༄༅། །ཕྱི་ལོ་ ༢༠༢༡ ཟླ་ ༡༠ ཚེས་ ༢ ཉིན་ཨེལ་སལ་ཝེ་ཌོར་ (El Salvador) རྒྱལ་ཁབ་ནས་ཡིན་པའི་བོད་དོན་རྒྱབ་སྐྱོར་བ་དང་བོད་ཀྱི་གྲོགས་པོ་རྙིང་ཤོས་གྲས་སྐུ་ཞབས་ཨེལ་ཧྥི་རེ་ཌོ་མར་ཊི་ནེ་ཛི་མོ་རེ་ནོ་ (Dr Alfredo Martinez Moreno) མཆོག་དགུང་གྲངས་ ༩༨ ཐོག་སྐུ་ཚེའི་འཕེན་པ་རྫོགས་པའི་ཡིད་སྐྱོ་བའི་གནས་ཚུལ་ཐོན་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ཚེས་ ༤ ཉིན་དམ་པ་དེ་ཉིད་ཀྱི་སྐུ་ཟླ་ལྕམ་སྐུ་ཨ་ལི་ཤ་མར་ཊི་ནེ་ཛི་ (Alicia Martinez) ལགས་ལ་ཐུགས་གསོའི་གསུང་འཕྲིན་སྩལ་བའི་ནང་འཁོད་དོན། ངོས་ཀྱི་གྲོགས་པོ་སྐུ་ཞབས་ཨེལ་ཧྥི་རེ་ཌོ་མར་ཊི་ནེ་ཛི་མོ་རེ་ནོ་ (Dr Alfredo Martinez Moreno) མཆོག་དགུང་གྲངས་ ༩༨ ཐོག་སྐུ་ཚེའི་འཕེན་པ་རྫོགས་པའི་གནས་ཚུལ་གོ་ཐོས་བྱུང་བས་ཧ་ཅང་བློ་ཕམ་བྱུང་།

ངོས་ཀྱིས་སྐུ་ཉིད་ཀྱིས་དབུས་པའི་ནང་མི་ལྷན་རྒྱས་ལ་ཐུགས་གསོ་ཞུ་རྒྱུ་ཡིན། སྐུ་ཉིད་ཀྱིས་མཁྱེན་གསལ་ལྟར་སྐུ་ཉིད་ཀྱི་སྐུ་ཟླ་སྐུ་ཞབས་ཨེལ་ཧྥི་རེ་ཌོ་མར་ཊི་ནེ་ཛི་མོ་རེ་ནོ་མཆོག་ཕྱི་ལོ་ ༡༩༥༠ ཟླ་ ༡༡ ནང་ཨེལ་སལ་ཝེ་ཌོར་རྒྱལ་ཁབ་ཀྱི་སྐུ་ཚབ་ཚོགས་ཆུང་ཞིག་མཉམ་འབྲེལ་རྒྱལ་ཚོགས་སུ་ཕེབས་པའི་ཚོགས་མིའི་ཁོངས་སུ་ཡོད།

ཨེལ་སལ་ཝེ་ཌོར་རྒྱལ་ཁབ་ཀྱིས་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ཐོག་བོད་དུ་ཕྱི་རྒྱལ་གྱི་དམག་ཤུགས་བཙན་འཛུལ་བྱུང་བར་སྐྱོན་བརྗོད་ཀྱིས་བོད་ལ་རྒྱབ་སྐྱོར་གནང་བའི་རྒྱལ་ཁབ་ཆེས་ཐོག་མ་དེ་ཡིན་སྟབས། ང་ཚོས་དུས་རྟག་ཏུ་བཀའ་དྲིན་ཤིན་ཏུ་ཆེ་ཞེས་ཞུ་གི་ཡོད། དེ་སྔ་ངོས་ལ་སྐུ་ཉིད་ཀྱི་སྐུ་ཟླ་མཆོག་དང་ཐེངས་འགའ་མཇལ་འཕྲད་ཞུ་རྒྱུའི་གོ་སྐབས་བྱུང་། ཁོང་གིས་རྒྱུན་དུ་བོད་མིའི་རང་དབང་དང་ཆེ་མཐོང་ལ་ཧ་ཅང་ཉེ་པོ་དང་རྒྱབ་སྐྱོར་གནང་གི་རེད། དོན་དངོས་སུ་ཁོང་གིས་གཞན་དོན་ཆེད་དུ་ཞབས་འདེགས་བསྒྲུབས་ཏེ་མི་ཚེ་དོན་དང་ལྡན་པ་ཞིག་བསྐྱལ་ཡོད་པས། ད་ལྟ་ཁོང་ང་ཚོ་དང་ལྷན་དུ་སྐུ་འཚོ་བཞུགས་སུ་མེད་ནའང་ང་ཚོས་བློ་བདེ་པོ་བྱེད་ཆོག ཐུགས་སྨོན་དང་བཅས། ཞེས་འཁོད་ཡོད།། 

                                              གསུང་འཕྲིན་ངོ་མ་ཨིན་ཡིག་ཐོག་སྩལ་ཡོད་པས་ཚིག་དོན་ལ་ཧེ་བག་ཡོད་ཚེ་ཨིན་ཡིག་ལ་རྩ་འཛིན་ཡོང་བ་ཞུ།།