༄༅། །སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོ་ཕྱི་ལོ་ ༢༠༢༡ ཟླ་ ༡༠ ཚེས་ ༡༡ ནས་ ༡༢ བར་ཉིན་གྲངས་གཉིས་རིང་གི་ལྷན་ཚོགས་དེ་བོད་མིའི་སྒྲིག་འཛུགས་ཀྱི་བསྟི་གནས་གངས་ཅན་སྐྱིད་གཤོངས་ཀྱི་གྲོས་ཚོགས་ཁང་དུ་དབུ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། ཚོགས་གཞོན་སྒྲོལ་མ་ཚེ་རིང་མཆོག སྲིད་སྐྱོང་སྤེན་པ་ཚེ་རིང་མཆོག ཆོལ་གསུམ་ཆོས་ལུགས་དང་བཅས་པའི་བོད་མི་མང་སྤྱི་འཐུས་རྣམ་པ་བཅས་ཚང་འཛོམས་ཐོག་གྲོས་ཚོགས་ཚོགས་དུས་དང་པོ་དབུ་འཛུགས་ཀྱིས་ཐོག་མར་རྟེན་འབྲེལ་གསོལ་ཇ་དང་། འབྲས་སིལ་ཕུལ་གྲུབ་རྗེས་ཚང་མ་སྐུ་བཞེངས་ཀྱིས་བོད་རྒྱལ་ཁབ་ཆེན་པོའི་རྒྱལ་གླུ་བཏང་སྟེ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གྲོས་ཚོགས་དབུ་འཛུགས་ཀྱི་གསུང་བཤད་གནང་དོན། འཇིག་རྟེན་ཞི་བདེའི་དེད་དཔོན། ཁམས་གསུམ་ཆོས་ཀྱི་རྒྱལ་པོ། བོད་མི་ཡོངས་ཀྱི་མགོན་སྐྱབས་དང་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྒོ་གསུམ་གུས་ཕྱག་སྔོན་དུ་ཕུལ་ནས་དེ་རིང་སྐབས་ ༡༧ པའི་གྲོས་ཚོགས་ཚོགས་ཐེངས་དང་པོའི་ཐོག་ཆིབས་སྒྱུར་གནང་བ་དཔལ་ལྡན་སྲིད་སྐྱོང་མཆོག་དང་། དཔལ་ལྡན་བོད་མི་མང་སྤྱི་འཐུས་ཚོགས་གཞོན་མཆོག་གིས་དབུས་པའི་གྲོས་ཚོགས་ཀྱི་འཐུས་མི་རྣམ་པར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
བཙན་བྱོལ་བོད་མིའི་སྒྲིག་འཛུགས་འདི་ཉིད་ཀྱི་རྩ་འཛིན་ཞུ་རྒྱུའི་བཙན་བྱོལ་བོད་མིའི་བཅའ་ཁྲིམས་ཀྱི་འགན་དབང་བསྐུར་བ་གཙོ་བོ་ནི། བོད་དོན་བདེན་མཐའ་གསལ་ཐབས་དང་བཙན་བྱོལ་གྱི་སྤྱི་ཚོགས་བདེ་དོན་ལ་གཟིགས་སྐྱོང་གནང་རྒྱུ། བོད་ནང་གི་བོད་མིའི་དཀའ་ངལ་སེལ་རྒྱུ། དེ་བཞིན་བོད་ཀྱི་ཁོར་ཡུག་གནས་སྟངས་སོགས་ཀྱི་ཐོག་ང་ཚོའི་བཙན་བྱོལ་སྒྲིག་འཛུགས་དང་གྲོས་ཚོགས་ཀྱི་ལས་དོན་བྱེད་ཕྱོགས་ཡིན་ནའང་འདྲ་དམིགས་ཡུལ་དེ་དག་གི་ཐོག་ནས་འགྲོ་ཐུབ་དགོས་པ་བཅའ་ཁྲིམས་ཀྱི་བསྐུར་བའི་ལས་འགན་གལ་ཆེ་བ་དེ་ཆགས་ཡོད། ཅེས་ཞུ་རྒྱུ་ཡིན།
