛིན་གཉིས་ནས་དོ་སྣང་ཆེན་པོས་དྲི་བ་མང་པོ་ཕེབས་པར་ལན་འདེབས་གསལ་བཤད་གང་ལེགས་ཞུས་གྲུབ་པ་དང་བསྟུན། ཕན་ཚུན་བཀའ་མོལ་ལྷུག་པོ་བརྒྱུད་སྐུ་ཚབ་དོན་གཅོད་ལགས་ནས་ཉེ་ལམ་བོད་མིའི་སྒྲིག་འཛུགས་ཀྱི་སྲིད་སྤྱིའི་འོས་བསྡུ་གྲུབ་མཚམས་ཕྱི་ཟླ་ ༦ པའི་ནང་དཔལ་ལྡན་སྲིད་སྐྱོང་མཆོག་དང་ཁེ་ཎ་ཌ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་དབར་དྲ་ཐོག་ཚོགས་འདུ་ཚོགས་པའི་གནས་ཚུལ་དང་། ཁེ་ཎ་ཌའི་གཞུང་མང་ནས་ཡུན་རིང་བོད་དོན་ཐོག་རྒྱབ་སྐྱོར་དང་གདུང་སེམས་མཉམ་བསྐྱེད་གནང་བར་ཐུགས་རྗེ་ཆེ་དང་། མ་འོངས་པར་མུ་མཐུད་དེ་ལྟར་རྒྱབ་སྐྱོར་གནང་བའི་རེ་བ་ཞུས་རྗེས། བོད་ནང་གི་ཛ་དྲག་གནས་སྟངས་དང་། ཨ་རིའི་བོད་དོན་རྒྱབ་སྐྱོར་ཁྲིམས་ཡིག་ ༢༠༢༠ ཡི་ནང་དོན་སོགས་ཀྱང་ངོ་སྤྲོད་དང་བགྲོ་གླེང་ལྷུག་པོ་བྱུང་རྗེས་འགན་འཛིན་རྣམས་ཀྱི་ཆོས་ཁང་དུ་ཆོས་མཇལ་དང་། མ་འོངས་པར་བོད་དང་བཞུགས་སྒར་རྡ་སར་ཕེབས་འདོད་ཡོད་པའི་རྣམ་འགྱུར་དང་བཅས་ཕྱིར་ལོག་ཕེབས།
ཉེ་ལམ་ཐའེ་ཝན་དུ་ཏོག་དབྱིབས་ནད་དུག་གི་ཁྲིམས་གཞི་བསྡམས་པ་ཅུང་ལྷོད་དུ་ཕྱིན་ཡོད་སྟབས་སྐུ་ཚབ་དོན་གཅོད་ལས་ཁུངས་སུ་རྒྱལ་ཁབ་གཞན་གྱི་གཞུང་ཚབ་དང་། ཆབ་སྲིད་སྡེ་ཚན་གྱི་འགན་འཛིན་སོགས་ཆེད་ཕེབས་ཀྱིས་ཕན་ཚུན་ངོ་སྤྲོད་དང་བོད་དོན་དང་འབྲེལ་བའི་ཐོག་བཀའ་མོལ་ལྷུག་པོ་ཞུ་རྒྱུ་བྱུང་ཡོད་པ་མ་ཟད། འདི་ག་དོན་གཅོད་དང་དྲུང་ཆེ་གཉིས་ནས་ཀྱང་ཕྱི་རྒྱལ་གཞུང་ཚབ་ཁག་གཅིག་ལའང་མཇལ་མོལ་གྱིས་བོད་དོན་དང་འབྲེལ་བའི་གནད་དོན་ཐོག་བཀའ་མོལ་ཞུ་རྒྱུའི་གོ་སྐབས་བྱུང་ཡོད་པ་བཅས།།
