༄༅། །ཕྱི་ལོ་ ༢༠༢༡ ཟླ་ ༡༠ ཚེས་ ༡༡ ཉིན་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཉི་ཧོང་གྲོས་ཚོགས་ཁང་དུ་ཡོད་པའི་ཉི་ཧོང་གི་སྲིད་བློན་སྐུ་ཞབས་ཧྥུ་མིའོ་ཀི་ཞི་དཱ་ (Fumio Kishida) མཆོག་གི་ལས་ཁུངས་སུ་ཆེད་ཕེབས་ཀྱིས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཉི་ཧོང་གི་སྲིད་བློན་གསར་པ་སྐུ་ཞབས་ཧྥུ་མིའོ་ཀི་ཞི་དཱ་མཆོག་ལ་འཚམས་འདྲིའི་གསུང་འཕྲིན་གནང་བ་དེ་ཕུལ་ཡོད།
སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་དང་ལྷན་ཉི་ཧོང་རྒྱལ་ཡོངས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་དྲུང་ཆེ་སྐུ་ཞབས་ནཱ་གའོ་བཀྲ་ཀ་ཤིས་ (Mr. Nagao Takashi) ལགས་ཕེབས་ཡོད། དེ་ཡང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཉི་ཧོང་གི་སྲིད་བློན་གསར་པ་སྐུ་ཞབས་ཧྥུ་མིའོ་ཀི་ཞི་དཱ་མཆོག་ལ་འཚམས་འདྲིའི་གསུང་འཕྲིན་གནང་བའི་ནང་འཁོད་དོན། སྐུ་ཉིད་ཉི་ཧོང་གི་སྲིད་བློན་དུ་བདམས་ཐོན་བྱུང་བར་ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་སྐུ་ཉིད་མཆོག་ལ་འཚམས་འདྲི་ཞུ་རྒྱུ་ཡིན།
བོད་མིའི་སེམས་ནང་ཉི་ཧོང་ནི་དམིགས་བསལ་ཞིག་ཡོད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་རྒྱ་གར་ལ་བཙན་བྱོལ་དུ་ཆིབས་སྒྱུར་བསྐྱངས་རྗེས་ཉིང་ཧོང་ལ་ཐེངས་དང་པོ་ཆིབས་སྒྱུར་བསྐྱངས་པའི་སྐབས་ཉི་ཧོང་གིས་མགོན་པོ་གང་ཉིད་ལ་ཕེབས་བསུའི་སྣེ་ལེན་གཟབ་རྒྱས་ཞུས་གནང་བ་དེ་ང་ཚོས་དགའ་ཚོར་ཆེན་པོའི་སྒོ་ནས་དྲན་གསོ་ཞུ་གི་ཡོད། དེ་ནས་བཟུང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཉི་ཧོང་ལ་འཆར་ཅན་ལྟར་ཆིབས་སྒྱུར་བསྐྱངས་ཡོད་པ་མ་ཟད། ཉི་ཧོང་མི་མང་གིས་མགོན་པོ་གང་ཉིད་ཀྱིས་འགྲོ་བ་མིའི་རིན་ཐང་དང་ཆོས་ལུགས་མཐུན་སྒྲིལ་གོང་མཐོར་མཛད་བཞིན་པར་ཧ་ཅང་དགའ་མོས་གནང་གི་ཡོད།
ཉི་ཧོང་གིས་འཛམ་གླིང་གི་རྒྱལ་ཁབ་གཞན་དང་ལྷན་དུ་མཉམ་འབྲེལ་ཐོག་མང་གཙོ་དང་། རང་དབང་། ཁྲིམས་ཀྱི་དབང་བསྒྱུར་བཅས་གོང་མཐོར་སླད་ཕྱག་ལས་གནང་བཞིན་པར་ང་ཚོའི་ངོས་ནས་རྗེས་སུ་ཡི་རང་ཞུ་གི་ཡོད། སྐུ་ཉིད་ཀྱིས་ཨེ་ཤི་ཡ་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་རྟོག་ཞིབ་གནང་རྒྱུའི་ཞལ་བཞེས་གནང་བ་དེས་དྲག་གནོན་འོག་དཀའ་སྡུག་མྱོང་བཞིན་པའི་མི་རྣམས་ལ་རེ་བའི་བརྡ་ལན་ཞིག་གནང་ཡོད།
གོ་སྐབས་འདི་བརྒྱུད་ངས་ཉི་ཧོང་གི་གྲོས་ཚོགས་ཀྱིས་འཛམ་གླིང་ནང་གྲོས་ཚོགས་འཐུས་མི་གྲངས་ ༡༠༠ ལས་གྲུབ་པའི་ཉི་ཧོང་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཆེ་ཤོས་བཙུགས་གནང་བར་ཐུགས་རྗེ་ཆེ་ཞུ་རྒྱུ་ཡིན། ང་ཚོས་དབུ་མའི་ལམ་གྱི་སྲིད་བྱུས་བརྒྱུད་བོད་རྒྱ་གཉིས་ཀྱི་གནད་དོན་གསལ་ཐབས་ཞུ་བཞིན་པའི་ཐད་ཉི་ཧོང་གིས་རྒྱབ་སྐྱོར་གནང་བཞིན་པར་ཐུགས་རྗེ་ཞུ་རྒྱུ་ཡིན། ཞེས་གསུངས།
ཕྱོགས་མཚུངས་ཨརྱ་ཚེ་དབང་རྒྱལ་པོ་ལགས་ཀྱིས་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གི་འཚམས་འདྲིའི་གསུང་འཕྲིན་ངོ་མ་དང་ལྷན་དུ་ཉི་ཧོང་སྐད་དུ་ཕབ་བསྒྱུར་ཞུས་པ་ཞིག་དང་། དཔལ་ལྡན་སྲིད་སྐྱོང་མཆོག་གི་སྐུ་ཚེའི་ལོ་རྒྱུས་མདོར་བསྡུས། གཞན་ཡང་སྲིད་བློན་མཆོག་གི་དཔྱད་གཞིའི་སླད་བོད་དོན་སྐོར་གྱི་དཔེ་དེབ་ཁག་གཅིག་བཅས་སྲིད་བློན་མཆོག་གི་དྲུང་ཡིག་བརྒྱུད་ཉི་ཧོང་སྲིད་བློན་མཆོག་ལ་ཕུལ་ཡོད། །