དེ་བཞིན་སྐབས་ ༡༧ པའི་སྤྱི་འཐུས་གྲོས་ཚོགས་ར་བའི་ནང་དེ་སྔ་གྲོས་ཚོགས་ཀྱི་འཐུས་མི་ཞུ་མ་མྱོང་མཁན་གསར་དུ་ཕེབས་མཁན་བཅོ་བརྒྱད་དང་དེ་སྔོན་གྲོས་ཚོགས་ཀྱི་འཐུས་མི་གནང་མྱོང་བ་དང་བསྐྱར་དུ་སྐབས་ ༡༧ ནང་ཕེབས་པ་ ༢༧ ཆགས་ཡོད། དེར་བརྟེན་རྣམ་པ་ཚོ་དེ་སྔ་གྲོས་ཚོགས་ལ་ཕེབས་མྱོང་མཁན་ཡིན་ནའང་འདྲ་དེ་སྔ་གྲོས་ཚོགས་ལ་ཕེབས་མ་མྱོང་མཁན་ཡིན་ནའང་འདྲ་གང་ལྟར་ང་ཚོའི་སྤྱི་ཚོགས་ནང་ཚང་མས་བོད་བསྟན་སྲིད་སླད་ཕྱག་ལས་གནང་མཁན་ཞེ་གཅིག་ལ་ངོས་འཛིན་ཞུ་གི་ཡོད།
ནང་པ་སངས་རྒྱས་པའི་ཆོས་ཕྱོགས་ནས་ཞུ་པ་ཡིན་ན། ལས་དང་སྨོན་ལམ་གྱིས་འབྲེལ་བ་ཡོད་པའི་ཆ་ནས་མཉམ་དུ་ཕྱག་ལས་གནང་རྒྱུའི་གོ་སྐབས་བྱུང་བ་རེད། ཕྱོགས་གཅིག་ནས་བསམ་བློ་བཏང་བ་ཡིན་ན། བོད་མི་ས་ཡ་དྲུག་ཟེར་ནའང་མི་འདུག་གང་ལྟར་བོད་མིའི་ལས་དབང་གི་ཐོག་ནས་ང་ཚོ་མཉམ་དུ་འཛོམས་དགོས་པའི་ལས་དོན་གཅིག་གི་ཐོག་ལ་མཉམ་དུ་འཛོམས་ནས་ནུས་པ་འདོན་དགོས་པའི་དུས་ཚོད་ཅིག་ཆགས་ཡོད། དེ་དག་ལ་ཚང་མའི་ཐུགས་ལ་བཅངས་ནས་སྤྱི་པའི་ལས་དོན་ཐོག་ནུས་པ་མཉམ་སྤུངས་གནང་ཐུབ་དགོས་རྒྱུ་གལ་ཆེན་པོའི་ནང་ནས་ཆེན་པོ་རྩི་བཞིན་ཡོད། དེ་དག་ཐུགས་ལ་བཅངས་རོགས་གནང་ཞུ་རྒྱུ་ཡིན།
དེ་རིང་གྲོས་ཚོགས་ཚོགས་དུས་དང་པོའི་ལས་རིམ་ནང་མྱ་ངན་གུས་འདུད་ཀྱི་གྲོས་ཆོད་བརྒྱད་ཡོད་པའི་ནང་ནས་མང་བ་དེ་སྔོན་བོད་དོན་ཐོག་ཁ་ཞེ་གཉིས་མེད་ཀྱི་ཐོག་ནས་རྒྱབ་སྐྱོར་གནང་མྱོང་མཁན་ཤ་སྟག་ཅིག་དང་། དེ་བཞིན་སྤྱི་ཟུར་འདས་པ་གཉིས་ཡོད། དེ་རྗེས་གདུང་སེམས་མཉམ་སྐྱེའི་གྲོས་ཆོད་ཅིག་ཕེབས་ཀྱི་ཡོད་པ་རེད། གདུང་སེམས་མཉམ་སྐྱེའི་གྲོས་ཆོད་ཀྱི་ཐོག་ནས་འཛམ་གླིང་གི་ཆབ་སྲིད་གནས་སྟངས་ལ་འགྱུར་བ་ཤུགས་ཆེན་པོ་འགྲོ་བཞིན་ཡོད། དེ་བཞིན་རྒྱ་ནག་གི་ཆབ་སྲིད་གནས་བབ་ལ་འགྱུར་བ་འགྲོ་བཞིན་ཡོད། རྒྱ་ནག་གི་ཆབ་སྲིད་གནས་བབ་ལ་འགྱུར་བ་འགྲོ་བ་དང་མཉམ་དུ་བོད་ནང་གི་དཔལ་འབྱོར་དང་རིག་གཞུང་། ཆབ་སྲིད། ཆོས། ཁོར་ཡུག་སོགས་གང་ཅིའི་ཐད་རང་བཞིན་གྱིས་འགྱུར་བ་འགྲོ་བཞིན་པ་ནི་ཆོས་ཉིད་རེད། དེ་ཚོའི་ཐོག་དེ་རིང་བསམ་ཚུལ་སྤུང་རྒྱུ་དང་། མ་འོངས་པར་ནུས་པ་མཉམ་སྤུངས་ཀྱིས་ལས་འགུལ་དང་། འབོད་སྐུལ། ཞུ་གཏུག་བྱེད་རྒྱུ་སོགས་ཇི་ལྟར་དགོས་མིན་ཐད་གདུང་སེམས་མཉམ་སྐྱེའི་གྲོས་ཆོད་ཀྱི་ཐོག་ནས་དགོངས་ཚུལ་གསུང་རྒྱུའི་གོ་སྐབས་ཡོད་པ་རེད། ཅེས་ཞུ་རྒྱུ་ཡིན།
དེ་བཞིན་འཛིན་སྐྱོང་བཀའ་ཤག་ཡིན་ནའང་དཔལ་ལྡན་སྲིད་སྐྱོང་མཆོག་གིས་དབུ་ཁྲིད་པའི་འཛིན་སྐྱོང་བཀའ་ཤག་ལྷན་རྒྱས་ཡོད་མ་རེད་དེ། གང་ལྟར་བཀའ་ཤག་གསར་པ་ཕེབས་ཡོད་པ་རེད། བཀའ་ཤག་གི་གསལ་བཤད་ཅིག་ཡོད་གསུང་གི་འདུག གསལ་བཤད་དེ་ཡིག་ཐོག་ཕེབས་ཡོད་པ་དང་། ལས་རིམ་ནང་བཅུག་ཡོད་པར་བརྟེན་དེའི་ཐོག་བགྲོ་གླེང་དང་ཆ་ཤས་ལེན་མཁན་ཡོད་ན། གོ་སྐབས་འབུལ་རྒྱུའི་གྲ་སྒྲིག་ཡོད།
དེ་རྗེས་ཆེས་མཐོ་ཁྲིམས་ཞིབ་ཁང་གི་ཁྲིམས་ཞིབ་པའི་འོས་ཆོས་དང་འབྲེལ་བའི་བཅའ་ཁྲིམས་བསྐྱར་བཅོས་སླེབ་ཀྱི་ཡོད། དེ་ཡང་གནད་འགག་ཅིག་ལ་བརྩིས་ནས་སྲིད་སྐྱོང་མཆོག་ཚོགས་གཙོའི་ལས་ཁུངས་སུ་ཕེབས་ནས་དེ་སྔ་ལས་དོན་གནང་བ་དང་གནང་རྒྱུ་བསྡད་པ། གནང་བཞིན་པ་དེ་ཚོའི་གྲས་གསུངས་པ་དང་མཉམ་དུ་བཅའ་ཁྲིམས་བསྐྱར་བཅོས་འདི་གལ་ཆེན་པོ་ཞིག་ཆགས་ཀྱི་འདུག ད་ཆ་འཛིན་སྐྱོང་གི་ངོས་ནས་རྒྱབ་སྐྱོར་གནང་མཁན་མ་འདང་བའི་ཆ་ནས་རྒྱུན་ལས་ལ་འཁྱེར་རོགས་ཞེས་གསུངས་པ་ནང་ལྟར། ཁ་སང་རྒྱུན་ལས་ནང་གོ་བསྡུར་གནང་བའི་སྐབས་མང་མོས་ཐོག་འཁུར་རྒྱུ་ཆགས་ཡོད།
