༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༡ ཟླ་ ༡༠ ཚེས་ ༢༣ རེས་གཟའ་སྤེན་པ་ཉིན། ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་དང་། ཐའེ་སྡོད་བོད་རིགས་ཚོགས་པ་ནས་གཙོ་འགན་ཐོག་ ༢༠༢༡ ལོ་ཐུན་མོང་གི་གཞི་རྟེན་འཚོལ་བ་ཞེས་རྒྱལ་སྤྱིའི་བགྲོ་གླེང་ཚོགས་འདུ་ཞིག་ཐའེ་ཝན་རྒྱལ་ས་ཐའེ་པེ་གྲོང་ཁྱེར་ནང་གོ་སྒྲིག་གནང་ཡོད་པ་རེད། ཐེངས་འདིའི་བགྲོ་གླེང་ཚོགས་འདུའི་བརྗོད་གཞི་གཙོ་བོ་ནི་༼ ཨ་རྒྱ་གཉིས་དབར་གདོང་ཐུག་གི་འགྱུར་འགྲོས་ཆེ་མོ་འོག་བོད་དང་། ཤར་ཏུར་ཀི་སི་ཐན། སོག་པོ། ཧོང་ཀོང་། ཐའེ་ཝན་གྱི་འགྱུར་ལྡོག ༽ ཅེས་པའི་བརྗོད་གཞིའི་ཐོག་ཡིན་པ་དང་། དེང་ནད་ཡམས་ཀྱིས་རྐྱེན་པས་ཨ་རི་དང་། འཇར་མི་ནི། ཨོ་སི་ཀྲི་ལི་ཡ། རྒྱ་གར་སོགས་ནང་གནས་སྡོད་བ་རྣམས་དྲ་རྒྱའི་ཐོག་ནས་གཏམ་བཤད་གནང་ཡོད་པ་རེད།
བགྲོ་གླེང་ཚོགས་འདུའི་དབུ་འབྱེད་མཛད་སྒོར་ཐོག་མར་ཐའེ་སྡོད་བོད་རིགས་ཚོགས་པའི་ཚོགས་གཙོ་བསྟན་འཛིན་རྣམ་དག་ལགས་ཀྱིས་སྐུ་མགྲོན་དང་ཚོགས་ཞུགས་ཡོངས་ལ་འཚམས་འདྲི་གནང་རྗེས། ཐེངས་འདིའི་སྐུ་མགྲོན་གཙོ་བོ་ཐའེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ལིན་ཁྲང་གཙོ་ལགས་ཀྱིས་གསུང་བཤད་གནང་བ་དང་། ཁོང་གིས་བོད་མི་ཚོས་མི་ལོ་ ༧༠ ལྷག་རིང་རྒྱ་དམར་གཞུང་དང་འཐབ་རྩོད་ཀྱི་ཉམས་མྱོང་ཕུན་སུམ་ཚོགས་པ་བསགས་ཡོད་པ་དེ་དེང་སང་ལས་འགུལ་བ་ཚོར་མིག་དཔེ་བལྟ་ས་ཞིག་ཆགས་བཞིན་པ་དང་། ཁོང་ཚོ་དང་ཁོང་ཚོ་འདྲ་བའི་སྡུག་བསྔལ་མྱང་བཞིན་པ་རྣམས་ལ་ག་དུས་མཁོ་བ་ཡིན་ནའང་། ང་ཁྱེད་ཚོའི་རྒྱབ་ཏུ་ཡོད་ཡོད་པ་ཡིན་ཞེས་གསུངས་པ་དང་ཆབས་ཅིག་ཟླ་བ་འདིར་ང་རང་ཕྲུ་གུ་བལྟ་སྐྱོང་བྱ་རྒྱུའི་འགན་བབས་ཀྱི་ཡོད་སྟབས་འདི་ནས་ཐོན་ཆོག་པ་ཞེས་གད་མོའི་ཐལ་སྒྲ་འོག་ཕྱིར་ཐོན།
