༄༅། །ཕྱི་ལོ་ ༢༠༢༡ ཟླ་ ༩ ཚེས ༢༧ ནས་ ༢༩ བར་ཉིན་གྲངས་གསུམ་རིང་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས་སློབ་ཚན་ཁྲིད་ཐབས་དང་འབྲེལ་བའི་ཐབས་བྱུས་ནང་གསར་བཏོད་དང་རྣམ་དཔྱོད་རིག་རྩལ་ (Higher Order Thinking Skills) གོང་མཐོར་གཏོང་ཐབས་ཀྱི་དྲྭ་ཐོག་བགྲོ་གླེང་ཞིག་བསྐོང་ཚོགས་གནང་ཡོད་པ་དང་། དྲྭ་ཐོག་བགྲོ་གླེང་ནང་རྒྱ་གར་ལྷོ་ཕྱོགས་ཁུལ་གྱི་བཙན་བྱོལ་བོད་མིའི་སློབ་གྲྭ་ཁག་བཅུ་ནས་ཁྱོན་དགེ་རྒན་གྲངས་ ༦༨ མཉམ་ཞུགས་གནང་ཡོད།


དེ་ཡང་ཉིན་གྲངས་གསུམ་རིང་གི་དྲྭ་ཐོག་བགྲོ་གླེང་སྐབས་བོད་ཀྱི་ཐེབས་རྩའི་ཤེས་ཡོན་འབྲེལ་མཐུད་པ་འཇམ་དབྱངས་རྒྱལ་མཚན་ལགས་དང་ཤེས་ཡོན་ཆེད་མཁས་པ་སྐལ་བཟང་དབང་འདུས་ལགས་རྣམ་གཉིས་ཀྱིས་ཟབ་ཁྲིད་གནང་ཡོད། ཟབ་སྦྱོང་སྐབས་དགེ་རྒན་རྣམས་སྡེ་ཚན་གསུམ་དུ་ཆ་བགོས་ཀྱིས་ཉིན་རེར་ཚོགས་ཐུན་གཉིས་རེ་བྱས་ཏེ་ཚོགས་ཐུན་རེར་ཆུ་ཚོད་གཅིག་དང་ཕྱེད་ཀ་རིང་ཤེས་ཡོན་གྱི་དགོས་དམིགས་སྐོར་དང་། དེ་བཞིན་སློབ་ཚན་ཁྲིད་ཐབས་དང་འབྲེལ་བའི་ཐབས་བྱུས་ནང་གསར་བཏོད་དང་རྣམ་དཔྱོད་རིག་རྩལ་གོང་མཐོར་གཏོང་ཐབས་སྐོར་གོ་བསྡུར་དང་། བགྲོ་གླེང་། དྲི་བ་དྲིས་ལན་བཅས་གནང་ཡོད། 

ཐེངས་འདིའི་དྲྭ་ཐོག་བགྲོ་གླེང་ཐད་ཨ་རིའི་རོགས་ཚོགས་ (USAID) ནས་མཐུན་འགྱུར་གནང་ཡོད་པ་བཅས། །