༄༅། །སིམ་སྤྱི་བསྟན་འཛིན་སྣང་བ་ལགས་དང་ཚབ་གསར་ཟུང་དྲུང་མི་འགྱུར་གཡུ་སྒྲོན་ལགས་རྣམ་གཉིས་དབར་རྩིས་སྤྲོད་རྩིས་ལེན་གནང་ཡོད། དེ་ཡང་ཕྱི་ལོ་ ༢༠༢༡ ཟླ་ ༡༠ ཚེས་ ༡༡ ནས་༡༣ བར་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་སྐུ་ཚབ་དངོས་གྲུབ་འོད་ཟེར་ལགས་ཀྱིས་སྤྲོད་དཔང་གནང་ཐོག་སིམ་སྤྱི་བསྟན་འཛིན་སྣང་བ་ལགས་དང་ཚབ་གསར་ཟུང་དྲུང་མི་འགྱུར་གཡུ་སྒྲོན་ལགས་རྣམ་གཉིས་དབར་རྩིས་སྤྲོད་རྩིས་ལེན་གྱི་ལས་རིམ་གྲུབ་རྗེས་ཕྱི་ཚེས་ ༡༣ ཉིན་མི་འགྱུར་གཡུ་སྒྲོན་ལགས་ཀྱིས་སིམ་སྤྱིའི་ཐུགས་འགན་བཞེས་གནང་ཡོད། ཕྱི་ཚེས་ ༡༡ ཉིན་སིམ་སྤྱི་གསར་པ་མི་འགྱུར་གཡུ་སྒྲོན་ལགས་ཀྱིས་སིམ་ལའི་རྫོང་དཔོན་ཨ་དྷི་ཏི་ཡ་ནེ་གི་ (Shri. Aditya Negi Ji) ལགས་དང་མཇལ་འཕྲད་དང་། ཕྱི་ཚེས་ ༡༣ ཉིན་ས་གནས་ཀྱི་གནད་ཡོད་མི་སྣ་དང་ལྷན་ཚོགས་འདུ་དང་། ཉིན་རྒྱབ་སིམ་ལ་གཏན་སློབ་ཀྱི་སློབ་སྤྱི་དང་མཉམ་དུ་ཚོགས་འདུ་ཚོགས་ཡོད། དེ་བཞིན་ཕྱི་ཚེས་ ༡༤ ཉིན་མི་འགྱུར་གཡུ་སྒྲོན་ལགས་ཀྱིས་ཧི་མཱ་ཅལ་མངའ་སྡེའི་སྲིད་སྐྱོང་སྐུ་ཞབས་རཱ་ཇེནྡྲ་ཝིཤྭ་ནཐ་ཨར་ལེ་ཀར་ (Shri. Rajendra Vishwanath Arlekar) མཆོག་གིས་དབུས་པའི་ཧི་མཱ་ཅལ་མངའ་སྡེའི་ནང་སྲིད་དང་མེལ་ཚེ་ལས་ཁུངས་ (Home & Vigilance) ཀྱི་དམིགས་བསལ་དྲུང་ཆེ་སྐུ་ཞབས་རཱ་ཀེཤ་ཤཱར་མ་ (Rakesh Sharma) ལགས་དང་། ནགས་ཚལ་ལས་ཁུངས་ཀྱི་དྲུང་གཞོན་སྐུ་ཞབས་པྲ་ཝིན་ཊཀ་ཀུ་མཱར་ (Praveen Taak Kumar) ལགས། ཁྲལ་འབབ་ལས་ཁུངས་ཀྱི་དྲུང་གཞོན་སྐུ་ཞབས་སུ་ནིལ་ཝར་མཱ་ (Sunil Verma) ལགས་བཅས་དང་མཇལ་འཕྲད་གནང་ཡོད་པ་བཅས། །