༄༅། །རྒྱལ་སྤྱིའི་ཁྲིམས་ལུགས་སློབ་དཔོན་སྐུ་ཞབས་མེ་ཀལ་ཝན་ལྦལ་ཊ་པཱ་རག་ (Dr. Michael  van Walt van Praag) མཆོག་ཡུ་རོབ་ཀྱི་རྒྱལ་ཁབ་ཁག་ལ་བོད་དོན་སྐོར་སྐྱོད་ཀྱི་ལས་འགུལ་སྤེལ་བཞིན་ཡོད་པ་ལྟར། ཕྱི་ལོ་ ༢༠༢༡ ཟླ་ ༡༠ ཚེས་ ༤ ཉིན་སྐུ་ཞབས་མེ་ཀལ་ཝན་ལྦལ་ཊ་པཱ་རག་མཆོག་ཕ་རཱན་སིའི་རྒྱལ་ས་པེ་རེ་སིར་ཕེབས་འབྱོར་གྱིས་ས་གནས་བོད་དོན་རྒྱབ་སྐྱོར་ཚོགས་པ་ཁག་གི་སྐུ་ཚབ་དང་ཐུག་འཕྲད་གནང་ཡོད།

དེ་ཡང་ཕྱི་ཚེས་ ༤ ཉིན་གྱི་སྔ་དྲོར་སྐུ་ཞབས་མེ་ཀལ་ཝན་ལྦལ་ཊ་པཱ་རག་མཆོག་གིས་ས་གནས་བོད་དོན་རྒྱབ་སྐྱོར་ཚོགས་པ་ཁག་གི་སྐུ་ཚབ་རྣམས་དང་ཐུག་འཕྲད་གནང་ཡོད་པ་མ་ཟད། ཉིན་རྒྱབ་ཕ་རཱན་སིའི་རྒྱལ་སྤྱིའི་བརྙན་འཕྲིན་ལྔ་པ་ (TV5) ཞེས་པའི་གསར་འགོད་པའི་བཅར་འདྲི་དང་ལེན་དང་། དགོང་དྲོ་བོད་རིགས་ཚོགས་པ་ཁག་གི་སྐུ་ཚབ་དང་ཐུག་འཕྲད་གནང་ཡོད།
ཕ་རཱན་སིའི་རྒྱལ་སྤྱིའི་བརྙན་འཕྲིན་ལྔ་པའི་གསར་འགོད་པའི་བཅར་འདྲི་སྐབས་སྐུ་ཞབས་མེ་ཀལ་ཝན་ལྦལ་ཊ་པཱ་རག་མཆོག་གིས་སྔ་མོ་བོད་ནི་སྐབས་རེར་ཕྱིའི་སྟོབས་ཤུགས་ཀྱི་ཤུགས་རྐྱེན་འོག་ཚུད་མྱོང་ཡོད་ཀྱང་རྒྱ་ནག་གི་ཆ་ཤས་སུ་ནམ་ཡང་ཆགས་མྱོང་མེད་ལ། བོད་ཀྱིས་རང་གི་ཉེ་ཤོས་ཀྱི་ཁྱིམ་མཚེས་རྒྱལ་ཁབ་དང་ནང་པའི་རྒྱལ་ཁབ་ཚོ་མ་གཏོགས་ཕྱིའི་རྒྱལ་ཁབ་ཁག་ལ་ནམ་ཡང་གཞུང་འབྲེལ་གྱི་འབྲེལ་བ་བཙུགས་མྱོང་མེད། ཅེས་གསུངས།གཞན་ཡང་ཁོང་གིས་བོད་ཀྱི་གནད་དོན་ནི་ས་བབ་ཆབ་སྲིད་ཀྱི་ཆ་ནས་ཧ་ཅང་གནད་འགག་ཆེན་པོ་ཆགས་ཡོད་པ་མ་ཟད། ལྷག་པར་ད་ལྟའི་རྒྱ་ནག་གི་གནས་སྟངས་ལ་མཚོན་ན་ཧ་ཅང་གནད་འགག་ཆེན་པོ་ཆགས་ཡོད། དེ་སྔ་རྒྱ་ནག་གིས་ཧོང་ཀོང་ལ་རང་སྐྱོང་གི་གནས་བབ་སྤྲོད་རྒྱུའི་ཁས་ལེན་བྱས་ཡོད། འོན་ཀྱང་ཧོང་ཀོང་རྩིས་བླངས་རྗེས་རྒྱ་ནག་གིས་དེ་སྔ་ཧོང་ཀོང་ལ་རང་སྐྱོང་གི་གནས་བབ་སྤྲོད་རྒྱུའི་ཁས་ལེན་བྱས་པ་དེ་རྩིས་མེད་དུ་བཏང་ཡོད། ད་ལྟ་འཛམ་བུ་གླིང་མི་མང་གིས་རྒྱ་ནག་གིས་ཧོང་ཀོང་གི་རང་སྐྱོང་གི་གནས་བབ་ལ་རྩིས་མེད་རྡོག་རོལ་བཏང་བ་ནང་བཞིན་བོད་ཀྱི་རང་དབང་དང་འགྲོ་བ་མིའི་ཐོབ་ཐང་ལའང་རྩིས་མེད་རྡོག་རོལ་བཏང་ཡོད་པ་ངོས་འཛིན་གནང་བཞིན་ཡོད། དེང་སང་རྒྱ་ནག་གིས་བོད་ནང་གི་བོད་མི་ཚོས་རང་སྐྱོང་གི་གནས་བབ་ལོངས་སུ་སྤྱོད་བཞིན་ཡོད་ཅེས་རྗོད་ཀྱི་ཡོད་པ་དེ་ནི་མིང་ཙམ་རེད་མ་གཏོགས་དཔང་རྟགས་གང་ཡང་སྟོན་རྒྱུ་མེད། ད་ལྟ་ཤར་ཏུར་ཀི་སི་ཐན་ནང་དཀའ་ངལ་འཕྲད་བཞིན་པ་ལྟར་དེ་སྔ་བོད་ནང་དུའང་དེ་ལྟར་དཀའ་ངལ་འཕྲད་ཡོད། ཅེས་སོགས་གསུངས།།