༄༅། །ཕྱི་ལོ་ ༢༠༢༡ ཟླ་ ༡༠ ཚེས་ ༢༢ ཉིན་ཨ་རི་རྒྱལ་ས་མངའ་ཁུལ་གྱི་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་འབུལ་བཞེས་མཛད་ནས་ལོ་ངོ་  ༡༤ འཁོར་བའི་དུས་དྲན་མཛད་སྒོ་གཟབ་རྒྱས་ངང་ཚོགས་གནང་ཡོད། ཨ་རི་རྒྱལ་ས་མངའ་ཁུལ་གྱི་བོད་རིགས་སྤྱི་མཐུན་ཚོགས་པས་མགྲོན་འབོད་ལྟར། བྱང་ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་གཙོས་བྱང་ཨ་རི་སྐུ་ཚབ་དོན་ཁང་གི་ལས་བྱེད་རྣམ་པ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་འབུལ་བཞེས་མཛད་ནས་ལོ་ངོ་ ༡༤ འཁོར་བའི་དུས་དྲན་མཛད་སྒོར་མཉམ་ཞུགས་གནང་ཡོད།དེ་ཡང་མཛད་སྒོའི་སྐུ་མགྲོན་གཙོ་བོར་བྱང་ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཆེད་ཕེབས་ཀྱིས་ཨ་རི་གྲོས་ཚོགས་ཀྱི་གསེར་གྱི་གཟེངས་རྟགས་ཀྱི་གལ་གནད་དང་། ཨ་རིའི་གཞུང་གི་ངོས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མི་རྣམས་ལ་ངོས་འཛིན་གནང་ཕྱོགས་སྐོར་གསུངས། གཞན་ཡང་ཁོང་གིས་ཨ་རི་གྲོས་ཚོགས་ཀྱི་གསེར་གྱི་གཟེངས་རྟགས་ཀྱིས་བོད་མི་རྣམས་ལ་དྲང་བདེན་གྱི་འཐབ་རྩོད་ལ་རྒྱུན་སྐྱོང་བྱེད་པར་སེམས་ཤུགས་བསྐྱེད་དུ་བཅུག་ཡོད་པའི་སྐོར་དང་། བོད་མིའི་ཆོས་དང་རིག་གཞུང་། སྐད་ཡིག ངོ་བོ་བཅས་མི་ཉམས་རྒྱུན་འཛིན་གནང་དགོས་པ། བོད་ཀྱི་བདེན་མཐའ་གསལ་བར་རྒྱ་ནག་གཞུང་ལ་ཤུགས་རྐྱེན་སྤྲད་དེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་གྲོས་མོལ་ཞུ་འཇུག་དགོས་པ་སོགས་ཀྱི་སྐོར་གསུངས།དེ་རྗེས་རྒྱལ་སྤྱིའི་བོད་དོན་ལས་འགུལ་ཁང་གི་བར་བརྒལ་འགན་འཛིན་བུ་ཆུང་ཚེ་རིང་ལགས་ཀྱིས་གསུང་བཤད་གནང་ཡོད། དགོང་དྲོ་ཨ་རི་རྒྱལ་ས་མངའ་ཁུལ་གྱི་བོད་རིགས་སྤྱི་མཐུན་ཚོགས་པས་བོད་ཀྱི་རིག་གཞུང་དང་སྐད་ཡིག་སློབ་གྲྭས་རྩོམ་ཡིག་དང་། རི་མོ། ཡིག་གཟུགས་བཅས་འགྲན་སྡུར་ཁྲོད་ཨང་རིམ་ཡང་རྩེར་སོན་པའི་སློབ་ཕྲུག་རྣམས་ལ་ལག་འཁྱེར་དང་གཟེངས་རྟགས་གནང་ཡོད། ཕྱོགས་མཚུངས་ཨ་རི་རྒྱལ་ས་མངའ་ཁུལ་གྱི་བོད་རིགས་སྤྱི་མཐུན་ཚོགས་པའི་རྒྱུན་ལས་རྣམས་ཀྱིས་བོད་ཀྱི་ཆབ་སྲིད་བཙོན་ཟུར་སྟག་སྣ་འཇིགས་མེད་བཟང་པོ་ལགས་དམ་པ་དེ་ཉིད་ཀྱིས་བརྩམས་པའི་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་ཀྱི་བསྟོད་གླུ་བཏང་གནང་ཡོད།།