༄༅། །ཕྱི་ལོ་ ༢༠༢༡ ཟླ་ ༩ ཚེས་ ༢ ཉིན་ཨིན་ཡུལ་གྱི་རྒྱལ་ས་ལོན་ཌོན་གྱི་ནུབ་བྱང་ཕྱོགས་སུ་རྟེན་གཞི་བྱས་པའི་ལོན་ཌོན་བྷོ་རོབ་ཝལ་ཐིམ་ཧྥོར་རད་སི་ཊི་གྲོང་སྡེ་ལྷན་ཁང་ (the London Borough of Waltham Forest Council) གི་ཚོགས་ཁང་གི་མདུན་ཐང་དུ་བོད་མིའི་མང་གཙོ་དབུ་བརྙེས་ཏེ་ལོ་ངོ་ ༦༡ འཁོར་བའི་དུས་ཆེན་སྲུང་བརྩིའི་མཛད་སྒོ་གཟབ་རྒྱས་ངང་ཚོགས་ཡོད།
དེ་ཡང་ལོན་ཌོན་བྷོ་རོབ་ཝལ་ཐིམ་ཧྥོར་རད་སི་ཊི་གྲོང་སྡེ་ལྷན་ཁང་གི་ཚོགས་མི་བྷར་བྷེ་རི་ (Cllr Berberi) ལགས་ཀྱི་གོ་སྒྲིག་འོག་གྲོང་སྡེའི་སྤྱི་ཁྱབ་ཨེ་ལི་ཛེ་བྷི་ཐི་ (Elizabeth Baptise) ལགས་དང་། གྲོང་སྡེའི་ཚོགས་མི་ཁག་གཅིག་དང་ལས་བྱེད། བོད་དོན་རྒྱབ་སྐྱོར་བ། དེ་བཞིན་ཨིན་ཡུལ་སྐུ་ཚབ་དོན་གཅོད་ཁང་དང་། ས་གནས་བོད་རིགས་ཚོགས་པ་སོགས་ལྷན་འཛོམས་ཀྱིས་ཝལ་ཐིམ་ཧྥོར་རད་སི་ཊི་གྲོང་སྡེའི་ཚོགས་ཁང་གི་མདུན་ཐང་དུ་བོད་ཀྱི་རྒྱལ་དར་སྒྲེང་འཛུགས་གནང་སྟེ་བོད་མིའི་མང་གཙོ་དབུ་བརྙེས་ཏེ་ལོ་ངོ་ ༦༡ འཁོར་བའི་དུས་ཆེན་སྲུང་བརྩི་མཛད་སྒོ་གཟབ་རྒྱས་ངང་ཚོགས་ཡོད། དབུ་འབྱེད་མཛད་སྒོའི་ཐོག་མར་གྲོང་སྡེ་ལྷན་ཁང་གི་ཚོགས་མི་བྷར་བྷེ་རི་ལགས་ཀྱིས་ཕེབས་བསུའི་གསུང་བཤད་གནང་བ་དང་སྦྲགས་སྐུ་མགྲོན་གཙོ་བོ་ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ངོ་སྤྲོད་གནང་ཡོད།སྐབས་དེར་ཁོང་གིས་བོད་མིའི་མང་གཙོ་དབུ་བརྙེས་ཏེ་ལོ་ངོ་ ༦༡ འཁོར་བའི་དུས་ཆེན་ནི་བོད་མིར་མཚོན་ན་གལ་ཆེན་པོ་ཆགས་ཡོད་པ་མ་ཟད། དུས་ཆེན་དེས་བོད་མིའི་ཚད་མཐོའི་མང་གཙོའི་རིང་ཐང་དང་། རིག་གཞུང་། སྲོལ་རྒྱུན་སོགས་མཚོན་གྱི་ཡོད། ཅེས་དང་། དུས་ཆེན་སྲུང་བརྩིའི་མཛད་སྒོ་དེས་ཝལ་ཐིམ་ཧྥོར་རད་སི་ཊིའི་ཚོགས་སྡེ་དང་ཨིན་ཡུལ་སྤྱི་ལའང་ཞབས་འདེགས་སྒྲུབ་གནང་གི་ཡོད། ཅེས་གསུངས།

