༄༅། །འདི་ལོའི་རྒྱལ་ཡུམ་ཆེན་མོའི་རྗེས་དྲན་གསེར་གྱི་གཟེངས་རྟགས་རྐང་རྩེད་སྤོ་ལོའི་རྩེད་འགྲན་ཐེངས་ ༢༦ དེ་བཞིན་རྒྱ་གར་བྱང་ཕྱོགས་དོན་གྲུབ་གླིང་བོད་མིའི་གཞིས་ཆགས་སུ་ཕྱི་ལོ་ ༢༠༢༡ ཟླ་ ༡༠ ཚེས་ ༠༡ ནས་དབུ་འཛུགས་ཀྱིས་ཚེས་ ༡༢ བར་གནང་རྒྱུ་རེད་འདུག

འདི་ལོའི་རྩེད་འགྲན་ནང་རྒྱ་གར་དང་བལ་ཡུལ་བཅས་ནས་རུ་ཁག་བཅུ་མཉམ་ཞུགས་གནང་ཡོད་པ་དང་། ཉིན་གྲངས་བཅུ་གཉིས་རིང་ཁྱོན་རྩེད་འགྲན་ ༢༧ གནང་རྒྱུ་རེད་འདུག རྩེད་འགྲན་རུ་ཁག་རེར་ཉུང་མཐར་ཐེངས་ ༤ རྩེད་རྒྱུའི་གོ་སྐབས་ཡོད་པ་རེད་འདུགདེ་ཡང་དབུ་འབྱེད་མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་དང་། དམིགས་བསལ་སྐུ་མགྲོན་དུ་མ་སུ་རི་བོད་ཁྱིམ་གྱི་སྤྱི་ཁྱབ་དྲུང་ཆེ་ཀརྨ་ཆུང་དག་ལགས། དེ་བཞིན་དོན་གྲུབ་གླིང་ས་གནས་ཀྱི་དྲུང་ཆེ་བླ་མ་ཕུན་ཚོགས་ལགས། བོད་རྒྱལ་ཡོངས་རྩེད་རིགས་ཚོགས་པའི་དྲུང་ཆེ་བསྟན་འཛིན་རིན་ཆེན་ལགས། གཞུང་དང་གཞུང་ཁོངས་མིན་པའི་ཚོགས་པ་ཁག་གི་སྐུ་ཚབ། རྩེད་འགྲན་པ་རྣམ་པ། གཟིགས་མོ་བ་སོགས་འདུ་འཛོམས་ཀྱིས་ཐོག་མར་འགྲན་བསྡུར་ནང་མཉམ་ཞུགས་གནང་མཁན་རུ་ཁག་ ༡༠ ཡོད་པ་རྣམས་ཀྱི་རྩེད་མོ་བ་རྣམས་རྩེད་ཐང་དུ་ཐོན་ནས་རུ་ཁག་སོ་སོའི་རུ་དར་འཕྱར་ནས་རུ་སྒྲིག་གནང་རྗེས། གཟིགས་མོ་བ་རྣམས་ཡར་བཞེངས་ནས་འཕགས་བོད་གཉིས་ཀྱི་རྒྱལ་གླུ་དབྱངས་སུ་གྱེར།དེ་ནས་བོད་བསྟན་སྲིད་མི་རིགས་ཀྱི་བདེ་དོན་ཆེད་རང་སྲོག་ཚུན་བློས་གཏོང་གནང་མཁན་གྱི་རྒྱལ་གཅེས་པ་ཕོ་མོ་འདས་སོན་ཡོངས་གཙོ་གྱུར་ཐོག་རྗེས་ཤུལ་ནང་མི་སྤུན་མཆེད་རྣམས་ལ་མྱ་ངན་གུས་འདུད་མཚོན་ཆེད་ངག་བཅད་སྐར་མ་གཅིག་རིང་ཞུས་གྲུབ་མཚམས་བོད་རྒྱལ་ཡོངས་རྩེད་རིགས་ཚོགས་པའི་དྲུང་ཆེ་བསྟན་འཛིན་རིན་ཆེན་ལགས་ཀྱིས་འདི་ལོའི་འགྲན་བསྡུར་ནང་རྩེད་འགྲན་གྱི་རིམ་པ་ (Fixture) དང་། བྱ་དགའི་དངུལ་འབོར། རྩེད་དཔང་སོགས་སྔར་དང་མི་འདྲ་བར་འགྱུར་བ་ཇི་བཏང་སོགས་ཀྱི་སྐོར་ངོ་སྤྲོད་གནང་ཡོད།

