༄༅། །རྒྱ་ནག་གཞུང་གིས་བོད་མདོ་སྨད་མཛོད་དགེ་ཐང་སྐོར་སོག་ཚང་དགོན་གྱི་གྲྭ་དགེ་འདུན་གྲགས་པ་ལགས་མི་ལོ་ལྔའི་བཙོན་འཇུག་གི་དུས་ཡུན་ཚང་ནས་གློད་གྲོལ་བཏང་ཡོད་ནའང་། ད་ལྟའི་ཆར་ཁོང་གི་གཟུགས་གཞིའི་གནས་བབ་ཞན་པའི་རྐྱེན་གྱིས་སྨན་བཅོས་བྱེད་མུས་ཡིན་འདུག

དེ་ཡང་རྒྱ་ནག་གཞུང་གིས་འཛིན་བཟུང་གིས་འདས་པའི་མི་ལོ་ལྔའི་རིང་བཙོན་འཇུག་བྱས་པའི་མདོ་སྨད་མཛོད་དགེ་ཐང་སྐོར་སོག་ཚང་དགོན་གྱི་གྲྭ་དགེ་འདུན་གྲགས་པ་ལགས་བཙོན་འཇུག་དུས་ཡུན་ཚང་ནས། འདི་ལོའི་ཕྱི་ཟླ་ ༨ ནང་གློད་གྲོལ་བཏང་ཡོད་ནའང་། ཁོང་གི་འགྲོ་འདུག་རང་དབང་ལ་ས་གནས་རྒྱ་ནག་གཞུང་གི་ཉེན་རྟོག་པས་ལྟ་རྟོག་ནན་པོ་བྱེད་བཞིན་ཡོད་པ་མ་ཟད། ནང་མི་སྤུན་མཆེད་སུ་ཡིན་ནའང་ཁོང་གི་གནས་སྟངས་དང་གནས་ཚུལ་སྐོར་གླེང་སློང་བྱེད་ཐབས་མེད་པ་ཆགས་ཡོད། ཁོང་གློད་གྲོལ་བཏང་ནས་ཟླ་བ་གཉིས་ཙམ་འགྲོ་བཞིན་ཡོད་ནའང་། ཟླ་རེ་བཞིན་ས་གནས་ཉེན་རྟོག་ཁང་དུ་ཐོ་འགོད་ཆེད་ངེས་པར་དུ་འགྲོ་དགོས་ཀྱི་ཡོད།

གྲྭ་དགེ་འདུན་གྲགས་པ་ལགས་ཕྱི་ལོ་ ༢༠༡༥ ཟླ་ ༨ ཚེས་ ༢༤ ཉིན་གྱི་མཚན་མོར་མཛོད་དགེ་སོང་ཚང་དགོན་གྲྭ་ཤག་ནས་རྒྱ་ནག་དྲག་ཆས་ཉེན་རྟོག་པས་འཛིན་བཟུང་བྱས་ཏེ་རྒྱལ་ཁབ་ཁ་བྲལ་དང་བོད་ཕྱི་ཕྱོགས་སུ་འབྲེལ་གཏུག་བྱས་ལུགས་ཀྱི་ནག་ཉེས་བཙུགས་ནས་ལོ་ ༥ རིང་དུས་བཀག་བཙོན་འཇུག་གི་ཁྲིམས་ཐག་བཅད་ཡོད།

རྒྱ་ནག་གཞུང་གིས་བོད་མི་འཛིན་བཟུང་དང་བཙོན་འཇུག་བྱས་པ་རྣམས་ལ་སྡུག་སྦྱོང་མནར་གཅོད་འདྲ་མིན་སྣ་ཚོགས་གཏོང་བཞིན་ཡོད་པར་བརྟེན་ལུས་སེམས་མི་བདེ་བ་བཟོས་པ་དང་། ལུས་ནད་གཅོང་དང་ཡན་ལག་སྐྱོན་ཅན་བཟོས་པ་སོགས་ལ་བརྟེན་ནས་གློ་བུར་དུ་འདས་གྲོངས་སུ་གྱུར་བ་བའམ་ཡང་ན་བཙོན་ཁང་ནས་གློད་གྲོལ་ཐོབ་རྗེས་རང་ཁྱིམ་དུ་ཉིན་ཤས་རྗེས་འདས་གྲོངས་སུ་གྱུར་བའི་གནས་ཚུལ་ཡང་ཡང་ཡོང་བཞིན་ཡོད། །