༄༅། །ཕྱི་ལོ་ ༢༠༢༡ ཟླ་ ༡༠ ཚེས་ ༢༣ ཉིན་ཁེན་བྷེ་ར་བོད་རིགས་མཐུན་ཚོགས་ཀྱི་རྒྱུན་ལས་གསར་རྙིང་དབར་རྩིས་སྤྲོད་རྩིས་ལེན་གྱི་མཛད་སྒོ་ཞིག་ཚོགས་ཡོད།
དེ་ཡང་ཁེན་བྷེ་ར་བོད་རིགས་མཐུན་ཚོགས་ཀྱི་རྒྱུན་ལས་གསར་འདེམས་བྱུང་བའི་ཁྲོད་སྐལ་བཟང་ཚེ་རིང་ལགས་ཚོགས་གཙོ་དང་། དྭགས་པོ་བསྟན་འཛིན་སྒྲོལ་མ་ལགས་ཚོགས་གཞོན་དུ་བདམས་ཐོན་བྱུང་ཡོད། མཛད་སྒོའི་ཐོག་མར་དེ་སྔའི་ཚོགས་གཞོན་ཟླ་སྒྲོན་ལགས་ཀྱིས་ལས་བསྡོམས་སྙན་སྒྲོན་ཞུས་གྲུབ་བསྟུན་རྩིས་པ་ཟླ་བ་སྒྲོལ་མ་ལགས་ཀྱིས་ཁེན་བྷེ་ར་བོད་རིགས་མཐུན་ཚོགས་ཀྱི་རྩིས་ཁྲ་སྙན་སྒྲོན་ཞུས་ཡོད། དེ་རྗེས་ཚོགས་གཙོ་ཟུར་པ་སྐལ་བཟང་ཡོན་ཏན་ལགས་ཀྱིས་འཚམས་འདྲིའི་གསུང་བཤད་དང་སྦྲགས་ལས་དོན་ལམ་ལྷོངས་ཡོང་བའི་སྨོན་འདུན་གནང་ཡོད། དེ་ནས་ཚོགས་གཙོ་སྐལ་བཟང་ཚེ་རིང་ལགས་ཀྱིས་ལས་དོན་ཧུར་ཐག་གནང་རྒྱུའི་ཁས་ལེན་ཡོད་སྐོར་སོགས་གསུངས།
སྐབས་དེར་ཨོསྟྲེ་ལི་ཡཱ་སྐུ་ཚབ་དོན་གཅོད་ཀརྨ་སེངྒེ་ལགས་སྐུ་མགྲོན་གཙོ་བོར་མགྲོན་འབོད་ལྟར་ཆེད་ཕེབས་ཀྱིས་རྒྱུན་ལས་ཟུར་པ་རྣམས་ཀྱིས་འདས་པའི་དུས་ཡུན་ལོ་གཉིས་རིང་ལྷག་བསམ་ཟོལ་མེད་ཀྱི་ཐོག་ནས་ལས་དོན་ཧུར་ཐག་གནང་བར་ཐུགས་རྗེ་ཆེ་ཞུས་ཡོད། ཕྱོགས་མཚུངས་ཁོང་གིས་རྒྱུན་ལས་གསར་པར་འཚམས་འདྲི་དང་འབྲེལ་བོད་ཀྱི་ཐུན་མིན་ངོ་བོ་དང་རིག་གཞུང་སོགས་མི་ཉམས་རྒྱུན་འཛིན་དང་། བོད་མིའི་འཐབ་རྩོད་ཀྱི་སྙིང་སྟོབས་མ་ཞུམ་པའི་ཐོག་ནས་གསོན་པོར་གནས་འཇུག་དགོས་པ། བོད་མི་གཞོན་སྐྱེས་རྣམས་ནས་རང་ཉིད་ཀྱི་ཐུན་མིན་ངོ་བོ་དང་རིག་གཞུང་སོགས་མ་བརླག་པར་གཙོ་འཛིན་གནང་ཐོག་ས་གནས་ཡུལ་མི་དང་ལྷན་འབྲེལ་བ་བྱེད་དགོས་རྒྱུ་ཧ་ཅང་གལ་ཆེན་པོ་ཡིན་སྐོར། ཨོསྟྲེ་ལི་ཡཱ་སྐུ་ཚབ་དོན་གཅོད་ཁང་ནས་རྒྱུན་ལས་གསར་པར་རྒྱབ་སྐྱོར་དང་མཐུན་འགྱུར་གནང་རྒྱུ་ཡིན་སྐོར་སོགས་ཀྱི་གསུང་བཤད་གནང་སྟེ་ཁེན་བྷེ་ར་བོད་རིགས་མཐུན་ཚོགས་དང་ཨོསྟྲེ་ལི་ཡཱ་སྐུ་ཚབ་དོན་གཅོད་ཁང་གི་ཚབ་ཞུས་ཏེ་རྒྱུན་ལས་གསར་རྙིང་རྣམས་ལ་མཇལ་དར་ཕུལ་གནང་ཡོད་པ་བཅས།། 
