༄༅། །འདི་གར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་བཏང་གནས་ནང་འཁོད་དོན།  ཕྱི་ལོ་ ༢༠༢༡ ཟླ་ ༩ ཚེས་ ༢༤ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དབུ་བཞུགས་ཐོག་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཕྱི་ལུགས་དང་བོད་ལུགས་གསོ་བ་རིག་པ་ཟུང་འབྲེལ་ལས་གཞི་དང་འབྲེལ་བའི་ཚོགས་འདུ་ཞིག་ཚོགས་གནང་ཡོད།དེ་ཡང་ཚོགས་འདུའི་ཐོག་སྐུའི་བླ་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་དང་། སྐུའི་བླ་སྨན་པ་ཚེ་དབང་རྟ་མགྲིན་ལགས་དྲ་ཐོག་ནས་ཆེད་བཅར་གྱིས་ཟུང་འབྲེལ་ལས་གཞིའི་ཐོག་དགོངས་འཆར་སློབ་སྟོན་གནང་ཡོད། སློབ་སྟོན་ཚོགས་མིའི་ཁོངས་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་དང་། བདེ་ལེགས་སྨན་ཁང་དང་བོད་ཀྱི་སྨན་རྩིས་ཁང་གི་འགན་འཛིན། འཕྲོད་བསྟེན་ལས་ཁུངས་ཀྱི་དྲུང་འཕར་དང་ཟུང་དྲུང་། འཆར་སྡེ་འགན་འཛིན་བཅས་མཉམ་ཞུགས་ཀྱིས་གྲོས་གཞི་གཉིས་ཐོག་བཀའ་བསྡུར་གནང་ཡོད།ལས་གཞི་འདིའི་འོག་འདི་ལོར་ལུགས་གཉིས་ཀྱི་སྨན་པ་རྣམས་ལ་ཚོགས་ཐེངས་ ༢༠ ཅན་གྱི་དུས་ཐུང་ཟབ་འཁྲིད་ཅིག་དྲ་ཐོག་ནས་གོ་སྒྲིག་ཞུས་ཡོད་པ་དང་། བཙན་བྱོལ་བོད་མིའི་ཁྲོད་ཕོ་བའི་འབྲས་ནད་ཕོག་པའི་ནད་པ་ཇེ་མང་འཐོན་བཞིན་པ་དེའང་གཙོ་བོ་ཕོ་སྲིན་ (H. Pylori) གཉན་ཁར་སྨན་བཅོས་དུས་ཐོག་བྱ་རྒྱུ་གལ་ཆེར་སོང་ལས་གཞི་འདིའི་འོག་ཕོ་སྲིན་ཡོད་མེད་བརྟག་དཔྱད་དང་། ནད་པ་གྲངས་ ༡༢༠ ལ་ཕྱི་ལུགས་དང་གསོ་རིག་ཟུང་འབྲེལ་གྱིས་སྨན་བཅོས་ཉམས་ཞིབ་ཅིག་འགྲོ་མུས་དང་། དེ་བཞིན་ཏོག་དབྱིབས་གཉན་རིམས་ ༡༩ དང་འབྲེལ་བའི་ཡིག་ཆ་ཁག་གཅིག་ཕྱོགས་སྒྲིག་གནང་སྟེ་འདོན་འཆར་ཡོད་པ་ཡིན།

འཆར་གཞི་ལྟར་འདི་ལོའི་ཟུང་འབྲེལ་ཆེད་ལས་པའི་ཚོགས་འདུ་དེ་ཕྱི་ལོ་ ༢༠༢༡ ཟླ་ ༩ ཚེས་ ༢༢ ཉིན་བསྐོང་ཚོགས་གནང་ཡོད་པ་བཅས། །