༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སིངྒ་པོར་ནང་པའི་ཆོས་ཚོགས་ (TBC) གཙོས་ལྷོ་ཤར་ཨེ་ཤེ་ཡའི་ནང་པའི་ཆོས་ཚོགས་ཁག་བཅུ་ཡིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ། ཕྱི་ལོ་ ༢༠༢༡ ཟླ་ ༩ ཚེས་ ༨ རེས་གཟའ་ལྷག་པའི་ཉིན་དྲ་རྒྱ་བརྒྱུད་སློབ་དཔོན་ཟླ་བ་གྲགས་པས་མཛད་པའི་དབུ་མ་ལ་འཇུག་པའི་རང་འགྲེལ་གྱི་བཀའ་ཆོས་དབུ་འཛུགས་མཛད་ཡོད།དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཙམ་ལ་མགོན་པོ་གང་ཉིད་མཆོག་༸རྒྱལ་བའི་གཟིམ་ཆུང་ཕོ་བྲང་ནས་བཀའ་ཆོས་གནང་ཡུལ་དུ་ཆིབས་སྒྱུར་གྱིས་བཀའ་སློབ་སྩལ་དོན། དེ་རིང་འདིར་ཨེ་ཤེ་ཡའི་ནང་པའི་ཆོས་ཚོགས་ཁག་གིས་ནང་ཆོས་ངོ་སྤྲོད་དང་། ཟླ་བ་གྲགས་པ་རང་ཉིད་ཀྱིས་མཛད་པའི་དབུ་མ་འཇུག་པའི་རང་འགྲེལ་གྱི་བཤད་ལུང་གི་རྒྱུན་གཅིག་ངོས་ལ་ཐོབ་ཡོད། དབུ་མ་འཇུག་པ་རྩ་བའི་སྟེང་ནས་ཡོངས་འཛིན་རྡོ་རྗེ་འཆང་སྐུ་མདུན་ནས་ངོས་ལ་ཐོབ་པ་དང་། འཇུག་པ་རང་འགྲེལ་གྱི་ཐོག་ནས་མཁན་རིན་པོ་ཆེ་ཀུན་དགའ་དབང་ཕྱུག་གི་མདུན་ནས་ཐོབ་པ་རེད། དེ་རིང་འདིར་འཇུག་པ་རང་འགྲེལ་གྱི་ཐོག་ནས་འགྲེལ་བཤད་མདོར་བསྡུས་ག་ཚོད་ཚར་ཚར་ཞིག་ཞུ་རྒྱུ་ཡིན།སྔོན་ལ་སངས་རྒྱས་པའི་ཆོས་ཞེས་པ་ནི་ལོ་ངོ་ ༢༥༠༠ གོང་ནས་བཅོམ་ལྡན་འདས་ཀྱིས་ཆོས་འཁོར་སྐོར་བ་རེད། བཅོམ་ལྡན་འདས་རང་ཉིད་ཀྱིས་གསུངས་པའི་ཆོས་འདིར་ཁྱོད་རང་ཚོས་ཡིད་ཆེས་བྱས་ནས་དད་པ་དང་ཁས་ལེན་བྱེད་དགོས་པ་མ་རེད། བཅོམ་ལྡན་འདས་ཀྱིས་གསུངས་པའི་བཀའ་ལ་ཞིབ་འཇུག་དང་བརྟག་དཔྱད། རྒྱུ་མཚན་ཡོད་མེད་བསམ་བློ་བཏང་སྟེ་རྒྱུ་མཚན་ལྡན་པ་ཞིག་ཡིན་ན་ཡིད་ཆེས་བྱོས་ཞེས་བཀའ་གནང་ཡོད། བཅོམ་ལྡན་འདས་རང་ཉིད་ཀྱིས། །དགེ་སློང་དག་གམ་མཁས་རྣམས་ཀྱིས། ། བསྲེག་བཅད་བརྡར་བའི་གསེར་བཞིན་དུ། །ལེགས་པར་བརྟག་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་ཆོས་ལ་དོ་སྣང་ཡོད་པ་ཚོས་གསེར་ལ་བཅད། གཏུབ། བསྲེག་བཅས་བསྲེག་བཅད་བརྡར་གསུམ་བྱས་པ་བཞིན་ཆོས་ལ་བརྟག་དཔྱད་བྱེད་དགོས་པ་རེད། བཅོམ་ལྡན་འདས་རང་གི་གསུང་ལའང་བརྟག་དཔྱད་བྱས་ཏེ། རྒྱུ་མཚན་ལྡན་པར་མཐོང་ནས་བློར་འགྱུར་བ་འགྲོ་གི་ཡོད་ན་ངའི་ཆོས་ལ་ཁས་ལེན་བྱོས་ཞེས་གསུངས་ཡོད། ཕྱིས་སུ་བཅོམ་ལྡན་འདས་ཀྱི་རྗེས་ལ་སྟོན་པའི་གཏད་རབས་བདུན་ཞེས་བྱུང་ཡོད། གང་ལྟར་སངས་རྒྱས་པའི་ཆོས་ཀྱི་ལྟ་གྲུབ་སྐོར་དམིགས་བསལ་དོ་སྣང་དང་སློབ་སྦྱོང་བྱེད་རྒྱུ་ཡོང་བར་ནཱ་ལེནྡྲ་བཙུགས་ཏེ་བྱུང་བ་རེད།སྟོན་པ་བཅོམ་ལྡན་འདས་ཞལ་བཞུགས་དུས་ནས་ཤེས་ཡོན་གྱི་བསྟི་གནས་ལྟ་བུའི་ནཱ་ལེནྡྲ་ཕལ་ཆེར་ཡོད་པ་རེད། དེ་ནས་རིམ་བཞིན་ནང་པའི་ལྟ་གྲུབ་སྐོར་སློབ་སྦྱོང་བྱེད་རྒྱུར་དམིགས་བསལ་དོ་སྣང་སྐྱེས་ཏེ། ཕྱིས་སུ་ནཱ་ལེནྡྲ་ནི་དངོས་གནས་དྲང་གནས་སངས་རྒྱས་ཀྱི་ཆོས་སློབ་སྦྱོང་བྱེད་སའི་སློབ་གཉེར་ཁང་རྩེ་ཕུད་ཆགས་པ་རེད། ནཱ་ལེནྡྲ་སློབ་གཉེར་ཁང་ལོ་རྒྱུས་ཐོག་ནས་སྙན་གྲགས་ཆེན་པོ་རེད་ཅེས་བཤད་རྒྱུའི་སླད་མ་ཡིན་པར་ནཱ་ལེནྡྲ་ནས་ཐོན་པའི་མཁས་པའི་དབང་པོ་གང་འདྲ་ཡོད་སྐོར་དང་། མཁས་པ་དེ་དག་གི་ལེགས་བཤད་གང་དག་ཡོད་པ་ལ་ཞིབ་འཇུག་བྱེད་ཡོང་དུས་ནཱ་ལེནྡྲའི་མཁས་པ་རྣམས་ཀྱིས་གཞུང་ཆེན་མོའི་གོ་བ་བླངས་ཏེ་ལྟ་གྲུབ་དང་ཚད་མ་སོགས་ཀྱི་སྐོར་ལ་སློབ་སྦྱོང་ཧ་ཅང་ཤུགས་ཆེན་པོ་བྱས་ཡོད། གོང་དུ་ཞུས་པ་བཞིན། བསྲེག་བཅད་བརྡར་བའི་གསེར་བཞིན་དུ། ཞེས་པ་ལྟར་སློབ་སྦྱོང་ཧ་ལས་པ་གནང་འདུག