༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༡ ཟླ་ ༡༠ ཚེས་ ༨ ཉིན་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ཀྱི་ནང་ཆོས་འཛིན་གྲྭའི་ནང་སྐུ་ཚབ་དོན་གཅོད་དབུ་བཞུགས་ཐོག་ཆོས་ལུགས་རིས་མེད་ཀྱི་བླ་སྤྲུལ་དང་། མཁན་པོ། དགེ་བཤེས་བཅས་མཉམ་ཞུགས་ཀྱིས་ཐའེ་ཝན་ཞོན་ཙང་གཙུག་ལག་སློབ་གྲྭ་ཆེན་མོ་ནང་གཞུང་ཆེན་བཀའ་པོད་ལྔའི་ཆོས་རྩོད་བགྲོ་གླེང་གི་གྲ་སྒྲིག་ཚོགས་འདུ་བསྐོང་ཚོགས་གནང་བ་རེད།ཐོག་མར་དོན་གཅོད་འབའ་བ་སྐལ་བཟང་རྒྱལ་མཚན་ལགས་ཀྱིས་ཚོགས་ཞུགས་རྣམ་པར་དོན་གཅོད་ལས་ཁུངས་ཀྱི་ལས་དོན་སྙིང་བསྡུས་དང་། མ་འོངས་བྱེད་འཆར་ཁོངས་བོད་མི་ཕྱི་བསྐྱོད་ལག་དེབ་སེར་པོ་བསྣམས་ཕེབས་མཁན་གྱི་མཐོང་མཆན་དང་། ལྷག་དོན་ཐའེ་ཝན་ནང་ཆོས་ལུགས་རིས་མེད་ཀྱི་དགེ་འདུན་རྣམ་པ་རྒྱ་ཡིག་སློབ་གཉེར་གྱིས་མ་འོངས་པར་རྒྱ་མི་རིགས་ལ་ཆོས་བཤད་ཀྱི་དགེ་རྒན་ད་ལྟ་ནས་གྲ་སྒྲིག་དགོས་པ་སོགས་ངོ་སྤྲོད་གནང་རྗེས། སྐབས་བབ་ཕྱི་ཟླ་ ༡༢ ཚེས་ ༤ ཉིན་ཐའེ་ཝན་ཞོན་ཙང་གཙུག་ལག་སློབ་གྲྭ་ཆེན་མོའི་ནང་བོད་ཀྱི་ཐུན་མོང་མ་ཡིན་པའི་རིགས་ལམ་ངོ་སྤྲོད་སྐོར་མཁས་པའི་བགྲོ་གླེང་དང་། དགེ་འདུན་རྣམ་པས་རྒྱ་སྐད་ཐོག་གཞུང་ཆེན་བཀའ་པོད་ལྔ་གཞི་རྩར་བཟུང་ནས་རྩོད་པ་རྩོད་རྒྱུ། དེ་འབྲེལ་རྒྱ་ཡིག་ཐོག་རིགས་ལམ་ངོ་སྤྲོད་འགྲེམས་སྟོན། ད་བར་ཐའེ་ཝན་ནང་རྒྱ་ཡིག་ཐོག་ཡིག་སྒྱུར་ཟིན་པའི་རིགས་ལམ་སྐོར་གྱི་དཔེ་དེབ་འགྲེམས་སྟོན་གྱི་ལས་འཆར་གྲ་སྒྲིག་ཟིན་པ་ཁག་ངོ་སྤྲོད་གནང་།དེ་རྗེས་ཧ་ཤེན་རིན་པོ་ཆེ་མཆོག་གིས་ངོ་སྤྲོད་གནང་དོན། ཁ་སྔོན་གྲ་སྒྲིག་ཚོགས་འདུ་ཐེངས་དང་པོ་དོན་གཅོད་ལས་ཁུངས་སུ་ཚུགས་སྐབས་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པར་ལས་བགོས་གནང་བ་ལྟར། ཞིབ་འཇུག་ཚོགས་པའི་ནང་ཡོད་ཆོས་བརྒྱུད་རིས་མེད་ཀྱི་དགེ་འདུན་པ་ཚོར་གཙོ་བོ་རྒྱ་སྐད་ཤེས་མཁན་དང་། དེ་བཞིན་རིགས་ལམ་སློབ་གཉེར་གནང་མྱོང་མཁན་རྣམས་ཐེངས་འདིའི་ལས་འགུལ་ནང་མཉམ་ཞུགས་ཡོང་བའི་འབོད་སྐུལ་ཞུས་དོན་བཞིན་མི་གྲངས་བཅུ་གཉིས་ནས་ཐོ་འགོད་གནང་བའི་བརྒྱུད་རིམ་ངོ་སྤྲོད་གནང་།གྲ་སྒྲིག་ཚོགས་འདུ་འགན་འཁུར་གཙོ་བོ་བཞེས་མཁན་གྲས་དགེ་བཤེས་སྣང་སྣང་ལགས་ཀྱིས་རིས་སུ་