༄༅། །དཔལ་ལྡན་སྲིད་སྐྱོང་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དང་པོའི་ཐོག་བཀའ་ཤག་གི་དགའ་བསུའི་འཚམས་འདྲིའི་གསུང་བཤད་གནང་དོན། ཆེས་བཀུར་བར་འོས་པའི་བོད་མི་མང་སྤྱི་འཐུས་ལྷན་ཚོགས་ཀྱི་དཔལ་ལྡན་ཚོགས་གཙོ་མཆོག ཐོག་མ་དེར་བོད་མིའི་མགོན་སྐྱབས་དང་མཚོན་རྟགས་སྤྱི་ནོར་༸གོང་ས་༸རྒྱལ་བའི་དབང་པོ་མཆོག་ལ་གུས་ཕྱག་སྔོན་དུ་བཏང་ནས་དེ་རིང་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་དང་པོ་ཆགས་ཀྱི་ཡོད་སྟབས། སྤྱི་འཐུས་རྣམ་པ་བདམས་ཐོན་བྱུང་ནས་དམ་འབུལ་ཟིན་པའི་དཔལ་ལྡན་ཚོགས་གཙོ་མཆོག་དང་། དཔལ་ལྡན་ཚོགས་གཞོན་མཆོག དེ་བཞིན་བཀུར་འོས་སྤྱི་འཐུས་རྣམ་པ་ཡོངས་ལ་མི་མང་ནས་འགན་བསྐུར་བ་ནང་བཞིན་དེ་རིང་གྲོས་ཚོགས་ཀྱི་ཞབས་སྟེགས་སྟེང་ཕེབས་ཐུབ་པ་དང་། མི་མང་གིས་འགན་བསྐུར་བ་ནང་བཞིན་ལས་འགན་སྒྲུབ་སླད་གྲོས་ཚོགས་འདིའི་ཐོག་མཉམ་ཞུགས་གནང་རྒྱུའི་གོ་སྐབས་ཐེངས་དང་པོ་དེ་ཡོང་གི་ཡོད་པར་བརྟེན་སྐབས་ ༡༦ པའི་བཀའ་ཤག་གི་ངོས་ནས་དཔལ་ལྡན་ཚོགས་གཙོ་མཆོག་དང་དཔལ་ལྡན་ཚོགས་གཙོ་གཞོན་པ་མཆོག དེ་བཞིན་བཀུར་འོས་སྤྱི་འཐུས་རྣམ་པ་ཡོངས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
དེ་དང་མཉམ་དུ་བར་ལམ་ཟླ་བ་ཁ་ཤས་ནང་རང་རེ་བཙན་བྱོལ་སྤྱི་ཚོགས་ནང་དཀའ་རྙོག་ཅིག་བྱུང་བ་རེད། དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་ཡིག་ཕེབས་པ་བརྒྱུད་སེལ་ཐུབ་པ་བྱུང་བ་རེད། ད་བར་བཙན་བྱོལ་སྤྱི་ཚོགས་འདི་གང་ཡིན་པ་དེ་དག་ཚང་མ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་ཉག་གཅིག་ལ་བརྟེན་ནས་བྱུང་བ་ཡིན་པ་སྨོས་མེད་རེད། ང་ཚོ་ཚང་མས་ངོས་འཛིན་ཡོད། དེ་བཞིན་བཀུར་འོས་སྤྱི་འཐུས་རྣམ་པས་བཀའ་ཡིག་ཕེབས་རྗེས་གནས་ཚུལ་གཙང་མ་ཆགས་པའི་གསལ་བསྒྲགས་དང་། ལྷག་པར་མང་ཚོགས་ནང་དེའི་སྐོར་གླེང་སློང་བྱེད་མི་དགོས་པའི་གསལ་བསྒྲགས་ཀྱང་བསྐྱང་གནང་ཡོད་པ་རེད། ད་ལྟའི་དུས་སུ་རྒྱལ་སྤྱིའི་ཆབ་སྲིད་གནས་བབ་དང་། དེ་བཞིན་རྒྱལ་སྤྱི་ཁྱོན་ཡོངས་ཀྱིས་རྒྱ་ནག་ལ་ལྟ་སྟངས། བོད་ནང་གི་གནས་སྟངས་ཛ་དྲག་འགྲོ་བཞིན་ཡོད་ནའང་བོད་དང་མཉམ་པའི་གནད་དོན་གཞན་ཡུ་གུར་མི་རིགས་དང་ཧོང་ཀོང་མི་རིགས་ཀྱི་གནད་དོན་རེད། ཉེ་ཆར་ཐའེ་ཝན་ལ་རྒྱ་ནག་གཞུང་གིས་དྲག་སྤྱོད་ཀྱི་ཐབས་བྱུས་རིགས་སྒྲིག་བཞིན་པའི་གནས་ཚུལ་མང་པོ་ཞིག་འཐོན་བཞིན་པའི་སྐབས་འདིར་བོད་ཕྱི་ནང་གཉིས་ཀྱི་བོད་མི་ཡོངས་ནས་གོ་སྐབས་འདི་མ་བརླགས་པར་དམ་འཛིན་དགོས་རྒྱུ་ནི་གལ་ཆེན་པོ་ཆགས་ཀྱི་ཡོད། ལྷག་པར་འཛིན་སྐྱོང་བཀའ་ཤག་དང་བོད་མི་མང་སྤྱི་འཐུས་ལྷན་ཚོགས་ནི་བོད་ནང་ཡོད་པའི་བོད་མིའི་སྐུ་ཚབ་མཚོན་དགོས་ཀྱི་ཡོད་སྟབས། བོད་ནང་ཡོད་པའི་བོད་མིར་དཀའ་ངལ་གང་འཕྲད་ཀྱི་ཡོད་ནའང་འཛམ་གླིང་ལ་ཕྱི་བསྒྲགས་བྱས་པ་བརྒྱུད་བོད་དོན་ལ་རྒྱབ་སྐྱོར་ཐོབ་དགོས་ཀྱི་ཡོད་པར་བརྟེན་དེ་རིང་ནས་བཟུང་ང་ཚོ་ཚང་མས་འདས་པའི་དཀའ་རྙོག་གང་ཡིན་པ་དེ་དག་ལ་བརྙས་མི་དགོས་པར་མ་འོངས་པའི་གོམ་པ་མདུན་སྤོ་བརྒྱག་རྒྱུའི་སྟེང་བརྙས་དགོས་རྒྱུ་ཧ་ཅང་གལ་ཆེན་པོ་ཆགས་ཡོད།
འཛིན་སྐྱོང་བཀའ་ཤག་གི་ངོས་ནས་ཁ་སྔོན་བཀའ་ཡིག་དེ་ཕེབས་པ་དང་ཚིག་འབྲུ་རེ་རེ་བཞིན་གཏིང་ཟབ་པོ་བྱས་ནས་བཀླགས་པ་ཡིན། དེ་ལ་བསམ་ཞིབ་བྱས་པ་ཡིན། དེ་བརྒྱུད་ནས་ད་བར་དཀའ་རྙོག་འཕྲད་པ་མཐའ་དག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་ཡིག་བརྒྱུད་གཙང་མ་བཟོས་ཟིན་པ་ཞིག་ལ་ངོས་འཛིན་ཞུ་གི་ཡོད།
གྲོས་ཚོགས་ཀྱི་ངོས་ནས་མང་ཚོགས་ལ་ལམ་སྟོན་ཕེབས་པ་ནང་ལྟར་གྲོས་ཚོགས་ར་བ་འདིའི་ནང་བསྐྱར་དུ་འདས་པའི་རྙོག་གླེང་ཐོག་གླེང་སློང་མི་དགོས་པ་དང་། མ་འོངས་པའི་ལས་དོན་བྱེད་ཕྱོགས་རང་གི་སྟེང་འཛིན་སྐྱོང་བཀའ་ཤག་གི་ངོས་ནས་མཐུན་འགྱུར་གང་ཞུ་དགོས་མིན་བཀའ་ཤག་གི་གསལ་བཤད་བརྒྱུད་ཡོང་རྒྱུ་ཞིག་རེད། དེར་བརྟེན་སླར་ཡང་དཔལ་ལྡན་ཚོགས་གཙོ་མཆོག་དང་ཚོགས་གཞོན་མཆོག་གིས་དབུས་སྤྱི་འཐུས་རྣམ་པ་ཡོངས་ལ་འཚམས་འདྲི་བཀྲ་ཤིས་ལེགས་ཞུ་རྒྱུ་དང་འབྲེལ་གོང་དུ་དཔལ་ལྡན་ཚོགས་གཙོ་མཆོག་གིས་གསུངས་པ་ནང་ལྟར་ང་ཚོ་ཚང་མ་ལས་དབང་གིས་མཉམ་དུ་ཚོགས་ཁང་གི་ར་བ་འདིའི་ནང་འབྱུང་འགྱུར་ལོ་བཞི་དང་ཕྱེད་ཀ་ལྷག་ཙམ་རིང་ཐུན་མོང་གི་ནུས་པ་སྤེལ་དགོས་ཀྱི་ཡོད་སྟབས། འགལ་ཟླ་ཕྲན་བུ་ཡོང་སྲིད་པ་རེད། འོན་ཀྱང་རྒྱ་ཆེ་ས་ནས་བོད་སྤྱི་པའི་རྩ་དོན་ཐོག་རང་ནུས་གང་ལྕོགས་ཀྱི་ཐོག་ནས་བཀའ་ཤག་གི་ངོས་ནས་ལས་དོན་སྒྲུབ་རྒྱུར་དམ་བཅའ་བརྟན་པོ་ཡོད། དེ་བཞིན་བོད་མི་མང་སྤྱི་འཐུས་ལྷན་ཚོགས་ལའང་མཐུན་འགྱུར་སྦྱར་རྒྱུའི་ཐོག་དམ་བཅའ་བརྟན་པོ་ཡོད།
བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་མི་རྣམ་པ་ཡིན་ནའང་དམ་བཅའ་བརྟན་པོ་ཡོད་པའི་ངོས་འཛིན་ཞུ་ཡི་ཡོད། སླར་ཡང་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ཐུགས་རྗེ་ཆེ། ཞེས་གསུང་བཤད་གནང་།།
