༄༅། །ཁེ་ན་ཌའི་རྒྱལ་ཡོངས་འོས་བསྡུ་ཆེན་མོའི་ཁྲོད་ཁེ་ན་ཌའི་སྲིད་བློན་ལས་ཐོག་སྐུ་ཞབས་ཇེ་སི་ཊིན་ཊོ་ཌུ་ (Justin Trudeau) མཆོག་གི་གུ་ཡངས་ཆབ་སྲིད་ཚོགས་པར་རྒྱལ་ཁ་ཐོབ་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༢༡ ཟླ་ ༩ ཚེས་ ༢༢ ཉིན་སྲིད་བློན་མཆོག་ལ་འཚམས་འདྲིའི་གསུང་འཕྲིན་སྩལ་བའི་ནང་འཁོད་དོན། ཏོག་དབྱིབས་གཉན་རིམས་ཁྱབ་བརྡལ་ཕྱིན་པས་རྐྱེན་གྱིས་འཛམ་གླིང་མི་མང་ཡོངས་ལ་དཀའ་ངལ་འཕྲད་བཞིན་པའི་སྐབས་སྐུ་ཉིད་ཀྱིས་དབུ་ཁྲིད་དེ་དཀའ་ངལ་ལ་གདོང་ལེན་གནང་བར་ངོས་ཀྱིས་རྗེས་སུ་ཡི་རང་ཞུ་གི་ཡོད། ཁེ་ན་ཌའི་ངོས་ནས་གཞན་གྱི་བདེ་སྡུག་ལ་ཐུགས་ཁུར་བཞེས་ཏེ་འཛམ་གླིང་ནང་གི་རྙོག་འཛིང་ཆེ་བའི་ས་ཁུལ་ཁག་གི་ཉམ་ཐག་རྣམས་ཁེ་ན་ཌའི་ནང་སྣེ་ལེན་གནང་བཞིན་པའི་ཁེ་ན་ཌའི་བྱམས་བརྩེ་ལྡན་པའི་སྲིད་བྱུས་ལ་ངོས་ཀྱིས་ཡིད་སྨོན་ཞུ་གི་ཡོད།
ངོས་རང་ཁེ་ན་ཌའི་ཆེ་བསྟོད་མི་སེར་ཡིན་པའི་ཆ་ནས་ཁེ་ན་ཌས་གཏོང་ཕོད་ཆེན་པོའི་སྒོ་ནས་འགྲོ་བ་མིའི་བདེ་སྡུག་ལ་ཐུགས་ཁུར་ཆེ་བཞེས་ཀྱིས་ཕྱག་ལས་གནང་བཞིན་པར་སྤོབས་པ་ཡོད། ངོས་རང་ཁེ་ན་ཌར་ལོ་མང་རིང་སླེབས་ཐུབ་ཡོད་པས་སྐལ་པ་བཟང་པོ་བྱུང་། ཁེ་ན་ཌའི་མཆེད་གྲོགས་ཕོ་མོ་རྣམས་ཀྱིས་ངོས་ལ་སྙིང་ཉེ་བའི་སྒོ་ནས་མཛའ་གྲོགས་ཀྱི་འདུ་ཤེས་བསྟན་པ་དེས་ངོས་རང་ཧ་ཅང་སེམས་འགུལ་ཐེབས་བཅུག་སོང་། སྐུ་ཉིད་ཀྱི་ཡབ་དམ་པ་ཁེ་ན་ཌའི་སྲིད་བློན་ཡིན་པའི་སྐབས་ནས་བཟུང་ཁེ་ན་ཌས་ཐུགས་བརྩེ་བ་ཆེན་པོའི་སྒོ་ནས་བཙན་བྱོལ་བོད་མི་རྣམས་ཁེ་ན་ཌའི་ནང་སྣེ་ལེན་གནང་བར་ངོས་ཀྱིས་གོ་སྐབས་འདི་བརྒྱུད་ཐུགས་རྗེ་ཆེ་ཞུ་རྒྱུ་ཡིན།
རྩ་བའི་ཆ་ནས་བོད་མི་ཚོས་རིག་གཞུང་སྣ་མང་ལྡན་པའི་ཁེ་ན་ཌའི་སྤྱི་ཚོགས་ལ་ཐུགས་ཕན་གསོས་པའི་ཞབས་འདེགས་ཞུས་དང་ཞུ་བཞིན་ཡོད་པ་ངོས་ཀྱིས་ཤེས་རྟོགས་བྱུང་། ཞེས་དང་། མཐར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཞབས་ཇེ་སི་ཊིན་ཊོ་ཌུ་མཆོག་གིས་མདུན་དུ་ཡོད་པའི་དཀའ་ངལ་ལ་གདོང་ལེན་གནང་སྟེ་ཁེ་ན་ཌའི་མི་མང་གི་མངོན་འདོད་བསྒྲུབ་ཐུབ་པའི་ཐུགས་སྨོན་དང་སྨོན་འདུན་མཛད་ཡོད་པ་བཅས།།
གསུང་འཕྲིན་ངོ་མ་ཨིན་ཡིག་ཐོག་སྩལ་ཡོད་པས་ཚིག་དོན་ལ་ཧེ་བག་ཡོད་ཚེ་ཨིན་ཡིག་ལ་རྩ་འཛིན་ཡོང་བ་ཞུ།།
