༄༅། །ཕྱི་ལོ་ ༢༠༢༡ ཟླ་ ༡༠ ཚེས་ ༢ ཉིན་ཨེལ་སལ་ཝེ་ཌོར་ (El Salvador) རྒྱལ་ཁབ་ནས་ཡིན་པའི་བོད་དོན་རྒྱབ་སྐྱོར་བ་དང་བོད་ཀྱི་གྲོགས་པོ་རྙིང་ཤོས་གྲས་སྐུ་ཞབས་ཨེལ་ཧྥི་རེ་ཌོ་མར་ཊི་ནེ་ཛི་མོ་རེ་ནོ་ (Dr Alfredo Martinez Moreno) མཆོག་དགུང་གྲངས་ ༩༨ ཐོག་སྐུ་ཚེའི་འཕེན་པ་རྫོགས་པའི་ཡིད་སྐྱོ་བའི་གནས་ཚུལ་ཐོན་པར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དམ་པ་དེ་ཉིད་ཀྱི་སྐུ་ཟླ་ལྕམ་སྐུ་ཨ་ལི་ཤ་མར་ཊི་ནེ་ཛི་ (Alicia Martinez) ལགས་ལ་ཐུགས་གསོའི་གསུང་འཕྲིན་གནང་བའི་ནང་འཁོད་དོན། སྐུ་ཉིད་ཀྱི་སྐུ་ཟླ་དང་བོད་ཀྱི་གྲོགས་པོ་རྙིང་ཤོས་གྲས་སྐུ་ཞབས་ཨེལ་ཧྥི་རེ་ཌོ་མོ་རེ་ནོ་མཆོག་སྐུ་ཚེའི་འཕེན་པ་རྫོགས་པའི་གནས་ཚུལ་ཤེས་རྟོགས་བྱུང་བས་ཧ་ཅང་བློ་ཕམ་བྱུང་།
ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་སྐུ་ཉིད་ཀྱིས་དབུས་པའི་ནང་མི་ཡོངས་ལ་སྙིང་ཐག་པ་ནས་ཐུགས་གསོ་ཞུ་རྒྱུ་ཡིན། ཨེལ་སལ་ཝེ་ཌོར་རྒྱལ་ཁབ་ཀྱི་སྐུ་ཚབ་ཚོགས་ཆུང་གི་ཚོགས་གཙོ་གཞོན་པ་སྐུ་ཞབས་ཨེལ་ཧྥི་རེ་ཌོ་མོ་རེ་ནོ་མཆོག་དང་ཨེལ་སལ་ཝེ་ཌོར་རྒྱལ་ཁབ་ཀྱི་སྐུ་ཚབ་ཚོགས་ཆུང་ངོས་ནས་ཕྱི་ལོ་ ༡༩༥༠ ཟླ་ ༡༡ ཚེས་ ༧ ཉིན་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ཐོག་བོད་དུ་ཕྱི་རྒྱལ་གྱི་དམག་ཤུགས་བཙན་འཛུལ་བྱུང་བར་སྐྱོན་བརྗོད་ཀྱིས་བོད་ལ་རྒྱབ་སྐྱོར་གནང་བ་དེ་བོད་མི་ཚོས་དྲན་གསོ་དང་བཀའ་དྲིན་བླ་ལྷག་ཏུ་ཆེ་ཞུ་གི་ཡོད།
ཨེལ་སལ་ཝེ་ཌོར་རྒྱལ་ཁབ་ནི། མཉམ་འབྲེལ་རྒྱལ་ཚོགས་སུ་བོད་ཀྱི་གནད་དོན་སྐོར་གླེང་སློང་གནང་མཁན་ཆེས་ཐོག་མ་དེ་ཡིན་ཞིང་། ང་ཚོས་དུས་རྟག་ཏུ་སྐུ་ཞབས་ཨེལ་ཧྥི་རེ་ཌོ་མོ་རེ་ནོ་མཆོག་ནི་བོད་མིའི་འཐབ་རྩོད་ཀྱི་སྣེ་ཁྲིད་མཁན་ཡིན་པ་ལྟར་རྗེས་དྲན་ཞུ་རྒྱུ་ཡིན། སྐུ་ཞབས་ཨེལ་ཧྥི་རེ་ཌོ་མོ་རེ་ནོ་མཆོག་གིས་སྐུ་ཚེ་ཧྲིལ་པོར་བོད་དོན་སླད་ལྷག་བསམ་རྣམ་དག་གིས་རྒྱབ་སྐྱོར་གནང་ཡོད་པ་མ་ཟད། ཁོང་ནི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ཧ་ཅང་ཉེ་པོ་གནང་སའི་གྲོགས་པོ་ཞིག་ཀྱང་ཡིན།
རང་ཉིད་སྒེར་ལ་མཚོན་ནའང་ཕྱི་ལོ་ ༢༠༠༦ ལོར་སི་ཀོ་ཊི་ལན་ཌིར་ (Scotland) དམ་པ་དེ་ཉིད་དང་དངོས་སུ་མཇལ་འཕྲད་ཞུ་རྒྱུའི་བསྐལ་བ་བཟང་པོ་བྱུང་། རྒྱལ་ཁབ་ཀྱི་གཞུང་འབྲེལ་སྐུ་ཚབ་དང་ཁྲིམས་རྩོད་པ་ཡིན་པའི་ཆ་ནས་དམ་པ་དེ་ཉིད་ཀྱིས་སྐུ་ཚེ་ཧྲིལ་པོ་ཞི་བདེ་དང་འགྲོ་བ་མིའི་ཆེ་མཐོང་ཞུ་གཏུག་གི་དོན་དུ་བསྐྱལ་ཡོད། རང་དབང་དང་ཆེ་མཐོང་ཆེད་དུ་འཐབ་རྩོད་བྱེད་པར། དམ་པ་དེ་ཉིད་ཀྱི་མཛད་རྗེས་ཀྱིས་ང་ཚོར་སེམས་ཤུགས་བསྐྱེད་དུ་འཇུག་ངེས་ཡིན།
སླར་ཡང་ངས་སྐུ་ཉིད་ཀྱིས་དབུས་པའི་ནང་མི་ལྷན་རྒྱས་ལ་སྙིང་ཐག་པ་ནས་ཐུགས་གསོ་དང་། སྐུ་ཞབས་ཨེལ་ཧྥི་རེ་ཌོ་མོ་རེ་ནོ་མཆོག་མགྱོགས་མྱུར་མི་ལུས་རིན་པོ་ཆེའི་ལུས་རྟེན་འཐོབ་པའི་སྨོན་ལམ་འདེབས་ཀྱི་ཡོད། ཅེས་འཁོད་ཡོད། །
