༄༅། །རྒྱལ་སྤྱིའི་ཁྲིམས་ལུགས་སློབ་དཔོན་མེ་ཀལ་ཝན་ལྦལ་ཊ་པཱ་རག་མཆོག་གིས་བེལ་ཇི་ཡམ་གྱི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་གཞོན་པ་དང་བེལ་ཇི་ཡམ་གྱི་གྲོས་ཚོགས་འཐུས་མི་སྐུ་ཞབས་སམ་མུལ་ཁོ་གོ་ལ་ཊི་ (Samuel Cogolati) མཆོག་དང་མཇལ་འཕྲད་ཀྱིས་ཁྲིམས་ཐོག་ནས་རྒྱ་བོད་གཉིས་ཀྱི་གནད་དོན་ལ་ལྟ་སྟངས་དང་། རྒྱལ་སྤྱིའི་ཚོགས་སྡེ་ཁག་ནས་ཇི་ལྟར་རྒྱ་བོད་གཉིས་ཀྱི་གནད་དོན་གསལ་ཐབས་གནང་དགོས་པའི་སྐོར་གྲོས་བསྡུར་གནང་ཡོད།

གཞན་ཡང་སློབ་དཔོན་མེ་ཀལ་ཝན་ལྦལ་ཊ་པཱ་རག་མཆོག་གིས་རྒྱ་ནག་གཞུང་གིས་བོད་མི་རྣམས་རྒྱ་ནག་གི་གྲངས་ཉུང་མི་རིགས་ཀྱི་ཁོངས་གཏོགས་སུ་བཅུག་པ་གཞི་རྩའི་ཆ་ནས་ནོར་འཁྲུལ་ཡིན་པ་མ་ཟད། རྒྱལ་སྤྱིའི་ཁྲིམས་དང་འགལ་གྱི་ཡོད་སྐོར་གསུངས། ཕྱོགས་མཚུངས་ཁོང་གིས་རྒྱལ་ཁབ་ཁག་གཅིག་གི་གཞུང་དང་གསར་འགྱུར་བརྒྱུད་ལམ་ཁག་གིས་བོད་ནི་རྒྱ་ནག་གི་ཆ་ཤས་རེད་ཅེས་རྗོད་བཞིན་ཡོད་པ་དེ་རྒྱལ་སྤྱིའི་ཁྲིམས་དང་འགལ་ཟླ་འགྲོ་གི་ཡོད་པ་སོགས་ཀྱི་སྐོར་གསུངས།

བེལ་ཇི་ཡམ་གྱི་གྲོས་ཚོགས་འཐུས་མི་སྐུ་ཞབས་སམ་མུལ་ཁོ་གོ་ལ་ཊི་མཆོག་གིས་སློབ་དཔོན་མེ་ཀལ་ཝན་ལྦལ་ཊ་པཱ་རག་མཆོག་བེལ་ཇི་ཡམ་སྐུ་ཚབ་དོན་གཅོད་ཁང་དང་བེལ་ཇི་ཡམ་གྱི་རྒྱལ་ས་སྦར་སིལ་ཁུལ་དུ་ཆེད་ཕེབས་ཀྱིས་གནད་ཡོད་མི་སྣ་ཁག་དང་མཇལ་འཕྲད་གནང་བར་ཐུགས་རྗེ་ཆེ་ཞུས་པ་དང་འབྲེལ་བོད་དོན་སླད་མུ་མཐུད་རྒྱབ་སྐྱོར་གནང་རྒྱུའི་ཞལ་བཞེས་གནང་ཡོད།

སློབ་དཔོན་མེ་ཀལ་ཝན་ལྦལ་ཊ་པཱ་རག་མཆོག་རྒྱལ་ས་སྦར་སིལ་ཁུལ་གྱི་འཚམས་གཟིགས་ལེགས་གྲུབ་བྱུང་རྗེས་ཡུ་རོབ་ཀྱི་རྒྱབ་ཁབ་ནི་དར་ལེནྜའི་གྲོང་ཁྱེར་ཧེ་གྷིར་ (Hague) ཕེབས་ཡོད་པ་བཅས།།