༄༅། །ཕྱི་ལོ་ ༢༠༢༡ ཟླ་ ༥ ནང་སི་ཀོ་ཊི་ལེན་ཌིའི་གྲོས་ཚོགས་འཐུས་མི་འོས་འདེམས་གྲུབ་རྗེས་ཕྱི་ཟླ་ ༡༠ ཚེས་ ༨ ཉིན་སི་ཀོ་ཊི་ལེན་ཌིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམ་པས་(The Cross -Party Group on Tibet) ཚོགས་འདུ་ཚོགས་ཏེ་སི་ཀོ་ཊི་ལེན་ཌིའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་བསྐྱར་བཟོ་གནང་ཡོད།

དེ་ཡང་སི་ཀོ་ཊི་ལེན་ཌིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམ་པས་སི་ཀོ་ཊི་ལེན་ཌིའི་ལྗང་ཁུ་ཆབ་སྲིད་ཚོགས་པ་ནས་ཡིན་པའི་གྲོས་ཚོགས་འཐུས་མི་རོ་སི་གྷི་རིར་ (Ross Greer) ལགས་དང་ངལ་རྩོལ་ཆབ་སྲིད་ཚོགས་པའི་གྲོས་ཚོགས་འཐུས་མི་མེར་སི་ཌེ་སི་ཝི་ལ་བྷ་ (Mercedes Villalba) ལགས་རྣམ་གཉིས་སི་ཀོ་ཊི་ལེན་ཌིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་པ་དང་། གྲོས་ཚོགས་འཐུས་མི་ཨེ་ལེ་ནོར་རོ་སན་གྷི་རན་ (Eleanor Byrne-Rosengren) ལགས་དྲུང་ཆེ། གྲོས་ཚོགས་འཐུས་མི་ཨེ་མེ་སི་(Roger Eames) ལགས་དངུལ་གཉེར་དུ་བདམས་ཡོད།

བོད་གནས་ལྟ་ཞིབ་ཁང་གི་ལས་བྱེད་བསྟན་འཛིན་ཆོས་སྐྱིད་ལགས་དང་བོད་རང་དབང་ལས་འགུལ་ཚོགས་པའི་ (Free Tibet) ལས་བྱེད་ཇོན་ (John Jones) ལགས་ཀྱིས་སི་ཀོ་ཊི་ལེན་ཌིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ལ་བོད་ནང་གི་གནས་སྟངས་སྤྱི་དང་། ལས་འགུལ་སྤེལ་ཕྱོགས་ཀྱི་འཆར་གཞི་སྐོར་ངོ་སྤྲོད་གསུང་བཤད་གནང་ཡོད། ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་དང་དྲུང་ཆེ་ཚེ་རིང་མཚོ་མོ་ལགས་ཚོགས་འདུར་མཉམ་ཞུགས་ཀྱིས་སི་ཀོ་ཊི་ལེན་ཌིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ལ་ཐུགས་རྗེ་ཆེ་ཞུས་ཡོད།

ཐེངས་འདིའི་སི་ཀོ་ཊི་ལེན་ཌིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་འདུ་དོན་ཕན་ལྡན་པ་བྱུང་ཡོད་པ་བཅས།།