༄༅། །ཕྱི་ལོ་ ༢༠༢༡ ཟླ་ ༡༠ ཚེས་ ༦ ཉིན་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཐའེ་ཝན་གྱི་རྒྱལ་སྟོན་དུས་ཆེན་ཐེངས་ ༡༡༠ པའི་ (110th National Day Celebration of ROC (Taiwan) མཛད་སྒོར་མཉམ་ཞུགས་གནང་ཡོད།

དེ་ཡང་ཐའེ་ཝན་གྱི་རྒྱལ་སྟོན་དུས་ཆེན་ཐེངས་ ༡༡༠ པའི་མཛད་སྒོ་དེ་བཞིན་ཨ་རིའི་རྒྱལ་ཝ་ཤིན་ཊོན་དུ་ཡོད་པའི་ཕྱི་ལོ་ ༡༩༧༩ སྔོན་གྱི་ཐའེ་ཝན་གྱི་གཞུང་ཚབ་ཆེན་མོ་དགུའི་བཞུགས་གནས་ཊི་ཝིན་ཨོག་སི་ཨེ་སི་ཊེ་ཊི་ (Twin Oaks Estate) ཞེས་པའི་ནང་ཚོགས་ཡོད་པ་དང་། མཛད་སྒོའི་ཐོག་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཆེད་ཕེབས་ཀྱིས་ཐའེ་ཝན་གྱི་གཞུང་ཚབ་ཆེན་མོ་ལྕམ་སྐུ་པེ་ཁིམ་ (Bi Khim Hsiao) ལགས་དང་མཇལ་འཕྲད་གནང་ཡོད།ཐའེ་ཝན་གྱི་གཞུང་ཚབ་ཆེན་མོ་ལྕམ་སྐུ་པེ་ཁིམ་ལགས་ནི། བོད་དོན་ལ་རྒྱབ་སྐྱོར་གནང་མཁན་ཞིག་ཡིན་པ་མ་ཟད། མང་གཙོ་དང་རང་དབང་ལ་རྒྱབ་སྐྱོར་ཤུགས་ཆེ་གནང་མཁན་ཞིག་ཡིན།
ཕྱོགས་མཚུངས་དོན་གཅོད་དངོས་གྲུབ་ཚེ་རིང་ལགས་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཚོགས་པའི་ཚོགས་གཙོ་གཞོན་པ་ནུ་རེ་ཊུར་ཀེལ་ (Nury Turkel) ལགས་དང་། ཨ་རིའི་རྒྱལ་ཡོངས་མང་གཙོ་བསྟི་གནས་ཁང་ (National Democratic Institute) གི་འགན་འཛིན་ (Derek Mitchell) ལགས་རྣམ་གཉིས་དང་མཇལ་འཕྲད་གནང་ཡོད་པ་བཅས།།