༄༅། །བཙན་བྱོལ་བོད་མིའི་འོས་བསྡུའི་སྒྲིག་གཞི་དགོངས་དོན་ལྟར། དབུས་འོས་བསྡུ་ལས་ཁང་གི་གཙོ་སྐྱོང་འོག་སྐབས་ ༡༧ པའི་བོད་མི་མང་སྤྱི་འཐུས་ཚོགས་གཙོ་བགྲེས་གཞོན་གྱི་འོས་བསྡུ་གནང་དོན་ལྟར། སྤྱི་འཐུས་མཁན་པོ་བསོད་ནམས་བསྟན་འཕེལ་ལགས་སྐབས་བཅུ་བདུན་པའི་སྤྱི་འཐུས་ཚོགས་གཙོར་བདམས་ཐོན་དང་། སྤྱི་འཐུས་སྒྲོལ་མ་ཚེ་རིང་ལགས་ཚོགས་གཞོན་དུ་བདམས་ཐོན་བྱུང་ཡོད།
དེ་ཡང་ཕྱི་ལོ་ ༢༠༢༡ ཟླ་ ༡༠ ཚེས་ ༨ ཉིན་གྱི་ཕྱེད་ཡོལ་ཆུ་ཚོད་ ༢།༠༠ ཐོག་བཙན་བྱོལ་བོད་མིའི་འོས་བསྡུའི་སྒྲིག་གཞི་དགོངས་དོན་ལྟར། དབུས་འོས་བསྡུ་ལས་ཁང་གི་གཙོ་སྐྱོང་འོག་སྐབས་ ༡༧ པའི་བོད་མི་མང་སྤྱི་འཐུས་ཚོགས་གཙོ་བགྲེས་གཞོན་གྱི་འོས་བསྡུ་གནང་དོན་ལྟར། ཚོགས་གཙོའི་འོས་ཁོངས་ནས་འོས་ཤོག་མང་རིམ་རྩེ་བཏོགས་ཀྱིས་སྤྱི་འཐུས་མཁན་པོ་བསོད་ནམས་བསྟན་འཕེལ་ལགས་ལ་འོས་གྲངས་ ༢༣ དང་། སྤྱི་འཐུས་སྒྲོལ་མ་ཚེ་རིང་ལགས་ལ་འོས་གྲངས་ ༢༢ བཅས་ཐོབ་སྟེ། སྤྱི་འཐུས་མཁན་པོ་བསོད་ནམས་བསྟན་འཕེལ་ལགས་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོར་བདམས་ཐོན་དང་། དེ་རྗེས་མུ་མཐུད་ཚོགས་གཙོ་གཞོན་པ་འོས་འདེམས་ཀྱིས་སྤྱི་འཐུས་སྒྲོལ་མ་ཚེ་རིང་ལགས་ལ་འོས་གྲངས་ ༢༣ དང་། སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས་ལ་འོས་གྲངས་ ༡༨། སྤྱི་འཐུས་དབུ་དཀར་ཚང་གཡུ་སྒྲོན་ལགས་ལ་འོས་གྲངས་ ༢། རྩིས་མེད་ ༢ བཅས་བྱུང་སྟེ། སྤྱི་འཐུས་སྒྲོལ་མ་ཚེ་རིང་ལགས་ཚོགས་གཞོན་དུ་བདམས་ཐོན་བྱུང་བ་བཅས་དབུས་འོས་བསྡུའི་སྤྱི་ཁྱབ་འགན་འཛིན་དཔེ་ཟུར་དབང་འདུས་ཚེ་རིང་མཆོག་གིས་གསལ་བསྒྲགས་གནང་ཡོད་པ་བཅས། །
