༄༅། །རྒྱ་ནག་གཞུང་གིས་མགོ་ལོག་བོད་རིགས་རང་སྐྱོང་ཁུལ་གྱི་བོད་མི་ཏང་ཡོན་ལས་བྱེད་པ་དང་ལས་ཡོལ་ཞུས་ཟིན་པ་རྣམས་ལ་ཆོས་ཕྱོགས་ཀྱི་བྱེད་སྒོར་ཞུགས་མི་ཆོག་པ་མ་ཟད། ཆོས་ཀྱི་བྱ་བ་གང་ཡང་སྒྲུབ་མི་ཆོག་པ་བཟོས་འདུག
དེ་ཡང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནང་ཁང་གིས་གནས་ཚུལ་སྤེལ་གསལ་ལྟར་ན། ཉེ་ཆར་རྒྱ་ནག་གཞུང་གིས་མགོ་ལོག་དར་ལག་རྫོང་ཁོངས་ཀྱི་བོད་རིགས་ཏང་ཡོན་ལས་བྱེད་པ་རྣམས་ཀྱིས་ཕྱག་དང་སྐོར་བ་བྱེད་པ་དང་ལག་ཏུ་ཕྲེང་བ་འཛིན་པ། ཆོས་མཇལ་དུ་འགྲོ་བ་སོགས་བྱེད་མི་ཆོག་པ་མ་ཟད། ཁང་ཁྱིམ་སོགས་སུ་བསྔོག་བཤེར་བྱས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་ཉར་བར་དམ་དྲག་ཆེས་ཆེར་བྱེད་བཞིན་འདུག་ཅིང་། ལྐོག་ཏུ་མི་བཏང་ནས་ནམ་རྒྱུན་ཆོས་ལུགས་ཀྱི་བྱེད་སྒོ་སོགས་ལ་ཞུགས་ཀྱི་ཡོད་མེད་སོ་ལྟ་བྱེད་བཞིན་ཡོད།
༼ བོད་རང་སྐྱོང་ལྗོངས་ཟེར་བའི་ནང་དུའང་དཀའ་ངལ་གཅིག་མཚུགས་འཕྲད་བཞིན་པ།༽ འདི་ལོའི་ལོ་འགོར་རྒྱ་ནག་གིས་བཅད་བགོས་བྱས་པའི་བོད་རང་སྐྱོང་ལྗོངས་ཟེར་བའི་ནང་དུ་དོན་ཚན་དྲུག་ཅན་གྱི་ཡིག་ཆ་ཞིག་བཀྲམས་ནས་བོད་རིགས་ཏང་ཡོན་ལས་བྱེད་པ་དང་ལས་ཟུར་པ་རང་ཉིད་ཙམ་མ་ཟད། རང་གི་བཟའ་མི་བུ་ཕྲུག་རྣམས་ཀྱང་དགོན་པར་ཆོས་མཇལ་དུ་གཏོང་བའམ་ཁྱིམ་དུ་ཞབས་བརྟན་ཚོགས་པ་སོགས་ཆོས་ལུགས་ཀྱི་བྱེད་སྒོ་གང་དུའང་ཞུགས་མི་ཆོག་པ་མ་ཟད་རང་རང་གི་བཟའ་མི་བུ་ཕྲུག་རྣམས་ལ་གུང་ཁྲན་ཏང་གི་དད་སེམས་དང་དམིགས་ཡུལ། ཐོག་མའི་བསམ་འདུན་སོགས་ཀྱི་སྐོར་ལ་ངེས་པར་དུ་སློབ་སྦྱོང་སྤྲོད་དགོས་པའི་བཀོད་ཁྱབ་བཏང་བ་དང་། མར་ཁེ་སིའི་རིང་ལུགས་ཀྱི་ལྷ་མེད་སྨྲ་བ་བརྟན་པོ་ཞིག་བྱས་ཏེ་གུང་ཁྲན་ཏང་ལ་བློ་གཅིག་སེམས་གཅིག་གིས་དགའ་ཞེན་དང་ཏཱ་ལའི་བླ་མ་དང་ཁོང་གི་རྗེས་འབྲང་པ་རྣམས་ལ་མཐའ་གཅིག་ཏུ་ངོ་རྒོལ་དགོས་ཚུལ་བཤད་འདུག
ཕྱི་ལོ་ ༢༠༡༩ ཟླ་ ༨ པའི་ནང་དུའང་རྒྱ་གཞུང་གིས་བོད་རང་སྐྱོང་ལྗོངས་ཟེར་བའི་ནང་དུ་བོད་རིགས་ཏང་ཡོན་ལས་ཟུར་རྣམས་ཆོས་ལུགས་ཀྱི་བྱེད་སྒོ་གང་དུའང་ཞུགས་མི་ཆོག་པའི་བཀོད་ཁྱབ་བཏང་བ་དང་། འབྲེལ་ཡོད་ལྷན་ཁང་ཁག་ནས་སྒྲིག་འགལ་བྱས་པ་རྣམས་ཀྱི་མིང་དང་ཉེས་པ་གཏོང་ཕྱོགས་ཀྱི་བསམ་འཆར་སྤྲོད་དགོས་པའི་ལམ་སྟོན་བྱས་འདུག
༼ སློབ་གསོ་དག་ཐེར་གྱི་ལས་འགུལ་གཉིས་པ། ༽ ཁ་སྔོན་ཟླ་ ༩ ཚེས་ ༢༥ ཉིན་མཚོ་སྔོན་ཞིང་ཆེན་དམར་ཤོག་ཚོགས་པའི་དྲུང་ཆེ་ཝང་ཅན་ཅུན་གྱིས་ཟླ་ ༩ པའི་ཚེས་ ༡༣ ཉིན་པེ་ཅིང་དུ་ཚོགས་པའི་ཀྲུང་དབྱང་སྲིད་ཁྲིམས་དཔུང་ཁག་སློབ་གསོ་དག་ཐེར་གྱི་སྐབས་དྲུག་པའི་ཚོགས་འདུའི་དགོངས་དོན་རྣམས་མཚོ་སྔོན་དུ་ལག་ལེན་དོན་འཁྱོལ་བྱ་རྒྱུ་ཡིན་ཚུལ་བཤད་པ་དང་། རྒྱ་ནག་གི་སྲིད་ཁྲིམས་དཔུང་ཁག་སློབ་གསོ་དག་ཐེར་བྱེད་པའི་འགོ་ཁྲིད་ཚོགས་ཆུང་ཟེར་བའི་ཚོགས་གཙོ་གུའོ་ཧྲེང་ཀན་གྱིས། “ཏང་ཡོན་རྣམ་པས་སློབ་གསོ་དག་ཐེར་གྱི་ལས་འགུལ་ཐེངས་གཉིས་པའི་བསྟན་དོན་རྣམས་ལག་ལེན་དོན་འཁྱོལ་ཐུབ་པ་དགོས་ཤིང་ས་ཁུལ་གནད་འགག་ཅན་དུ་བདེ་འཇགས་དོ་དམ་པའི་འགན་འཁྲི་སྔར་ལས་ཇེ་ཆེར་བཏང་སྟེ་ལུག་ནག་པོ་དང་མཁྲེགས་འཛིན་ཅན་གྱི་ནད་རྙིང་མ་ལུས་པ་ཤུལ་མེད་དུ་གཏོང་དགོས། ” ཞེས་བཤད་འདུག་པ་བཅས། །
