༄༅། །བྱང་ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་དང་དྲུང་ཆེ་བཀྲ་ཤིས་དོན་གྲུབ་ལགས་རྣམ་གཉིས་ཀྱིས་ཨ་རིའི་རྒྱལ་ས་ཝ་ཤིན་ཊོན་དུ་རྟེན་གཞི་བྱས་པའི་རོ་ནལ་ཌི་རེ་གྷན་ཁང་པའི་ (Ronald Reagan Building) ནང་རྒྱ་ནག་ཐུན་མོང་གི་ཆོས་དད་རང་དབང་དང་འབྲེལ་བའི་དམིགས་བསལ་ཚོགས་འདུ་ཞིག་གི་སྐབས་སུ་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཚན་པའི་འགན་འཛིན་ཟུར་པ་སྐུ་ཞབས་སེ་མུལ་བྷི་རོན་བྷེག་ (Samuel D. Brownback) མཆོག་དང་མཇལ་འཕྲད་ཞུས་ཡོད།

དེ་ཡང་རྒྱ་ནག་གི་ཆོས་དད་རང་དབང་གི་དམིགས་བསལ་ཚོགས་འདུའི་ཐོག་རྒྱ་ནག་དམར་ཤོག་ཚོགས་པའི་འོག་མནར་སྤྱོད་མྱངས་མྱོང་མཁན་ཡི་ཤུ་རྣམ་དག་ཆོས་ལུགས་ཀྱི་སྐུ་ཚབ་དང་། ཧོང་ཀོང་འགྲོ་བ་མིའི་ཐོབ་ཐང་ཚོགས་པའི་སྐུ་ཚབ། ཡུ་གུར་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་སྐུ་ཚབ། རྩ་རླུང་སྒོམ་སྒྲུབ་ཚོགས་པའི་སྐུ་ཚབ་སོགས་མཉམ་ཞུགས་གནང་ཡོད། ཚོགས་འདུའི་ཐོག་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཚན་པའི་འགན་འཛིན་ཟུར་པ་སྐུ་ཞབས་སེ་མུལ་བྷི་རོན་བྷེག་གིས་ལོ་རྗེས་མའི་དཔྱིད་ཀར་རྒྱ་ནག་དམར་ཤོག་འོག་མནར་སྤྱོད་མྱངས་མྱོང་མཁན་བོད་ཀྱི་ནང་པ་དང་། ཡུ་གུར་མི་རིགས། རྒྱ་རིགས་ཡི་ཤུ་པ། རྩ་རླུང་སྒོམ་སྒྲུབ་ཉམས་ལེན་པ་སོགས་ཀྱི་སྐོར་དཔེ་དེབ་ཅིག་པར་སྐྲུན་གནང་འཆར་ཡོད་པས་ཚོགས་འདུར་ཉམས་ཞུགས་གནང་མཁན་ཡོངས་ནས་དཔེ་དེབ་དེ་དང་འབྲེལ་བའི་རྒྱ་ནག་དམར་ཤོག་འོག་ཆོས་དད་རང་དབང་དང་འབྲེལ་བའི་མནར་སྤྱོད་མྱངས་མྱོང་མཁན་རྣམ་པའི་དངོས་བྱུང་ལོ་རྒྱུས་བསྐུར་རོགས་གནང་ཞེས་གསུངས། གཞན་ཡང་སྐུ་ཞབས་སེ་མུལ་བྷི་རོན་བྷེག་མཆོག་གིས་རྒྱལ་སྤྱིའི་ཆོས་དད་རང་དབང་གི་ཚོགས་ཆེན་ཐེངས་རྗེས་མ་དེ་བཞིན་ཕྱི་ལོ་ ༢༠༢༢ ཕྱི་ཟླ་བཞི་པ་ལྔ་པ་གང་རུང་ཞིག་ལ་འཚོགས་རྒྱུ་ཡིན་པའི་སྐོར་གསུངས།

ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ཚན་པའི་འགན་འཛིན་ཟུར་པ་སྐུ་ཞབས་སེ་མུལ་བྷི་རོན་བྷེག་མཆོག་ཕྱི་ལོ་ ༢༠༡༩ ཟླ་ ༡༠ ནང་བཞུགས་སྒར་རྡ་སར་ཆེད་ཕེབས་ཀྱིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་ཡོད་པ་མ་ཟད། བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་ལྷན་མཇལ་འཕྲད་གནང་ཡོད་པ་བཅས།།