༄༅། །འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་ཁོར་ཡུག་ཚོགས་ཆེན་ཐེངས་ ༢༦ (COP26) དེ་བཞིན་སི་ཁོ་ཊི་ལན་ཌིའི་གྷི་ལ་སི་གྷོ་ (Glasgow) གྲོང་ཁྱེར་ནང་འཚོགས་ལ་ཉེ་བ་དང་བསྟུན། ཕྱི་ལོ་ ༢༠༢༡ ཟླ་ ༡༠ ཚེས་ ༢༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་འདིའི་མ་འོངས་པ་ཇི་འགྱུར་ང་ཚོའི་ལག་པར་ཡོད་པས་གནམ་གཤིས་འགྱུར་ལྡོག་གི་དཀའ་ངལ་སེལ་དགོས་པའི་གསུང་འཕྲིན་སྩལ་དོན། གོ་ལའི་ཚ་དྲོད་འཕེལ་བ་འདི་གནས་ཚུལ་ཛ་དྲག་པོ་ཞིག་རེད། ང་ཚོས་དེ་ལ་དོ་སྣང་ཆེ་ཙམ་བྱེད་དགོས། དུས་ཚོད་ནི་ནམ་ཡང་རང་སོར་མི་སྡོད་པ་ཡིན་པས། ང་ཚོ་ཡང་རང་བཞིན་གྱིས་དེའི་ཆར་གཏོགས་པ་ཡིན། འདས་པ་ནི་གལ་ཆེན་པོ་ཡིན་ནའང་དེ་ནི་འདས་ཟིན་པ་ཞིག་ཡིན་པ་མ་ཟད། དེ་ལས་ང་ཚོས་བློ་སྐྱེད་ལེན་རྒྱུ་ཡོད། དེ་མིན་ང་ཚོར་འདས་པ་བསྒྱུར་བ་གཏོང་བའི་ནུས་པ་མེད། འོན་ཀྱང་མ་འོངས་པ་ཇི་ལྟར་འགྱུར་མིན་ནི་ང་ཚོའི་ལག་ཏུ་ཡོད།

བོད་ནི་མ་མཐར་ཡང་ཨེ་ཤ་ཡའི་གླིང་ཆེན་གྱི་ཆུའི་འབྱུང་ཁུངས་ལྟེ་བ་དེ་ཡིན། དཔེར་ན། པ་ཀི་སི་ཐན་ནང་གི་སེངྒེ་གཙང་པོ་ནས་བཟུང་སྟེ་རྒྱ་གར་གྱི་ཆུ་བོ་གངྒཱ་དང་ཡར་ཀླུང་གཙང་པོ། རྒྱ་ནག་ཏུ་བཞུར་བཞིན་པའི་རྨ་ཆུ་དང་། ཝི་ཐི་ནམ་དུ་རྫ་ཆུ་བཅས་རྒྱུག་ཆུ་ཆེ་ཁག་ཚང་མའི་འབྱུང་ཁུངས་ཡིན། ང་ཚོས་བོད་ཀྱི་ཁོར་ཡུག་སྲུང་སྐྱོབ་ཆེད་དུ་དོ་སྣང་ཆེ་ཙམ་བྱེད་དགོས་པ་འདི་ནི་བོད་མི་ས་ཡ་ ༦ ནས་ ༧ བར་ཡོད་པ་དེ་དག་རྐྱང་པའི་དོན་དུ་མ་ཡིན་པར། ཨེ་ཤ་ཡའི་ས་ཁུལ་དེ་དག་གི་མི་ཡོངས་རྫོགས་ཀྱི་ཆེད་དུ་ཡིན།

ཆ་སྙོམས་བྱས་ན་ང་ཚོའི་ཚེ་ཚད་ནི་ལོ་བརྒྱ་སྐོར་ཞིག་ཡིན་པས། ང་ཚོའི་དུས་རབས་འདི་ལ་དོ་ཁུར་ནན་པོ་ཞིག་བྱེད་དགོས་ངེས་རེད། ང་རང་ནི་དགེ་སློང་ཞིག་ཡིན་པས་ང་ལ་བུ་ཕྲུག་མེད། འོན་ཀྱང་སོ་སོའི་བུ་རབས་ཚ་བརྒྱུད་ཡོད་པའི་མི་རྣམས་ཀྱིས། ཁོང་ཚོའི་མ་འོངས་པའི་ཆེད་དུ་གཟབ་ནན་གྱིས་འགན་ཁུར་ཆེན་པོ་ལེན་དགོས། དེར་བརྟེན་ང་ཚོ་ཚང་མར་འགན་འཁུར་ཡོད་པ་ནི། སོ་སོའི་ཁྱིམ་ཚང་ངམ་སྡོད་ཤག་ལ་བདག་པོ་བརྒྱབ་པ་ནང་བཞིན་རེད། འཕྲུལ་རིག་ལ་བརྟེན་ནས་ང་ཚོ་ཟླ་བའི་ནང་ལས་སླ་པོ་བྱས་ནས་འགྲོ་ཐུབ་པ་དང་། གཟའ་སྐར་མིག་དམར་དང་གཟའ་སྐར་གཞན་དུའང་འགྲོ་ཐུབ་ཀྱང་གཟའ་སྐར་དེ་དག་ནང་གཞིས་ཆགས་ནས་སྡོད་ཐབས་མེད་པ་ང་ཚོས་ཧ་ལམ་ཤེས་ངེས་རེད།  དེར་བརྟེན་འཛམ་གླིང་འདི་ནི་ང་ཚོའི་ཁྱིམ་གཅིག་པོ་དེ་ཡིན་ཞེས་བཀའ་སློབ་སྩལ། །