ངོས་རང་ནང་པའི་དགེ་སློང་ཞིག་རེད། ནཱ་ལེནྡྲའི་མཁས་པའི་དབང་པོ་ཚོའི་རྗེས་འབྲང་ཞིག་ཆགས་ཡོད། དེ་དང་ཆབས་ཅིག་སེམས་ཅན་ཐམས་ཅད་ཟེར་གྱི་ཡོད་མ་གཏོགས་ནང་པ་གཅིག་པུ་ཟེར་གྱི་མེད། ཁ་ཡོད་ལག་ཡོད་དུ་འཛམ་གླིང་འདིར་མི་དུང་ཕྱུར་བདུན་ཅུ་ལྷག་ཡོད་པ་ཚང་མ་མི་གཅིག་མཚུངས་ཡིན་པ་དང་། བསམ་བློ་གཏོང་བའི་ཀླད་པའི་ཆ་རྐྱེན་ཡོད་པ་གཅིག་མཚུངས་རེད། འཛམ་གླིང་འདིར་ཆགས་སྡང་གི་རྐྱེན་གྱིས་རྙོག་དྲ་མང་པོ་ཞིག་དེ་སྔ་ཡང་བྱུང་ཡོད་པ་མ་ཟད་ད་ལྟའང་ཡོང་བཞིན་འདུག དེ་ལ་ཕན་ཐོགས་ཕྲན་བུ་ཡོང་ན་བསམ་ནས་ངོས་ཀྱིས་འབད་བརྩོན་བྱེད་བཞིན་ཡོད།མི་ལ་སྡུག་བསྔལ་ནི་ཞེ་སྡང་གི་དབང་གིས་ཡོང་བཞིན་འདུག ཁོང་ཁྲོ་ཟ་བའི་སྐབས་སོ་སོ་མ་སྐྱིད་པ་དང་། རོགས་པ་ཡང་མ་སྐྱིད་པ།  དབུ་མ་འཇུག་པའི་ནང་དུ་ཁོང་ཁྲོ་ཟ་ཡོང་དུས་གདོང་ཡང་མི་སྡུག་པ་ཆགས་ཡོང་གི་རེད་ཅེས་གསུངས་ཡོད། དངོས་ཡོད་རེད། བཟོད་པ་སྒོམ་པ་ཡིན་ན་མི་འཛུམ་ཤིག་ཤིག་དང་ལྷོད་ལྷོད་ཡོང་གི་རེད་ཅེས་ཟླ་བ་གྲགས་པས་གསུངས་འདུག སེམས་བསྐྱེད་གསུམ་པར། མི་སྡུག་གཟུགས་སུ་བྱེད་ཅིང་དམ་པ་མིན་པར་བཀྲི། །ཚུལ་དང་ཚུལ་མིན་ཤེས་པའི་རྣམ་དཔྱོད་འཕྲོག་བྱེད་ཅིང་། །མི་བཟོད་པ་ཡི་མྱུར་དུ་ངན་འགྲོར་སྐྱུར་བར་བྱེད། །བཟོད་པས་བཤད་ཟིན་དང་འགལ་ཡོན་ཏན་རྣམས་བྱེད་དོ། །བཟོས་པས་མཛེས་ཤིང་སྐྱེ་བོ་དམ་པ་ལ། །ཕངས་དང་ལུགས་དང་ལུགས་མིན་ཤེས་པ་ལ། །མཁས་པར་འགྱུར་ཞིང་དེ་ཡི་འོག་ཏུ་ནི། །ལྷ་མིའི་སྐྱེ་དང་སྡིག་པ་ཟད་པར་འགྱུར། །ཞེས་དངོས་ཡོད་གནས་ཚུལ་ལ་འགྲེལ་བཤད་སྐྱོན་ཡོད། ཅེས་སོགས་ཀྱི་བཀའ་སློབ་སྩལ་ཏེ་དབུ་མ་ལ་འཇུག་པའི་རང་འགྲེལ་གྱི་བཀའ་ཆོས་དབུ་འཛུགས་མཛད་ཡོད་པ་བཅས།།