གྲོང་སྡེའི་སྤྱི་ཁྱབ་ལྕམ་སྐུ་ཨེ་ལི་ཛེ་བྷི་ཐི་ལགས་ཀྱིས་བོད་མིའི་མང་གཙོ་དབུ་བརྙེས་ཏེ་ལོ་ངོ་ ༦༡ འཁོར་བའི་དུས་ཆེན་སྲུང་བརྩིའི་མཛད་སྒོར་བཅར་རྒྱུའི་གོ་སྐབས་བྱུང་བར་དགའ་ཚོར་ཆེན་པོ་བྱུང་སྐོར་དང་། ཝལ་ཐིམ་ཧྥོར་རད་སི་ཊི་ཁུལ་དུ་གནས་སྡོད་བོད་མི་རྣམས་ལ་རྒྱབ་སྐྱོར་གནང་རྒྱུའི་ཁས་ལེན་གནང་། ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་གྲོང་སྡེའི་སྤྱི་ཁྱབ་ལྕམ་སྐུ་ཨེ་ལི་ཛེ་བྷི་ཐི་ལགས་དང་གྲོང་སྡེ་ལྷན་ཁང་གི་ཚོགས་མི་བྷར་བྷེ་རི་ལགས་མཛད་སྒོར་ཕེབས་པར་ཐུགས་རྗེ་ཆེ་ཞེས་ཞུས་པ་དང་འབྲེལ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དགོངས་གཞི་འོག་བཙན་བྱོལ་དུ་བོད་མི་རྣམས་ནས་མང་གཙོ་ཚད་དང་ལྡན་པ་ལོངས་སུ་སྤྱོད་བཞིན་ཡོད་པ་དང་། བོད་ནང་གི་བོད་རིགས་སྤུན་ཟླ་ཚོས་བོད་ཀྱི་རྒྱལ་དར་སྒྲེང་འཛུགས་དང་། སྨྲ་བརྗོད་རང་དབང་ལོངས་སུ་སྤྱད་ན་རྒྱ་གཞུང་གིས་བཙོན་འཇུག་བྱེད་ཀྱི་ཡོད། ཅེས་དང་། ཁྱེད་རྣམ་པས་རྒྱབ་སྐྱོར་གནང་བ་དེས་རྒྱ་ནག་དམར་ཤོག་གཞུང་གི་དྲག་གནོན་འོག་བཞུགས་བཞིན་པའི་བོད་ནང་གི་བོད་མི་ཚོའི་སེམས་ལ་བདེ་སྐྱིད་དང་སེམས་ཤུགས་བསྐྲུན་ངེས་ཡིན། ཞེས་གསུངས།

མཛད་སྒོའི་ཐོག་ཝལ་ཐིམ་ཧྥོར་རད་སི་ཊི་ཁུལ་གྱི་བོད་མི་གཞོན་སྐྱེས་ཁག་གཅིག་ནས་བོད་ཀྱི་སྲོལ་རྒྱུན་གཞས་སྣ་གཟིགས་འབུལ་ཞུས་ཡོད། མཛད་སྒོར་ཕེབས་པའི་བོད་མི་ཡོངས་ནས་གྲོང་སྡེའི་སྤྱི་ཁྱབ་ལྕམ་སྐུ་ཨེ་ལི་ཛེ་བྷི་ཐི་ལགས་དང་། གོ་སྒྲིག་གནང་མཁན་གྲོང་སྡེ་ལྷན་ཁང་གི་ཚོགས་མི་བྷར་བྷེ་རི་ (Cllr Berberi) ལགས་ལ་ཁ་བཏགས་རེ་ཕུལ་ཏེ་ཐུགས་རྗེ་ཆེ་ཞུས་ཡོད་པ་བཅས།།