༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་རྒྱལ་བའི་ཕོ་བྲང་ནས་དྲ་ལམ་བརྒྱུད་ཕྱི་ལོ་ ༢༠༢༡ ཟླ་ ༡༠ ཚེས་ ༡༤ ནས་དབུ་འཛུགས་ཀྱིས་ཉིན་གྲངས་གཉིས་རིང་ཨ་རིའི་ཞི་བདེ་སློབ་གཉེར་བསྟི་གནས་ཁང་ (U.S. Institute of Peace) གིས་ཇི་ལྟར་གསོལ་འདེབས་ཞུས་དོན་ལྟར། འཛམ་གླིང་སྟེང་རྩོད་རྙོག་གི་དཀའ་ངལ་ཅན་གྱི་ཡུལ་ལུང་འདྲ་མིན་གྱི་གཞོན་སྐྱེས་འགོ་ཁྲིད་ཁག་གཅིག་དང་ལྷན་དུ་བྱམས་བརྩེ་དང་ཤེས་ཡོན། འདྲ་མཉམ་ (Compassion, Education and Equality) བཅས་ཀྱི་བརྗོད་གཞིའི་ཐོག་བཀའ་སློབ་སྩལ་ཡོད།

དེ་རིང་སྟེ་ཕྱི་ཚེས་ ༡༥ ཉིན་གྱི་སྔ་དྲོ་ཆུ་ཚོད་ ༩ མ་ཟིན་ཙམ་ལ་མགོན་པོ་གང་ཉིད་མཆོག་བཞུགས་སྒར་རྒྱལ་བའི་ཕོ་བྲང་གི་གཟིམ་ཆུང་ནས་བཀའ་སློབ་གནང་ཡུལ་དུ་ཆིབས་སྒྱུར་གྱིས་བཞུགས་ཁྲིར་འཁོད་མཚམས་བཀའ་སློབ་སྩལ་དོན། ཚང་མར་སྔ་དྲོ་བདེ་ལེགས། རྣམ་པ་ཚོ་མདང་དགོང་གཉིད་ཡག་པོ་ཁུག་ཡོད་པའི་རེ་བ་ཡོད། ནམ་རྒྱུན་ངོས་རང་ཆུ་ཚོད་དགུའི་རིང་གཉིད་ཉལ་གྱི་ཡོད། དེ་སྔ་ངོས་རང་རྒྱ་གར་བྱང་ཤར་ཁུལ་དུ་བསྐྱོད་པའི་སྐབས་ངོས་ཀྱི་གྲོགས་པོ་རྒྱ་གར་གྱི་ཆབ་སྲིད་པ་ཞིག་ངོས་དང་མཉམ་དུ་ཡོད། ཉིན་ཞིག་གི་ཞོགས་པར་ངེད་གཉིས་ཐུག་འཕྲད་བྱུང་བའི་སྐབས་ཁོང་གིས་ངོས་ཀྱི་གཉིད་སྐོར་དྲིས་བྱུང་། ངོས་ཀྱིས་ཆུ་ཚོད་དགུ་རིང་གཉིད་ཉལ་རྗེས་ཆུ་ཚོད་ཁ་ཤས་རིང་སྒོམ་རྒྱག་གི་ཡོད། དེར་བརྟེན་ངོས་ཀྱི་རིག་པ་ཉིན་རེ་བཞིན་རྣོན་པོ་ཆགས་འགྲོ་ཡི་འདུག དེ་ལ་བརྟེན་ནས་ངོས་ཀྱིས་གཞན་ལ་མགོ་སྐོར་ལས་སླ་པོའི་ངང་ནས་གཏོང་ཐུབ་ཀྱི་འདུག ཅེས་བརྗོད་པ་ཡིན། ཁོང་གིས་ཁོང་ཆུ་ཚོད་བཞི་རིང་གཉིད་ཁུག་གི་ཡོད། དེར་བརྟེན་གཞན་ལ་མགོ་སྐོར་གཏོང་ཐུབ་ཀྱི་མི་འདུག་ཅེས་ལན་འདེབས་གནང་བྱུང་། དེ་ནས་ངེད་གཉིས་ཀ་གད་མོ་ཆེན་པོ་ཤོར་སོང་།

དེ་རིང་ང་ཚོ་སླར་ཡང་ཐུག་འཕྲད་ཀྱིས་གོ་བསྡུར་བྱ་རྒྱུ་བྱུང་བས་རྗེས་སུ་ཡི་རང་ཞུ་གི་ཡོད། ཅེས་བཀའ་སློབ་སྩལ་མཚམས་ཨ་རིའི་ཞི་བདེ་སློབ་གཉེར་བསྟི་གནས་ཁང་གི་འགན་འཛིན་ལྕམ་སྐུ་ལི་སི་གྷི་རན་ཌེ་ (Lise Grande) ལགས་ཀྱིས་ཕེབས་བསུ་དང་། དེ་རིང་གི་བགྲོ་གླིང་ལས་རིམ་ལ་མཉམ་ཞུགས་གནང་མཁན་འཛམ་གླིང་སྟེང་རྩོད་རྙོག་གི་དཀའ་ངལ་ཅན་གྱི་ཡུལ་ལུང་འདྲ་མིན་གྱི་གཞོན་སྐྱེས་འགོ་ཁྲིད་ཁག་གཅིག་གི་སྐོར་ངོ་སྤྲོད། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཤེས་ཡོན་སྐོར་བཀའ་སློབ་སྩལ་གནང་ཡོང་བའི་གསོལ་འདེབས་ཞུས་ཡོད།

དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཤེས་ཡོན་སྐོར་བཀའ་སློབ་སྩལ་དོན། འཛམ་གླིང་གི་མི་རྣམས་ཀྱིས་འདས་པའི་དུས་རབས་ཁ་ཤས་རིང་དམག་འཁྲུག་དང་མི་གསོད་ཁྲག་སྦྱོར་སོགས་བྱུང་བའི་དོན་རྐྱེན་སྐོར་དོ་སྣང་བྱས་ཡོད་ནའང་དོན་རྐྱེན་དེ་དག་ད་ཆ་འཆར་ཅན་ལྟ་བུར་རྩི་ཡི་ཡོད། ངོས་ཀྱི་མི་ཚེའི་རིང་ལའང་འཛམ་གླིང་དམག་ཆེན་དང་པོ་དང་གཉིས་པ་བྱུང་ཡོད། འོན་ཀྱང་མི་ཚོས་དེ་དག་སྤྱིར་བཏང་ལྟ་བུར་རྩི་ཡི་ཡོད། སྔོན་མ་ཡིན་ན་གནད་དོན་བྱེ་བྲག་པ་ཞིག་རྒྱལ་ཁབ་སོ་སོའི་ཁེ་ཕན་དང་འབྲེལ་བ་ཡོད་ན་རྒྱལ་ཁབ་དེ་དག་གིས་རྡུལ་ཕྲན་མཚོན་ཆ་དང་གོ་མཚོན་བཟོ་རྒྱུའི་མཚོན་པའི་འགྲོ་གྲོན་ཆེན་པོ་གཏོང་གི་ཡོད། དེ་ལྟ་བུའི་བསམ་བློ་གཏོང་སྟངས་ད་ཆ་འགྱུར་བ་ཕྱིན་ཡོད། ད་ཆ་འཛམ་གླིང་མི་མང་གིས་དོན་དམ་གྱི་ཞི་བདེའི་སྐོར་བསམ་བློ་གཏོང་གི་ཡོད། མི་ཚོས་རྒྱལ་ཁབ་སོ་སོའི་ཁེ་ཕན་དེ་རྒྱལ་སྤྱིའི་དཔལ་འབྱོར་དང་འབྲེལ་བ་ཡོད་པ་ངོས་འཛིན་གནང་གི་ཡོད། དེང་སང་དཀའ་རྙོག་སེལ་བར་དམག་འཁྲུག་བརྒྱག་རྒྱུ་དེ་དགོས་མཁོ་ཆགས་མེད། གྲོས་མོལ་བྱེད་རྒྱུ་དེ་དགོས་མཁོ་ཆགས་ཡོད། ངོས་ཀྱི་མི་ཚེའི་རིང་མི་ཚོའི་བསམ་བློ་གཏོང་སྟངས་འགྱུར་བ་ཕྱིན་ཡོད། ང་ཚོས་མི་རབས་གཞོན་སྐྱེས་རྣམས་ལ་སློབ་སྦྱོང་སྤྲོད་དགོས། འཛམ་གླིང་འགྱུར་བ་ཕྱིན་ཡོད། ད་ལྟ་དངོས་ཡོད་གནས་ཚུལ་ལ་ང་ཚོས་ཕན་ཚུན་གཅིག་ཕན་གཅིག་གྲོགས་དང་ཞི་མཐུན་མཉམ་གནས་བྱེད་དགོས། འཛམ་གླིང་སྤྱི་ལ་བསམ་བློ་བཏང་ནས་སྐད་ཆ་བཤད་དགོས། ང་ཚོས་མི་རབས་གསར་པའི་ཕྲུ་གུ་རྣམས་ལ་འདས་ཟིན་པའི་དམག་འཁྲུག་གི་ལོ་རྒྱུས་དང་། གོ་མཚོན་ཡར་རྒྱས་གཏོང་ཕྱོགས་སྐོར་སློབ་ཁྲིད་སྤྲད་རྒྱུའི་ཚབ་ཏུ་ཕྲུ་གུ་རྣམས་ལ་འཛམ་གླིང་འདི་ཉིད་དོན་དམ་གྱི་ཞི་བདེ་ཇི་ལྟར་བསྐྲུན་དགོས་པའི་ཐད་སློབ་སྦྱོང་སྤྲོད་དགོས།

མི་རབས་གསར་པའི་གཞོན་སྐྱེས་རྣམས་ནས་གོ་ལའི་ཚ་དྲོད་དང་རྒྱ་ཆེ་སར་བསམ་བློ་གཏོང་དགོས། ང་ཚོས་གཞོན་སྐྱེས་རྣམས་ལ་འཛམ་གླིང་སྟེང་མི་འབོར་ཐེར་འབུམ་བདུན་ཡོད་པ་ཚང་མ་འགྲོ་བ་མི་གཅིག་གྱུར་ཡིན་པའི་འདུ་ཤེས་འཛིན་སྟངས་དང་གོ་ལའི་ཚ་དྲོད་འཕེལ་བཞིན་པའི་སྐོར་སློབ་སྦྱོང་སྤྲོད་དགོས། ཞེས་སོགས་ཀྱི་བཀའ་སློབ་སྩལ་རྗེས་ཐེངས་འདིའི་བགྲོ་གླིང་གི་མཛད་རིམ་ལ་མཉམ་ཞུགས་གནང་མཁན་རྣམས་ཀྱི་བཀའ་འདྲི་ཁག་ལ་བཀའ་ལན་སྩལ་ཡོད་པ་བཅས།།