མ་མཆིས་པའི་དགེ་འདུན་རྣམ་པས་མཐུན་འགྱུར་གང་ལེགས་གནང་བ་དང་། ཐུན་མོང་གི་ནུས་པ་མཉམ་སྤུངས་ཐུབ་པ་བྱུང་ཚེ་གྲུབ་འབྲས་ཐོན་ངེས་སོགས་གསུངས་རྗེས། དངོས་གཞིའི་ལས་འགུལ་སྐབས་རྩོད་པ་རྩོད་མཁན་མི་གྲངས་བཅུ་གཉིས་པོ་རྣམས་སྔ་རྒོལ་ཕྱི་རྒོལ་བཅས་ཁག་དྲུག་ལ་དབྱེ་བགོས་གནང་བར། ཧ་ཤེན་རིན་པོ་ཆེ་དང་མཁན་པོ་དངོས་གྲུབ་རྒྱ་མཚོ་ལགས་གཉིས་ཀྱིས་བོད་སྐད་ཐོག་ཕར་ཕྱིན་ལས་དགོས་སོགས་ཆོས་བཞི་དང་། དེ་མིན་རྒྱ་སྐད་ཐོག་རྩོད་པ་རྩོད་མཁན་བསྟན་འཛིན་རྣམ་གྲོལ་རིན་པོ་ཆེ་དང་རྒན་འཇམ་དབྱངས་ཀུན་དགའ་ལགས་ནས་འདུལ་བའི་སྐོར། དགེ་བཤེས་ཆོས་དབང་ལགས་དང་མཁན་པོ་ཡོན་ཏན་རྒྱ་མཚོ་ལགས་ནས་ཕར་ཕྱིན་སྐོར། དགེ་བཤེས་འཇམ་དཔལ་ཆོས་འཛིན་ལགས་དང་དགེ་བཤེས་བསྟན་པ་རྒྱལ་མཚན་ལགས་ནས་དབུ་མའི་སྐོར། དགེ་བཤེས་བློ་བཟང་རྒྱལ་མཚན་ལགས་དང་དགེ་བཤེས་བློ་བཟང་ཡོན་ཏན་ལགས་ནས་མངོན་པའི་སྐོར། དགེ་བཤེས་བློ་བཟང་ཚེ་རིང་ལགས་དང་དགེ་བཤེས་ཐུབ་བསྟན་ནོར་བུ་ལགས་ནས་ཚད་མའི་ཐོག་ནས་རྩོད་པ་རྩོད་རྒྱུའི་ལས་འཆར་བཀོད་སྒྲིག་དང་། རྒྱ་སྐད་ཐོག་ནས་རྩོད་པ་རྩོད་སྐབས་མིང་ཚིག་སོགས་བེད་སྤྱོད་བྱ་སྟངས་ཐད་དགའ་ལྡན་བྱང་རྩེ་གྲྭ་ཚང་དུ་སློབ་གཉེར་གནང་བཞིན་པ་ཐའེ་ཝན་བ་བློ་བཟང་བྱམས་ཆེན་ལགས་ཀྱིས་བོད་ཀྱི་རིགས་ལམ་དང་འབྲེལ་བའི་གཞུང་ལུགས་རྒྱ་སྒྱུར་གནང་ཡོད་སྟབས། ཁོང་ལ་གོ་བསྡུར་དང་དོགས་གཅོད་ཞུ་རྒྱུ་བཅས་ཐུགས་གཏན་འཁེལ་བ་མ་ཟད། དེ་བཞིན་ཚོགས་ཞུགས་ཡོངས་ནས་རང་རང་གི་དགོངས་ཚུལ་ལྷུག་པོ་གནང་བ་བརྒྱུད་ལས་འགུལ་སྤེལ་ཕྱོགས་ཐད་སྤྱི་མོས་ཀྱི་ཐུགས་གཏན་འཁེལ་བ་ཁག་ལག་བསྟར་གནང་འཆར་ཡིན་པ་རེད།ཐེངས་འདིའི་ལས་འགུལ་གཙོ་བོ་ཐའེ་ཝན་ཞོན་ཙང་གཙུག་ལག་སློབ་ཆེན་ཆོས་དང་རིག་གཞུང་ཚན་ཁག་དང་། ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་གཙོ་འགན་ཐོག ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པ་དང་། ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་མཐུན་ཚོགས་ནས་གཞོགས་འདེགས། གཞན་ཡང་ཆོས་བརྒྱུད་རིས་མེད་འཛམ་གླིང་ཞི་བདེའི་བཀའ་ཆོས་སྨོན་ལམ་ཆེན་མོ་གོ་སྒྲིག་ཚོགས་ཆུང་གི་འགྲོ་གྲོན་ལྷག་མ་ཡོད་ཁོངས་ནས་འགྲོ་སོང་ཐད་རོགས་རམ་གནང་འཆར་ཡིན་པ་བཅས། །