ཐའེ་ཝན་གྲོས་ཚོགས་འགྲོ་བ་མིའི་ཐོབ་ཐང་སྐུལ་སྤེལ་ཚོགས་པའི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ཝང་ཏིང་ཡུས་ལགས་ཀྱིས་གདུག་རྩུབ་རྒྱ་དམར་གཞུང་གིས་འཛམ་གླིང་ཡོངས་དགྲ་ཁ་གཏད་དུ་ལངས་ཏེ་ཐའེ་ཝན་ལ་ཉིན་རྟག་པར་དམག་གི་སྡིག་ར་དང་། བོད་དང་ཤིན་ཅང་སོགས་གྲངས་ཉུང་མི་རིགས་ལ་མི་རིགས་རྩ་མེད་ཀྱི་སྲིད་བྱུས་ལག་བསྟར་བྱེད་བཞིན་པར་འཛམ་གླིང་གཉིད་སད་བཞིན་པ་རེད། ཐའེ་ཝན་ལ་མཚོན་ན་ཐའེ་ཝན་ཚོང་པ་ཚོས་ལོ་རེར་ཐའེ་ཝན་སྒོར་དུང་ཕྱུར་དྲུག་སྟོང་ལྷག་རྒྱ་ནག་ནས་ཚུར་འཐེན་ཏེ་ཐའེ་ཝན་ལ་མ་རྩ་འཛུགས་བཞིན་པ་དང་། དེ་རིང་བོད་པ་ཚོས་འགོ་འཁྲིད་དེ་བགྲོ་གླེང་གལ་ཆེན་འདི་དུས་དང་འཚམས་པ་ཞིག་ཆགས་ཀྱི་ཡོད་སྟབས། ང་ཚོ་ཚང་མས་མཉམ་རུབ་ཐོག་ལས་ཀ་བྱེད་ཐུབ་པའི་རེ་བ་དང་། ཚོགས་འདུ་ལེགས་གྲུབ་ཡོང་བའི་སྨོན་འདུན་ཡང་ཞུས།
ཐའེ་པེ་གྲོང་ཁྱེར་གྲོས་ཚོགས་བོད་དོན་རྒྱབ་སྐྱར་ཚོགས་ཆུང་གི་འགན་ཁུར་བ་གྲོང་ཁྱེར་གྲོས་ཚོགས་འཐུས་མི་སྲས་མོ་ལིན་དབྱི་མོང་ལགས་ཀྱིས་གསུང་བཤད་གནང་དོན། ང་ཚོ་ས་གནས་གྲོས་ཚོགས་ལ་དབུས་ནང་བཞིན་ཕྱི་སྲིད་དང་འབྲེལ་བའི་དབང་ཚད་མེད་ཀྱང་། གྲོས་ཚོགས་ནང་དུ་བོད་དོན་རྒྱབ་སྐྱོར་ཚོགས་པ་བཙུགས་ཏེ་དོ་སྣང་དང་རྒྱབ་སྐྱོར་གནང་མཁན་ཤིན་ཏུ་མང་། ང་ཚོས་ད་དུང་ཤིན་ཅང་རྒྱབ་སྐྱོར་ཚོགས་པ་འཛུགས་ཐུབ་རྒྱུའི་འཆར་གཞི་ཡོད། དེ་རིང་བོད་མི་ཚོས་འགོ་འཁྲིད་དེ་ཚོགས་འདུ་གལ་ཆེན་འདི་འདྲ་བསྐོང་བར་རྗེས་སུ་ཡི་རངས་ཞུ་རྒྱུ་དང་། ག་དུས་ཡིན་ནའང་ང་ཚོའི་སྒོ་བརྡུང་བར་ཕེབས་རོགས། ང་ཚོ་ཁྱེད་ཚོ་དང་མཉམ་དུ་ཡོད་ཅེས་གསུངས་ནས་མཛད་སྒོ་གྲོལ།
ཚོགས་ཐེངས་དང་པོ་ཐའེ་ཝན་དགེ་ཆེ་ཧོང་མོའོ་ལགས་ཀྱིས་གཙོ་སྐྱོང་གནང་བ་དང་། ཨ་རིར་གནས་བཞུགས་བོད་མཚོ་སྔོན་སྲིད་གྲོས་ཀྱི་ཨུ་ཡོན་ཟུར་པ་ལྕམ་ཝང་རུའེ་ཇིན་ལགས་ཀྱིས་༼ འཛམ་གླིང་གི་གནས་བབ་གསར་པའི་འོག་རྒྱ་ནག་དམར་གཞུང་གྱི་འགྱུར་ལྡོག་དང་ང་ཚོའི་གྲ་སྒྲིག ༽ ཅེས་པ་དང་། ཨོ་སི་ཀྲི་ལི་ཡར་གནས་བཞུགས་སི་ནི་ཚན་རྩལ་གཙུག་ལག་སློབ་ཆེན་གྱི་སློབ་དཔོན་ཧྥུང་ཁྲོང་དབྱི་ལགས་ཀྱིས་ ༼ རྒྱ་ནག་མཐའ་མཚམས་མི་རིགས་ཀྱི་གནད་དོན་ཆགས་རྐྱེན་ནི་རྒྱ་ནག་དམར་གཞུང་གིས་འགྲོ་བ་མིའི་གཞི་རྩའི་རིན་ཐང་ལ་དགྲ་ཁ་གཏད་བཟུང་བའི་དབང་གིས་ཡིན་པ། ༽ ཞེས་པའི་བརྗོད་གཞིའི་ཐོག་ནས་དྲ་ཐོག་གཏམ་བཤད་དང་། ཉི་ཧོང་གསར་འགྱུར་ཐའེ་ཝན་ཡན་ལག་སྡེ་ཚན་གྱི་འགན་འཛིན་སྐུ་ཞབས་ཧྲི་བྷན་མིང་ཕུའུ་ལགས་ཀྱིས་ ༼ ཞིའི་ཅིང་ཕིང་དབང་འོག་གི་རྒྱ་ནག ༽་ཅེས་པའི་བརྗོད་གཞིའི་ཐོག་གཏམ་བཤད་དང་། ཚོགས་ཞུགས་པའི་དྲི་བར་ལན་འདེབས་བཅས་གནང་།
ཚོགས་ཐེངས་གཉིས་པ་ཐའེ་ཝན་གྲོས་ཚོགས་འཐུས་མི་ཟུར་པ་སྐུ་ཞབས་ཇན་ཏཱ་ལགས་ཀྱིས་གཙོ་སྐྱོང་དང་། ད་ཆ་ཁེ་ཎ་ཌར་གནས་བཞུགས་ཧོང་ཀོང་མང་གཙོའི་ལས་འགུལ་བ་སྐུ་ཞབས་ཇན་ཀྲེ་ཅན་ལགས་ཀྱིས་་༼ ཧོང་ཀོང་ནི་བོད་དང་ཤར་ཏུར་ཀི་སི་ཐན་བཞིན་འགྱུར་ཟིན། ༽་ཞེས་པ་དང་། རྒྱ་ནག་དྲུག་བཞིའི་དོན་རྐྱེན་སྐབས་སློབ་ཕྲུག་གི་འགོ་ཁྲིད་ཡུ་གུར་བ་ཝུའེ་ཁེ་ཤེ་ཡིས་ ༼ དུས་རབས་གསར་པའི་འོག་རྒྱ་ནག་གི་གནས་བབ། ༽ ཅེས་པའི་བརྗོད་གཞིའི་ཐོག་དྲ་ཐོག་གཏམ་བཤད་དང་། ཞི་བདེ་ཡུན་བརྟན་འཕེལ་རྒྱས་བསྟི་གནས་ཁང་གི་འགན་སྐུ་ཞབས་ཧོང་ཅན་མིང་ལགས་ཀྱིས་ ༼ ཞིའི་ཅིང་ཕིང་གི་གོ་སྐབས་འོག་རྒྱལ་སྤྱིའི་ཁྲིམས་ལ་ཤུགས་སྣོན་དང་། རྩ་ཁྲིམས་ཅན་དུ་འགྱུར་ཤུགས་ཆེ་རུ་བཏང་སྟེ། རང་གཞན་སྲུང་སྐྱོབས་བྱ་དགོས། ༽ ཞེས་པ་དང་། སྐུ་ཚབ་དོན་གཅོད་འབའ་པ་སྐལ་བཟང་རྒྱལ་མཚན་ལགས་ཀྱིས་ ༼ ཨ་རི་དང་རྒྱ་དཀར་ནག་གཉིས་ཀྱི་གནས་བབ་གསར་པའི་འོག་བོད་ཀྱི་གནད་དོན་འཕེལ་ཕྱོགས། ༽ ཞེས་པའི་བརྗོད་གཞིའི་ཐོག་ནས་གཏམ་བཤད་དང་། ཚོགས་ཞུགས་ཀྱི་དྲི་བར་ལན་འདེབས་བཅས་གནང་།
ཕྱི་དྲོ་ཚོགས་ཐེངས་གསུམ་པ་ཐའེ་ཝན་རྒྱ་ནག་གི་འགྲོ་བ་མིའི་ཐོབ་ཐང་སེམས་ཁུར་མཐུན་ཚོགས་ཀྱི་ཚོགས་གཙོ་སྐུ་ཞབས་ཡཱང་ཤན་ཧུང་ལགས་ཀྱིས་གཙོ་སྐྱོང་དང་། གསར་འགོད་པ་སྲས་མོ་ཐའོ་ཀྲན་དབྱི་ལགས་ཀྱིས་ ༼ ཧོང་ཀོང་གི་སྐྱབས་བཅོལ་བ་ཚོས་སོ་སོའི་འཐབ་རྩོད་ལ་འབད་འབུངས་ཡོང་ཆེད་རོགས་མཐུན་ཇི་ལྟར་བྱེད་དགོས་སམ། ༽ ཞེས་པ་དང་། ཧོང་ཀོང་གི་འཐབ་རྩོད་པ་སྐུ་ཞབས་ལིན་རོང་ཅིའི་ལགས་ཀྱིས་ ༼ གུང་བྲན་སྲིད་དབང་འོག་ཏུ་བོད་ཀྱི་རིག་གཞུང་མདུན་ལམ་རྩ་མེད་དུ་འགྲོ་སྲིད་དམ། ༽ ཞེས་པའི་གཏམ་བཤད་གནང་རྗེས། འཇར་མི་ནིར་གནས་བཞུགས་སོག་པོ་མི་རིགས་སྐུ་ཞབས་ཞིའི་ཧེ་མིང་ལགས་ཀྱིས་དྲ་ཐོག་ ༼ ལྷོ་སོག་པོ་མི་རིགས་ཀྱིས་འབྱུང་འགྱུར་རྒྱ་ནག་ཐད་འབད་བརྩོན་བྱ་ཕྱོགས་དང་རེ་བ། ༽ ཞེས་པའི་གཏམ་བཤད་རྗེས་ཚོགས་ཞུགས་རྣམ་པའི་དྲི་བར་ལན་འདེབས་གནང་།
ཚོགས་ཐེངས་བཞི་པ་ཀུན་གསལ་འོད་སྣང་དུས་དེབ་རྩོམ་སྒྲིག་པས་གཙོ་སྐྱོང་དང་། དགེ་ཆེ་ཙེན་ཅན་ཡོན་ལགས་དང་། དགེ་ཆེ་ལིའི་ཡའོ་ཐན་ལགས། དྲུང་ཆེ་བསོད་ནམས་རྡོ་རྗེ་བཅས་ནས་རྒྱ་བོད་དབར་གྲོས་མཐུན་དོན་ཚན་བཅུ་བདུན་སྐོར་རྩོམ་ཡིག་སྒྲོག་སྦྱང་དང་ངོ་སྤྲོད། དགེ་ཆེ་སུའུ་ཅཱ་ཧུང་ལགས་ཀྱིས་དྲུང་ཆེ་ཟླ་བ་ཚེ་རིང་ལགས་ཐའེ་ཝན་དོན་གཅོད་སྐབས་བཅར་འདྲི་ཕྱོགས་སྒྲིག་གི་དཔེ་དེབ་སྐོར་ངོ་སྤྲོད། བོད་ནས་གསར་དུ་བཙན་བྱོལ་དུ་འབྱོར་བ་ཚེ་རིང་ཟླ་བ་ལགས་ཀྱིས་དྲ་ཐོག་ ༼ངས་མཐོང་བའི་བོད།༽ ཅེས་པའི་བརྗོད་གཞིའི་ཐོག་བོད་ནང་གི་གནས་སྟངས་ངོ་སྤྲོད་བཅས་གནང་། མཐའ་མ་བོད་རིགས་ཚོགས་པའི་ཚོགས་གཙོ་ནས་ཚོགས་ཞུགས་ཡོངས་ལ་ཐུགས་རྗེ་ཆེ་ཞུས་ཏེ་ཉིན་གཅིག་གི་བགྲོ་གླེང་ཚོགས་འདུ་ལེགས་པར་གྲུབ།
ཐེངས་འདིའི་བགྲོ་གླེང་ཚོགས་འདུ་སྔོན་ཚུད་ནས་དྲ་ལམ་ནས་ཐོ་འགོད་ཀྱིས་མི་གྲངས་དྲུག་ཅུ་ལྷག་མཉམ་ཞུགས་གནང་ཡོད་པ་དང་། ཐའེ་ཝན་དམངས་གཙོ་ཐེབས་རྩ་ནས་འགྲོ་གྲོན་གྱི་མཐུན་རྐྱེན་དང་། ཞི་བདེ་ཡུན་བརྟན་འཕེལ་རྒྱས་བསྟི་གནས་ཁང་ནས་གཞོགས་འདེགས་གནང་ཡོད་པ་རེད།
འདི་ག་ཐའེ་ཝན་དུ་ཕྱི་ལོ་ ༢༠༡༤ ལོ་ནས་བཟུང་ཐུན་མོང་གི་གཞི་རྟེན་འཚོལ་བ་ཞེས་རྒྱལ་སྤྱིའི་བགྲོ་གླེང་ཚོགས་འདུ་ལོ་རེར་ཐེངས་རེ་བསྐོང་ཚོགས་གནང་སྟེ་ད་བར་མི་ལོ་ ༨ ཙམ་འགྲོ་བཞིན་པ་དང་། ཚོགས་འདུ་འདི་ནི་རྒྱ་ནག་གིས་དོ་སྣང་ཆེ་ཤོས་བྱ་ཡུལ་ཞིག་ཆགས་ཀྱི་ཡོད་སྟབས། ཚོགས་ཞུགས་པ་འདྲ་མིན་སྣ་ཚོགས་དང་། གསར་འགྱུར་བརྒྱུད་ལམ་ཁག་ཏུའང་རྒྱ་ཁྱབ་སྤེལ་མུས་ཡིན་པ་བཅས། །