དེ་རྗེས་སྐུ་མགྲོན་གཙོ་བོ་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་བོད་རྒྱལ་ཡོངས་རྩེད་རིགས་ཚོགས་པ་འདི་ཉིད་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་འོག་ལ་ཡོང་སྟངས་དང་། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་མང་ཚོགས་ཀྱི་སྨན་བཅོས་མཐུན་འགྱུར་ལས་ལྷག་སྔོན་འགོག་ཐོག་ལ་ལས་དོན་མང་བ་སྤེལ་བཞིན་པ། ང་ཚོར་ན་ཚ་མང་པོ་ཞིག་དུས་རྒྱུན་གཟུགས་པོར་འགུལ་སྐྱོད་དང་ལུས་རྩལ་མེད་པའི་རྐྱེན་གྱི་ཡོང་གི་ཡོད་སྟབས། འདས་པའི་ལོ་ཤས་ནང་བཙན་བྱོལ་བོད་མིའི་གཞིས་ཆགས་ཁག་གི་ནང་རྐང་རྩེད་སྤོ་ལོ་དང་སིལ་སྤོལ་རྩེད་ཐང་ཡར་རྒྱས་བཏང་བ་དང་། ལུས་སྦྱོང་ཆེད་དུ་ (Open Gym) བརྒྱབ་པ་སོགས་ཀྱི་ལས་གཞི་མང་དག་ཅིག་སྤེལ་གནང་ཡོད་པས་ཚང་མས་དེ་ཚོ་བེད་སྤྱོད་གནང་སྟེ་སོ་སོའི་འཕྲོད་བསྟེན་ལ་སྔོན་ཚུད་ནས་དོ་སྣང་བྱེད་རྒྱུ་གལ་ཆེན་པོ་རེད། ཅེས་དང་། ད་ལྟ་འདིར་ཡོད་པའི་རྩེད་འགྲན་པ་ཚང་མ་རིམ་པས་ལོ་ན་རྒས་པའི་སྐབས་སུའང་འཕྲོད་བསྟེན་ལ་མུ་མཐུད་དོ་སྣང་གནང་དགོས་པ་དང་། རྩེད་འགྲན་སྐབས་རྒྱལ་ཕམ་ཡོང་རྒྱུ་ནི་ཆོས་ཉིད་ཡིན་པར་བརྟེན་ཚང་མས་འཁོན་འཛིན་གང་མེད་པར་སྤྲོ་སེམས་ལྡན་པའི་ངང་ནས་རྩེད་དགོས་རྒྱུ་ཧ་ཅང་གལ་ཆེན་པོ་ཡིན་སྐོར་སོགས་ཀྱི་གསུང་བཤད་རྗེས་ཕྱི་ལོ་ ༢༠༢༡ ལོའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་སྤོལ་རྩེད་འགྲན་ཐེངས་ ༢༦ དངོས་སུ་དབུ་འཛུགས་གནང་ཡོད།སྐབས་དེར་ས་གནས་འཐུས་ཚོགས་ཀྱི་ཚོགས་གཞོན་ཚེ་རིང་ཡེ་ཤེས་ལགས་ཀྱི་རྩེད་འགྲན་གོ་སྒྲིག་གནང་སྟངས་ཀྱི་ལས་བསྡོམས་དང་སྤྱན་རས་གཟིགས་སློབ་གྲྭའི་སློབ་ཕྲུག་དང་ས་གནས་བུད་མེད་ནས་གཞས་སྣ་གཟིགས་འབུལ་ཞུས་ཡོད།

རྩེད་འགྲན་དབུ་འཛུགས་ཀྱི་ཐོག་མར་དོན་གྲུབ་གླིང་གཞིས་ཆགས་ཀྱི་རུ་ཁག་དང་སིམ་ལ་རུ་ཁག་གཉིས་དབར་རྩེད་འགྲན་གནང་བ་དང་སིམ་ལ་རུ་ཁག་གི་སྤོ་ལོ་བཞི་དང་དོན་གྲུབ་གླིང་རུ་ཁག་གིས་སྤོ་ལོ་གཉིས་བླུགས་ཏེ་སིམ་ལ་རུ་ཁག་གིས་རྒྱལ་ཁ་བླངས་ཡོད་པ་བཅས།