༄༅། །ཕྱི་ལོ་ ༢༠༢༡ ཟླ་ ༨ ཚེས་ ༢༢ ནས་བཟུང་རྒྱ་ནག་གཞུང་གིས་རྫ་དབོན་པོའི་སྡེ་དགོན་གཉིས་སུ་དམག་མི་འབོར་ཆེན་བཏང་སྟེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་སྒྲིག་གཤོམ་བྱས་པ་དང་བཙན་བྱོལ་དུ་ཡོད་པའི་བོད་མི་དང་འབྲེལ་བ་བྱས་པའི་ཉེས་མིང་འོག་སེར་སྐྱ་གྲངས་ ༡༢༡ ཙམ་འཛིན་བཟུང་བྱས་ཏེ་སེར་ཤུལ་རྫོང་དུ་བཙན་ཁྲིད་བྱས་པའི་ཁོངས་ནས་རྫ་དབོན་པོ་དགོན་གྱི་དགེ་འདུན་པ་གསུམ་མ་གཏོགས་གཞན་ཚང་མ་ཀློད་གྲོལ་བཏང་ཡོད།
དེ་ཡང་འཛིན་བཟུང་བཀག་ཉར་རིང་བཟའ་བཏུང་གི་མཐུན་རྐྱེན་ཞན་པ་མ་ཟད། ཉིན་ལྟར་གང་བྱུང་གཅར་རྡུང་བཏང་བ་དང་། སློབ་གསོའི་ལས་རིམ་ཤུགས་ཆེ་སྤེལ་ཏེ་རྒྱལ་ཁབ་ལ་དགའ་ཞེན་དགོས་པ་དང་རྒྱ་ནག་གཞུང་གི་སྲིད་བྱུས་ཐོག་ཤར་བསྐྱོད་དགོས་པ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་སྒྲིག་གཤོམ་དང་བཙན་བྱོལ་དུ་ཡོད་པའི་བོད་མི་དང་འབྲེལ་འདྲིས་བྱེད་མི་ཆོག་པ་སོགས་ཀྱི་ཆབ་སྲིད་སློབ་གསོ་སྤེལ་ཡོད། དེ་བཞིན་ཉེན་རྟོག་པས་ཁ་པར་སྔོག་བཤེར་དང་། སྤུན་ཉེ་འབྲེལ་སོགས་ལ་འདྲི་རྩད་ཀྱིས་བསུན་གཙེར་བཟོས་པ། བཀག་ཉར་འོག་དམག་གི་སྦྱོར་བརྡར་སྤྲད་པ་སོགས་ཀྱི་གནད་དོན་འོག་མི་སྤྱོད་ལས་འདས་པའི་རྡུང་རྡེག་བཏང་ཡོད།
ད་ལྟ་མུ་མཐུད་འཛིན་བཟུང་བཀག་ཉར་འོག་ཡོད་པའི་དགེ་འདུན་པ་གསུམ་ནི། ཉེ་སྔོན་ཕྱི་ལོ་ ༢༠༢༡ ཟླ་ ༩ ཚེས་ ༣ ཉིན་རྒྱ་ནག་ཉེན་རྟོག་པས་རྫ་སྨད་དབོན་པོ་དགོན་པ་དགའ་ལྡན་མདོ་སྔགས་བཤད་སྒྲུབ་དར་རྒྱས་གླིང་གི་དགེ་འདུན་པ་ ༦ འཛིན་བཟུང་བཙན་ཁྲིད་བྱས་པའི་ཁོངས་ནས་ཡིན།
དེ་བཞིན་རྒྱ་ནག་གཞུང་གིས་ས་གནས་བོད་མི་མང་ཚོགས་ལ་སློབ་གསོའི་ལས་འགུལ་སྤེལ་བའི་ནང་ཀྲུང་གོ་གུང་ཁྲན་ཏང་ལ་ཤ་ཞེན་དགོས་པ་དང་། ཏང་གི་བཀའ་དྲིན་དྲན་དགོས་པ། ཁ་བྲལ་གྱི་ལས་འགུལ་སྤེལ་རྒྱུ་མིན་པ། ༧གོང་ས་མཆོག་གི་སྐུ་པར་བདག་ཉར་མི་བྱེད་པ། སྐད་འཕྲིན་དང་དྲ་རྒྱ་སོགས་བརྒྱུད་ཚོགས་པ་འཛུགས་མི་ཆོག་བཟོས་པ་དང་། གལ་ཏེ་ཚོགས་པ་ངེས་པར་དུ་འཛུགས་དགོས་ཚེ་ས་གནས་ཀྱི་འགོ་འཁྲིད་དང་ལས་བྱེད་ཅིག་ཚོགས་པའི་ནང་ཡོད་དགོས་པའི་ཆ་རྐྱེན་བཟོས་ཡོད་པར་བརྟེན། ཕ་སྐད་སྲུང་སྐྱོབ་ཚོགས་པ་དང་སྐད་ཡིག་ཞབས་ཞུ་ཚོགས་པ། ཁོར་ཡུག་སྲུང་སྐྱོབ་ཚོགས་པ་སོགས་གལ་གནད་ཆེ་བའི་ཚོགས་པ་ཁག་ཡོངས་རྫོགས་སྒོ་བརྒྱབ་དགོས་པའི་གནས་སྟངས་ཆགས་ཀྱི་ཡོད།
དེ་སྔ་རྒྱ་གཞུང་གིས་ལོ་ན་ ༡༨ མན་གྱི་བོད་མི་རྣམས་དགོན་པར་ཞུགས་མི་ཆོག་པའི་བཙན་བཀའ་བཏང་ཡོད་པ་ལྟར། ད་ལྟའི་ཆར་རྒྱ་གཞུང་གིས་བཙན་བཀའ་དེ་སྔར་ལྷག་ལག་བསྟར་ཤུགས་ཆེ་བྱས་ཏེ་ཕ་མའི་ངོས་ནས་སོ་སོའི་ཕྲུ་གུ་ལོ་ ༡༨ མ་ལོན་པར་དགོན་པར་གཞག་རྒྱུ་མིན་པའི་ཁས་ལེན་དམ་བཅའ་འཇོག་དགོས་པ་མ་ཟད་། ས་རྟགས་ཀྱང་འགོད་དགོས་ཀྱི་ཡོད། །
