༄༅། །བོད་མིའི་མང་གཙོ་དབུ་བརྙེས་ཏེ་ལོ་ངོ་ ༦༡ འཁོར་བའི་དུས་ཆེན་སྲུང་བརྩི་ཞུ་སླད་ཕྱི་ལོ་ ༢༠༢༡ ཟླ་ ༩ ཚེས་ ༢ ཉིན་ཨོསྟྲེ་ལི་ཡཱ་སྐུ་ཚབ་དོན་གཅོད་ཁང་དང་ཁེན་བྷེ་ར་བོད་རིགས་མཐུན་ཚོགས་གཉིས་ཀྱི་གོ་སྒྲིག་འོག་དྲ་ཐོག་ནས་བོད་མིའི་མང་གཙོ་ཞེས་པའི་བརྗོད་གཞིའི་ཐོག་བགྲོ་གླེང་ཚོགས་ཡོད། དྲ་ཐོག་ནས་བགྲོ་གླེང་ཚོགས་དགོས་པའི་དམིགས་ཡུལ་གཙོ་བོ་ནི། ཨོསྟྲེ་ལི་ཡཱ་ནང་གནས་སྡོད་བོད་མི་སྤྱི་དང་། ལྷག་པར་བཙན་བྱོལ་བོད་མི་རྣམས་ལ་མང་གཙོའི་སྐོར་གོ་རྟོགས་སྤེལ་ཆེད་ཡིན།
དེ་ཡང་བགྲོ་གླེང་གི་ཐོག་མར་ཨོསྟྲེ་ལི་ཡཱ་སྐུ་ཚབ་དོན་གཅོད་ཀརྨ་སེང་གེ་ལགས་ཀྱིས་བོད་མིའི་མང་གཙོ་དུས་ཆེན་ཐེངས་ ༦༡ པའི་མཛད་སྒོར་བཀའ་ཤག་གིས་གསུང་བཤད་གནང་བ་དེ་སྒྲོགས་སྦྱང་གནང་རྗེས་བཙན་བྱོལ་བོད་མིའི་མང་གཙོ་འཕེལ་རིམ་སྐོར་གསུང་བཤད་གནང་ཡོད། སྐབས་བཅུ་བདུན་པའི་བདམས་ཐོན་ཨོ་སི་ཀྲོ་ལི་ཡའི་ཁུལ་གྱི་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་ཀྱིས་མང་གཙོའི་དབྱེ་བ་དང་ཁྱད་ཆོས། དབང་ཆ་ལྗིད་མཉམ་སྟངས་འཛིན། འོས་བསྡུའི་ཐོབ་ཐང་། ཁྲིམས་ཀྱི་དབང་སྒྱུར་སོགས་ཀྱི་སྐོར་གསུངས།
ཁེན་བྷེ་ར་བོད་རིགས་མཐུན་ཚོགས་ཀྱི་མ་འོངས་ཚོགས་གཙོ་སྐལ་བཟང་ཚེ་རིང་ལགས་ཀྱིས་བཙན་བྱོལ་བོད་མིའི་མང་གཙོ་དང་ཨོསྟྲེ་ལི་ཡཱ་མང་གཙོ་གཉིས་ཀྱི་ཁྱད་པར་དང་འདྲ་མཚུངས་སོགས་ཀྱི་སྐོར་གསུངས། ཨོསྟྲེ་ལི་ཡཱ་རྒྱལ་ཡོངས་མཐོ་སློབ་ཀྱི་མཐོ་རིམ་སློབ་དཔོན་ཟུར་པ་བསྟན་འཛིན་ཆོས་འཕགས་ལགས་ཀྱིས་བོད་མིའི་མང་གཙོའི་ཁྱད་ཆོས་དང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བཙན་བྱོལ་བོད་མིའི་མང་གཙོའི་སྒྲིག་འཛུགས་གསར་བཏོད་མཛད་པ། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་ལམ་སྟོན་བཀའ་སློབ་ཕེབས་པ་ལྟར་བོད་མི་ཡོངས་ནས་དེ་ལྟར་ཤར་སྐྱོད་གནང་དགོས་པ་སོགས་ཀྱི་སྐོར་གསུངས།
བོད་མིའི་སྒྲིག་འཛུགས་ཀྱི་གཞུང་ཞབས་ཟུར་པ་འཇིགས་མེད་པ་སངས་ལགས་ཀྱིས་བཙན་བྱོལ་བོད་མིའི་མང་གཙོའི་སྒྲིག་འཛུགས་སྤྱི་དང་། དེ་བཞིན་བོད་མིའི་མང་གཙོའི་ལོ་རྒྱུས་ཀྱི་དཀྱོགས་མཚམས་གལ་ཆེན་ཁག་གཅིག་གི་སྐོར་གསུངས། ཨོ་གླིང་རྒྱལ་ཡོངས་དང་ཨེ་སི་ཊི་བོད་རིགས་མཐུན་ཚོགས་ཀྱི་ཚོགས་གཙོ་སྐལ་བཟང་ཡོན་ཏན་ལགས་ཀྱིས་བགྲོ་གླེང་གཙོ་སྐོང་གནང་ཡོད་པ་བཅས།།