དེ་བཞིན་གལ་ཆེ་བ་ཞིག་ནི། དཔལ་ལྡན་སྲིད་སྐྱོང་མཆོག་གི་ཕྱག་རོགས་བཀའ་བློན་འོས་འདེམས་ཞུ་རྒྱུའི་ལས་རིམ་དེ་རིང་གྲོས་ཚོགས་འདིའི་ནང་སླེབ་ཀྱི་ཡོད་པ་རེད། ཚང་མས་རྣམ་དཔྱོད་བསྟན་ནས་བཀའ་བློན་བདམས་ཐོན་ཞུ་ཐུབ་དགོས་པ་དང་། རང་ཉིད་ཀྱི་རྣམ་དཔྱོད་ལ་དཔགས་པའི་ཆ་ཤས་བཞེས་དགོས་རྒྱུ་གལ་ཆེན་པོ་ཆགས་ཀྱི་ཡོད་པ་རེད། ཅེས་ཞུ་རྒྱུ་ཡིན།
གལ་ཆེ་ཤོས་གཅིག་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་ཞུ་རྒྱུའི་གྲོས་ཆོད་ཅིག་བསྣམས་ཕེབས་ཡོད། རྣམ་པ་ཚོ་ཚང་མས་མཁྱེན་གསལ་རེད། བར་ལམ་ང་ཚོའི་སྤྱི་ཚོགས་ནང་གནས་སྟངས་དང་ང་ཚོའི་སྒྲིག་འཛུགས་ཀྱི་གནས་སྟངས་སོགས་གང་ཅིའི་ཐོག་དཀའ་ངལ་ཆེ་ཆུང་སྣ་ཚོགས་འཕྲད་དེ་གྲོས་ཚོགས་ཚོགས་མ་ཐུབ་པར་ཟླ་བ་བཞི་ཙམ་ལྷག་པ་རེད། དེར་བརྟེན་བདམས་ཐོན་གྲོས་ཚོགས་འཐུས་མི་ནང་ཁུལ་ལྷན་འཛོམས་གནང་སྟེ་ཚང་མས་ལྷག་བསམ་རྣམ་དག་གིས་ནུས་པ་བཏོན་པ་རེད། འོན་ཀྱང་ཚང་མ་གཅིག་གྱུར་གྱིས་བློ་མཉམ་པ་མ་རག་སྟབས། ཕལ་སྐད་ལྟ་བུར་ཞུས་པ་ཡིན་ན། འུ་ཐུག་ཐབས་ཟད་ལྟ་བུའི་གནས་སྟངས་ཆགས་ནས་བཅའ་ཁྲིམས་དོན་ཚན་དང་པོའི་དགོངས་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཛད་དཀའ་མ་ཞུ་དཀའ་མེད་ཀྱི་གནས་སྟངས་ཆགས་པ་རེད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཚན་འཁོད་སྙན་ཞུའི་ཐོག་ནས་སྙན་གསེང་ཞུས་ནས་དེ་རྗེས་བཀའ་ཡིག་རིན་པོ་ཆེ་གནང་བ་གཞིར་བཟུང་གྲོས་ཚོགས་འདི་རྒྱུན་ལྡན་ནང་བཞིན་འགྲོ་ཐུབ་པའི་གནས་སྟངས་ཆགས་ཡོད། དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་ཉག་གཅིག་ལ་བརྟེན་ནས་བྱུང་བ་ཡིན་སྟབས། བཀའ་དྲིན་རྗེས་དྲན་གྱི་གྲོས་ཆོད་ཅིག་དང་། དེ་དང་འགྲེལ་ནས་བར་ལམ་གྱི་གནས་སྟངས་ཐོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཐུགས་དམ་སད་རྐྱེན་དེ་འདྲ་བྱུང་བ་བཀའ་ཡིག་ནང་གསལ་ཡོད། དེ་ཚོའི་ཐོག་ནས་ང་ཚོས་མཐོལ་བཤགས་ཞུ་རྒྱུ་དང་རྒྱ་ཆེ་མང་ཚོགས་ལ་ཡིན་ནའང་བཟོད་གསོལ་ཞུ་རྒྱུ། མ་འོངས་ལས་དོན་ཐོག་ནུས་པ་མཉམ་སྤུངས་ཡོང་ཐུབ་པར་ཚང་མས་ཕྱར་གྲུ་མཉམ་འདེགས་ཞུ་ཐུབ་པར་ལས་ཀྱི་སྣེ་མོ་བས་གཙོས་རྒྱ་ཆེ་མང་ཚོགས་དང་བཅས་པའི་འགན་འཁུར་བཞེས་དགོས་པའི་གནས་སྟངས་ཆགས་ཡོད་པར་བརྟེན་གྲོས་ཆོད་འདི་གལ་ཆེན་པོ་ཞིག་རྩི་བཞིན་ཡོད། ཅེས་གྲོས་ཚོགས་ཚོགས་དུས་དང་པོའི་ལས་རིམ་གལ་ཆེ་བ་འདི་ཚོའི་གྲས་ཡིན། ཞེས་རྣམ་པ་ཚོར་སྙན་གསེང་ཞུ་རྒྱུ་ཡིན།
དེ་བཞིན་རྣམ་པ་ཚོས་མཁྱེན་གྱི་རེད། ང་ཚོའི་གྲོས་ཚོགས་འགྲོ་སྟངས་འདི་ཕྱོགས་འགལ་ཚོགས་པ་དང་གཞུང་འཛིན་ཚོགས་པའི་རྣམ་པ་གང་ཡང་མེད། ཡོང་ཁུངས་མི་འདྲ་བའི་ཐོག་ནས་དཀྱིལ་འཁོར་འདིའི་ནང་སླེབ་ནས་དམ་བཅའ་ཕུལ་བ་ནས་བཟུང་སྤྱི་མི་ཞིག་ཆགས་ཀྱི་ཡོད། སྐབས་རེ་གྲོས་ཚོགས་ནང་གཞུང་འཛིན་དང་ཕྱོགས་འགལ་གྱི་རྣམ་པ་ཐོན་པ་དེ་འདྲ་ཡོང་གི་འདུག དེ་ཚོའི་གྲས་ལ་ཐུགས་གཟབ་གནང་ཐུབ་པ་དགོས་རྒྱུ་གལ་ཆེན་པོ་རེད། ལེགས་ཉེས་ཀྱི་རྣམ་དཔྱོད་རྩལ་དུ་བཏོན་ནས་ལེགས་པའི་ཆ་གང་ཡིན་ནའང་འཛིན་སྐྱོང་གིས་གནང་བ་ཡིན་ནའང་འདྲ་གྲོས་ཚོགས་ཀྱིས་གནང་བ་ཡིན་ནའང་འདྲ་དེ་ལ་རྒྱབ་སྐྱོར་གནང་ཐུབ་དགོས་རྒྱུ། ཉེས་པའི་ཆ་འཛིན་སྐྱོང་གིས་གནང་བ་ཡིན་ནའང་དེ་ལ་ལམ་སྟོན་དང་བྱ་ར་སྟངས་འཛིན་གནང་ཐུབ་དགོས་རྒྱུ། དེ་བཞིན་གྲོས་ཚོགས་ནས་ཡོང་བ་ཡིན་ནའང་དེ་ལ་གྲོས་ཚོགས་ནས་སྐྱོན་སེལ་དང་ལེགས་བཅོས་བྱེད་ཐུབ་དགོས་རྒྱུ་ང་ཚོའི་ལས་འགན་གལ་ཆེན་པོ་ཞིག་ཆགས་བཞིན་ཡོད། རྣམ་པ་ཚོས་དེ་དག་དགོངས་པར་བཅངས་དགོས་རྒྱུའི་གནད་དོན་ཞིག་ཆགས་ཀྱི་འདུག་ཅེས་ཞུ་རྒྱུ་ཡིན།
གྲོས་ཚོགས་ནང་ལས་རིམ་མི་འདྲ་བ་མང་པོ་ཞིག་སླེབ་ཡོང་གི་ཡོད། གཞུང་འབྲེལ་ལས་རིམ་སླེབ་ཡོང་གི་ཡོད། གྲོས་ཚོགས་ཀྱི་གཞུང་འབྲེལ་ལས་རིམ་སླེབ་ཡོང་གི་ཡོད། འཛིན་སྐྱོང་གི་གཞུང་འབྲེལ་ལས་རིམ་སླེབ་ཡོང་གི་ཡོད། སྤྱི་འཐུས་སྒེར་གྱི་ཐོག་ནས་ལས་རིམ་དེ་འདྲ་སླེབ་ཡོང་གི་ཡོད། ལས་རིམ་སླེབ་ཡོང་བའི་སྐབས་སུ་བསམ་ཚུལ་གཅིག་གྱུར་མི་ཡོང་བ་གསལ་པོ་རེད། བསམ་ཚུལ་མི་འདྲ་བ་ཡོང་གི་རེད། བསམ་ཚུལ་མི་འདྲ་བ་ཡོང་བ་ཡིན་ནའང་བསམ་ཚུལ་ལ་གུས་ཞབས་དང་སོ་སོའི་དགོས་དོན་གང་ཡིན་པ་གསལ་པོ་བཏོན་ཐུབ་པ་མ་གཏོགས་ཕན་ཚུན་ཚིག་རྒྱག་ཞུས་པ་ལྟ་བུ་དང་། སྐྱོན་འཛུགས་རིགས་ཤུགས་ཆེན་པོ་མི་ཡོང་བ་གཙོ་འདོན་གནང་རོགས་ཞུ་རྒྱུ་ཡིན།
གང་ལྟར་བསམ་ཚུལ་མི་འདྲ་བ་ཡོང་ཆོག་པ་གང་ཞིག་ལ་ཐག་གཅོད་སྤྱི་མོས་དང་མང་མོས་གང་ཡིན་ནའང་དེའི་ཐོག་འགྲོ་བཞིན་ཡོད། དེར་དགོངས་པ་བཞེས་ཏེ་སོ་སོའི་བསམ་ཚུལ་སྤུངས་ཐུབ་དགོས་རྒྱུ་དེ་གནད་འགག་ཆགས་ཀྱི་འདུག བོད་མི་ས་ཡ་དྲུག་གི་རྩ་དོན་འཐབ་རྩོད་ལ་ཚང་མས་ནུས་པ་གཅིག་སྒྲིལ་དང་། དེ་བཞིན་ཚང་མས་ཕྱར་གྲུ་མཉམ་འདེགས་ཞུ་ཐུབ་དགོས་པའི་གནས་སྟངས་ཆགས་ཡོད། དེ་ལྟར་ཡོང་བ་ཡིན་ན་བོད་སྤྱི་མཐུན་གྱི་བསོད་ནམས་གོང་མཐོར་འགྲོ་ཐུབ་པ། བོད་མི་གཅིག་སྒྲིལ་གྱི་ནུས་པ་ཡིན་ནའང་ཤུགས་ཆེ་རུ་འགྲོ་ཐུབ་པ། དེ་བཞིན་བོད་ཀྱི་ཆོས་དང་སྐད་ཡིག རིག་གཞུང་གི་རིན་ཐང་ཡིན་ནའང་རྒྱལ་སྤྱིའི་ནང་དང་བཙན་བྱོལ་སྤྱི་ཚོགས་ནང་དུ་ཡིན་ནའང་འདྲ་རིན་ཐང་ཆེ་རུ་འགྲོ་རྒྱུ། དེ་ལ་བརྟེན་ནས་བོད་ཀྱི་རྩ་དོན་འཐབ་རྩོད་དེ་ཡང་སྔར་ལྷག་ནུས་པ་འབུར་དུ་ཐོན་པ་ཡོང་ཐུབ་པའི་རེ་བ་དང་ཡིད་ཆེས་བྱེད་ཆོག་པའི་གནས་སྟངས་ཆགས་ཡོད། དེར་བརྟེན་གྲོས་ཚོགས་ཀྱི་འཐུས་མི་ཡོངས་དང་རིམ་བཞིན་འཛིན་སྐྱོང་བཀའ་ཤག་ཕེབས་ཡོང་གི་ཡོད་པ་དེ་འདྲའི་ཐོག་ནས་དགོངས་པ་བཞེས་ཏེ་ང་ཚོས་ལས་དོན་གནང་ཕྱོགས་དེ་ལྟར་གནང་རོགས་ཞེས་ཚོགས་གཙོའི་དབུ་འབྱེད་གཏམ་བཤད་དང་འབྲེལ་ནས་འབོད་སྐུལ་ཞུ་རྒྱུ་ཡིན། ཞེས་གསུང་བཤད་གནང་རྗེས་སྤྱི་འཐུས་ཚོགས་གཙོ་མཆོག་གིས་ཚོགས་གཙོ་ལས་ཚབ་དང་ལས་རིམ་ཚོགས་ཆུང་གི་ཚོགས་མི་བསྐོ་གཞག་གནང་སྟེ་མཚན་ཐོ་སྒྲོགས་སྦྱང་གནང་། དེ་ནས་དཔལ་ལྡན་སྲིད་སྐྱོང་མཆོག་གིས་བཀའ་ཤག་གི་དགའ་བསུའི་འཚམས་འདྲིའི་གསུང་བཤད་གནང་ཡོད་པ་བཅས། །
