༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་རྒྱལ་བའི་ཕོ་བྲང་ནས་ཕྱི་ལོ་ ༢༠༢༡ ཟླ་ ༩ ཚེས་ ༡༧ ཉིན་རྒྱ་གར་གྱི་སྲིད་བློན་ན་རེནྡྲ་མོ་དི་ (Narendra Modi) མཆོག་དགུང་གྲངས་ ༧༡ ལ་ཕེབས་པའི་སྐྱེས་སྐར་ལ་འཚམས་འཕྲིན་སྩལ་བའི་ནང་འཁོད་དོན། དགུང་གྲངས་ ༧༡ ལ་ཕེབས་པའི་སྐུ་ཉིད་ཀྱི་སྐྱེས་སྐར་ལ་ངོས་ཀྱིས་སྙིང་ཐག་པ་ནས་འཚམས་འདྲི་དང་། སྐུ་ཉིད་མུ་མཐུད་སྐུ་ཚེ་ཡུན་རིང་བརྟན་པའི་སྨོན་འདུན་ཞུ་རྒྱུ་ཡིན། ངོས་རང་ལུང་པ་འདི་ཉིད་ལ་ཧ་ཅང་གཅེས་སྤྲས་བྱེད་མཁན་ཞིག་ཡིན་པའི་ཆ་ནས་ཏོག་དབྱིབས་གཉན་རིམས་ཀྱིས་རྐྱེན་པས་འཛམ་གླིང་མི་མང་ཡོངས་ལ་དཀའ་ངལ་འཕྲད་བཞིན་པའི་སྐབས་འདིར་སྐུ་ཉིད་ལ་གདེང་ཚོད་ཆེན་པོ་སྐྱེས་ནས་དཀའ་ངལ་ལ་གདོང་ལེན་གནང་བཞིན་པར་རྗེས་སུ་ཡི་རང་ཡོད། རྒྱ་གར་ནི་འཛམ་གླིང་ནང་མང་གཙོའི་རྒྱལ་ཁབ་ཆེས་ཆེ་ཤོས་དེ་ཡིན་པའི་ཆ་ནས་རྒྱ་གར་གྱི་འཕེལ་རྒྱས་དེས་རྒྱ་གར་མི་མང་ལ་ཁེ་ཕན་སྒྲུབ་ཀྱི་ཡོད་པ་ཙམ་མ་ཟད། འཛམ་གླིང་ཁྱོན་ཡོངས་འཕེལ་རྒྱས་སུ་འགྲོ་བར་ཞབས་འདེགས་སྒྲུབ་ཀྱི་ཡོད།
རྒྱ་གར་གྱི་གནའ་བོའི་རིག་གཞུང་འཚེ་བ་མེད་པའི་ལྟ་གྲུབ་དང་། དེའི་རྒྱབ་རྟེན་བྱམས་བརྩེའི་ཀུན་སློང་སྙིང་རྗེ་གཉིས་ནི་དེང་སང་འཛམ་བུ་གླིང་འདིའི་སྒང་ལ་དགོས་མཁོ་ཡོད་པ་ཙམ་མ་ཟད། དངོས་ངེས་ཅན་ཞིག་ཀྱང་ཆགས་ཡོད་པ་ངོས་ལ་ར་འཕྲོད་བྱུང་། ངོས་ཀྱིས་འགྲོ་བ་མིའི་ཁེ་ཕན་རྒྱ་ཆེ་སར་དམིགས་ཏེ་རྒྱ་གར་གྱི་གནའ་བོའི་རིག་གཞུང་དེ་དག་དང་དེང་རབས་ཤེས་ཡོན་ལམ་ལུགས་གཉིས་ཟུང་འབྲེལ་བྱེད་ཐུབ་པའི་ཡིད་ཆེས་བྱེད་ཀྱི་ཡོད།
གོ་སྐབས་ནམ་བྱུང་ལ་ངོས་ཀྱིས་རྒྱ་གར་གྱི་མང་གཙོ་སྲ་བརྟན་དང་། ཆོས་ལུགས་ནང་ཁུལ་མཐུན་སྒྲིལ། འཆམ་མཐུན་བཅས་ལ་རྗེས་སུ་ཡི་རང་ཞུ་གི་ཡོད། བཙན་བྱོལ་བོད་མི་རྣམས་ལ་མཚོན་ན་རྒྱ་གར་ནི། ང་ཚོའི་ཆོས་ཕྱོགས་ཀྱི་སྐྱབས་བཅོལ་ཞུ་ས་ཞིག་ཆགས་ཡོད་པ་ཙམ་མ་ཟད། འདས་པའི་ལོ་ངོ་ ༦༢ རིང་ང་ཚོའི་ཁྱིམ་གཞིས་ལྟ་བུ་ཆགས་ཡོད། གོ་སྐབས་འདི་བརྒྱུད་ངོས་ཀྱིས་རྒྱ་གར་གཞུང་མང་གཉིས་ཀྱིས་གཏོང་ཕོད་ཆེན་པོའི་སྒོ་ནས་ང་ཚོར་གཟིགས་སྐྱོང་གནང་དང་གནང་བཞིན་པར་ཐུགས་རྗེ་ཆེ་ཞུ་རྒྱུ་ཡིན། ཐུགས་སྨོན་དང་བཅས། ཞེས་འཁོད།།
གསུང་འཕྲིན་ངོ་མ་ཨིན་ཡིག་ཐོག་སྩལ་ཡོད་པས་ཚིག་དོན་ལ་ཧེ་བག་ཡོད་ཚེ་ཨིན་ཡིག་ལ་རྩ་འཛིན་ཡོང་བ་ཞུ།།
