༄༅། །བེལ་ཇི་ཡམ་སྐུ་ཚབ་དོན་གཅོད་ཁང་གིས་བོད་དོན་རྒྱབ་སྐྱོར་བ་རྙིང་གྲས་དང་ཡུ་རོབ་གྲོས་ཚོགས་ཀྱི་འཐུས་མི་ཟུར་པ་སྐུ་ཞབས་ས་བྷ་སོ་གོར་ (Csaba Sogor) མཆོག་ལ་ཉིན་གུང་གི་གསོལ་ཚིགས་སྟབས་བདེ་ཞིག་གོ་སྒྲིག་ཞུས་ཡོད།
དེ་ཡང་སྐུ་ཞབས་ས་བྷ་སོ་གོར་མཆོག་ཕྱི་ལོ་ ༢༠༠༩ ནས་ ༢༠༡༩ དབར་དུས་ཡུན་ཐེངས་གཉིས་རིང་ཡུ་རོབ་གྲོས་ཚོགས་ཀྱི་འཐུས་མི་ཡིན་པའི་སྐབས་ཁོང་གིས་ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་གནང་སྟེ་བོད་དོན་སླད་རྒྱབ་སྐྱོར་ཤུགས་ཆེན་པོ་གནང་ཡོད་པ་མ་ཟད། བཞུགས་སྒར་རྡ་སར་ཐེངས་འགའ་ཆེད་ཕེབས་ཀྱིས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་ལྷན་དུ་མཇལ་འཕྲད་གནང་ཡོད།
གཞན་ཡང་ཡུ་རོབ་གྲོགས་ཚོགས་ནང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་བོད་དོན་ཆེད་དུ་ཚོགས་འདུ་ཚོགས་པ་དང་། གྲོས་ཆོད་བཞག་པ། འགྲེམས་སྟོན་སོགས་གནང་སྐབས་ཁོང་གིས་རྒྱབ་སྐྱོར་ཤུགས་ཆེན་པོ་གནང་ཡོད། སྐུ་ཞབས་ས་བྷ་སོ་གོར་མཆོག་གིས་ཁོང་གི་ལས་ཁུངས་སུ་བོད་པའི་སློབ་མ་ཚོར་དུས་ཡུན་ཐུང་ངུ་རིང་ཉམས་གསོག་ཆེད་ལས་ཀ་སྤྲོད་རྒྱུའི་ཁས་ལེན་གནང་མྱོང་ཡོད།
སྐུ་ཞབས་ས་བྷ་སོ་གོར་མཆོག་གིས་མགྲོན་འབོད་གནང་བ་ལྟར་ཕྱི་ལོ་ ༢༠༡༧ ལོར་བེལ་ཇི་ཡམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་ལས་བྱེད་རིག་འཛིན་ལགས་རྣམ་གཉིས་ཊི་རན་སེལ་ཝེ་ནི་ཡའི་ (Transylvania) མངའ་ཁུལ་དུ་བསྐྱོད་པའི་སྐབས་བོད་དོན་དང་འབྲེལ་བའི་ལས་འགུལ་མང་དག་སྤེལ་ཐུབ་ཡོད།
སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ཡུ་རོབ་གྲོས་ཚོགས་ཀྱི་འཐུས་མི་ཟུར་པ་སྐུ་ཞབས་ས་བྷ་སོ་གོར་མཆོག་བེལ་ཇི་ཡམ་སྐུ་ཚབ་དོན་གཅོད་ཁང་ལ་ག་དུས་ཕེབས་པ་ཡིན་ནའང་དགའ་བསུ་ཡོད། ཅེས་གསུངས།།
