༄༅། །ཕྱི་ལོ་ ༢༠༢༡ ཟླ་ ༡༠ ཚེས་ ༢༦ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བྷོལ་ཌར་ས་གནས་ཀྱི་ཀོ་ལོ་ར་ཌོ་གཙུག་ལག་སློབ་ཆེན་གྱི་རེ་ནེ་ཁི་རོན་བདེ་ཐབས་སློབ་གཉེར་བསྟི་གནས་ཁང་ (Renee Crown Wellness Institute at the University of Colorado Boulder) དང་། སེན་ཌི་འེ་གོའི་ཁ་ལི་ཧྥོར་ནི་ཡ་གཙུག་ལག་སློབ་ཆེན་གྱི་བྱམས་བརྩེ་སློབ་གཉེར་བསྟི་གནས་ཁང་ (Compassion Institute at the University of California San Diego) གཉིས་ནས་ཇི་ལྟར་གསོལ་བ་བཏབ་པ་ལྟར་བཞུགས་སྒར་རྒྱལ་བའི་ཕོ་བྲང་ནས་དྲ་ལམ་བརྒྱུད་འཛམ་གླིང་གི་མཁས་དབང་གྲགས་ཅན་དང་། སྔོན་འགྲོ་དང་གཞི་རིམ་གོང་མའི་དགེ་རྒན་རྣམས་དང་ལྷན་དུ་སློབ་གྲྭ་ཁག་ཏུ་སྙིང་རྗེ་དང་ཆེ་མཐོང་བསྐྱེད་ཐབས་ཞེས་པའི་བརྗོད་གཞིའི་སྐོར་གླེང་མོལ་མཛད་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ མ་ཟིན་ཙམ་ལ་མགོན་པོ་གང་ཉིད་མཆོག་བཞུགས་སྒར་རྒྱལ་བའི་ཕོ་བྲང་གི་གཟིམ་ཆུང་ནས་བཀའ་སློབ་གནང་ཡུལ་དུ་ཆིབས་སྒྱུར་གྱིས་བཞུགས་ཁྲིར་འཁོད་མཚམས་བཀའ་སློབ་སྩལ་དོན། ནང་སེམས་ཀྱི་རིན་ཐང་སྐོར་སྐད་ཆ་བཤད་རྒྱུའི་གོ་སྐབས་གནང་བར་ངོས་རང་ཧ་ཅང་དགའ་པོ་བྱུང་། འཇིག་རྟེན་འདིའི་སྟེང་གནས་པའི་དུད་འགྲོ་སེམས་ཅན་ཐམས་ཅད་ཚུད་པའི་མེ་ཏོག་དང་། ལྗོན་ཤིང་། རྩི་ཤིང་བཅས་ཀྱིས་ཞི་བདེ་ལ་རྗེས་སུ་ཡི་རང་བྱེད་ཀྱི་ཡོད། དེ་སྔ་ང་ཚོས་ཨུ་རུ་སུའི་ཚན་རིག་པ་ཁག་གཅིག་དང་ལྷན་བགྲོ་གླེང་བྱས་པའི་སྐབས་ཚན་རིག་པ་གཅིག་གིས་མེ་ཏོག་གཅིག་ལ་རྟག་པར་བཀའ་བཀྱོན་བཏང་བ་དང་། མེ་ཏོག་གཅིག་ལ་བསྟོད་ར་བཏང་ན་མེ་ཏོག་དེ་གཉིས་ཀྱིས་རྣམ་འགྱུར་མ་འདྲ་བ་སྟོན་གྱི་འདུག་ཅེས་བརྗོད་བྱུང་། གང་ལྟར་རྩི་ཤིང་རིགས་ལ་ཆུ་བླུགས་པ་དང་ཉི་མའི་འོད་འཕོག་ཏུ་བཅུག་ན་ལེགས་པར་སྐྱེ་ཡི་ཡོད།དེང་སང་འཛམ་གླིང་གང་ས་ནས་ཞི་བདེ་དགོས་ཞེས་རྗོད་ཀྱི་ཡོད། དོན་དམ་གྱི་འཛམ་གླིང་འདི་ཉིད་ཞི་བདེ་དང་ལྡན་པ་ཞིག་བསྐྲུན་པར་ང་ཚོའི་ནང་སེམས་ཀྱི་ཞི་བདེ་བསྐྲུན་དགོས་ཀྱི་ཡོད། གལ་ཏེ་ནང་སེམས་ཀྱི་ཞི་བདེ་དང་ལྡན་པ་ཞིག་ཡོད་ན་གོ་མཚོན་ཡོད་ཀྱང་བེད་སྤྱོད་མེད། མཐར་ཐུག་ན་སེམས་ཞི་བདེ་དགོས་རྒྱུ་དེ་གཙོ་བོ་ཆགས་ཡོད། སེམས་ཞི་བདེ་ཡོང་བར་བྱམས་བརྩེ་ནི་གཞི་རྩ་ལྟ་བུ་ཆགས་ཡོད། ངོས་རང་ལ་ཆ་བཞག་ན་སྔ་དྲོ་ཡར་ལངས་མ་ཐག་བྱམས་བརྩེའི་ཐོག་སྒོམ་རྒྱག་གི་ཡོད། མི་ཁག་གཅིག་གིས་བྱམས་བརྩེ་ནི་ཆོས་ལུགས་ཀྱི་བསླབ་གཞི་ (སློབ་ཚན) ལྟ་བུར་རྩི་ཡི་ཡོད། དོན་དངོས་སུ་བྱམས་བརྩེ་ནི་ང་ཚོའི་འཚོ་གནས་དང་འབྲེལ་བ་ཡོད།

ངོས་ཀྱི་ཉམས་མྱོང་ཅུང་ཙམ་ཆ་བཞག་ནས་བཤད་ན་ངོས་རང་དུས་ཚོད་ཁག་པོ་བརྒྱུད་ནས་སླེབས་པ་རེད། དུས་ཚོད་ཁག་པོའི་སྐབས་སུ་ངོས་ཀྱིས་ང་ཚོར་སྡུག་པོ་གཏོང་མཁན་རྣམས་ལའང་བྱམས་བརྩེ་སྒོམ་གྱི་ཡོད། བྱམས་བརྩེ་ཉམས་ལེན་བྱེད་ན་ཕན་ཐོགས་ཆེན་པོ་ཡོད། རང་གཞན་དོན་ནི་རབ་སྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། ཞེས་རང་དོན་བསྒྲུབ་ན་བྱང་ཆུབ་ཀྱི་སེམས་རེད། གཞན་དོན་བསྒྲུབ་ནའང་བྱང་ཆུབ་ཀྱི་སེམས་རེད། འཕྲལ་དུ་སེམས་བདེ་བ་དང་ཞི་བདེ་ཡོང་བར་བྱང་ཆུབ་ཀྱི་སེམས་རེད། ལུས་ཀུན་བདེ་བ་ཡོང་བ་དེ་བྱང་ཆུབ་ཀྱི་སེམས་རེད། གང་ལྟར་མི་ངོ་རེ་ཞི་བདེ་དང་སེམས་སྐྱིད་པ་དེའང་བྱང་ཆུབ་ཀྱི་སེམས་རེད། ཁོར་ཡུག་ཞི་བདེ་དང་བདེ་བ་ཡོང་བ་དེ་སེམས་པ་བཟང་པོ་བྱེད་རྒྱུ་དེ་རྩ་བ་རེད། ནམ་རྒྱུན་འདིར་ངོས་རང་ལ་ཐུབ་དབང་གི་སྐུ་ཞིག་ཡོད། ཆ་རྐྱེན་བྱས་ནས་འདིར་མཇལ་ནས་ཐུབ་དབང་གིས་མར་གསུང་གི་ཡོད་པའི་ཚོར་སྣང་ཡོང་གི་འདུགསྤྱོད་འཇུག་ལས། བདག་བདེ་གཞན་གྱི་སྡུག་བསྔལ་དག ། ཡང་དག་བརྗེ་བར་མ་བྱས་ན། །སངས་རྒྱས་ཉིད་དུ་མི་འགྲུབ་ཅིང་། །འཁོར་བ་ན་ཡང་བདེ་བ་མེད། །ཅེས་དང་། དེ་བས་སྐྱོ་ངལ་ཀུན་སེལ་བའི། །བྱང་ཆུབ་སེམས་ཀྱི་རྟར་ཞོན་ནས། །བདེ་ནས་བདེ་བར་འགྲོ་བ་ལ། །སེམས་ཤེས་སུ་ཞིག་སྒྱིད་ལུགས་འགྱུར། །ཞེས་པ་དེ་ངོས་ཀྱིས་རྗེས་ཟློས་ལྟ་བུ་བྱས། ཐུབ་དབང་གི་སྐུ་ཐང་དེས་བསླབ་བྱ་མར་གསུང་གི་ཡོད་པའི་ཚོར་བ་འདྲ་བྱས། གང་ལྟར་སེམས་ལ་ཞི་བདེ་ཡོད་ན་རང་བཞིན་གྱིས་ལུས་པོ་བདེ། སེམས་ལ་ཞི་བདེ་ཡོད་ན་ཁ་ལག་བཟས་པ་ཡིན་ནའང་བྲོ་བ་ཆེ་བ་ཡོད། སེམས་འཁྲུགས་ནས་བསྡད་ཡོད་ན་ཁ་ལག་ཡག་པོ་ཡོད་ནའང་གང་མཚམས་ཤིག་ནས་ས་ལ་གཡུག་རྒྱུའི་ཉེན་ཁ་ཡོད།

ཞི་བ་ལྷས་གསུངས་པའི་ཚིག་དེ་ངོས་ཀྱིས་ཉིན་ལྟར་སྐྱོར་གྱི་ཡོད། འཇིག་རྟེན་སྡུག་བསྔལ་ཇི་སྙིད་པ། །དེ་ཀུན་རང་བདེ་འདོད་ལས་བྱུང་། །འཇིག་རྟེན་བདེ་བ་ཇི་སྙེད་པ། །དེ་ཀུན་གཞན་བདེ་འདོད་ལས་བྱུང་། ། བདག་བདེ་གཞན་གྱི་སྡུག་བསྔལ་དག །ཡང་དག་བརྗེ་བར་མ་བྱས་ན། །སངས་རྒྱས་ཉིད་དུ་མི་འགྲུབ་ཅིང་། །འཁོར་བ་ན་ཡང་བདེ་བ་མེད། །ཅེས་དང་། དེ་བས་སྐྱོ་ངལ་ཀུན་སེལ་བའི། །བྱང་ཆུབ་སེམས་ཀྱི་རྟར་ཞོན་ནས། །བདེ་ནས་བདེ་བར་འགྲོ་བ་ལ། །སེམས་ཤེས་སུ་ཞིག་སྒྱིད་ལུགས་འགྱུར། །ཞེས་པའི་ཚིག་བཅད་དེ་ངོས་ཀྱིས་ཉིན་ལྟར་འདོན་གྱི་ཡོད། སེམས་ལ་ཧ་ཅང་ཕན་གྱི་འདུག   གོ་མཚོན་དང་དངུལ་གྱིས་དཀའ་ངལ་སེལ་མི་ཐུབ། སེམས་ཀྱི་ཞི་བདེ་ཡིས་དཀའ་ངལ་སེལ་ཐུབ་ཀྱི་ཡོད། ཅེས་སོགས་ཀྱི་བཀའ་སློབ་སྩལ་རྗེས་བཀའ་འདྲི་ཁག་ལ་བཀའ་ལན་སྩལ་ཡོད་པ་བཅས།།