༄༅། །ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ཉི་ཧོང་གི་གྲོས་ཚོགས་འོག་མའི་མཇལ་འཕྲད་ཁང་དུ་ཉི་ཧོང་གི་གཞུང་འཛིན་མང་གཙོ་གུ་ཡངས་ཆབ་སྲིད་ཚོགས་པའི་(Liberal Democratic Party of Japan) ཚོགས་གཙོའི་འོས་མིར་བཞེངས་མཁན་ལྕམ་སྐུ་སཱ་ནེ་ཊ་ཀེ་ཆི་ (Sanae Takaichi) ལགས་དང་མཇལ་འཕྲད་གནང་ཡོད། གལ་ཏེ་ལྕམ་སྐུ་སཱ་ནེ་ཊ་ཀེ་ཆི་ལགས་ཉི་ཧོང་གི་མང་གཙོ་གུ་ཡངས་ཆབ་སྲིད་ཚོགས་པའི་ཚོགས་གཙོར་བདམས་ཚེ་ལྕམ་སྐུ་སཱ་ནེ་ཊ་ཀེ་ཆི་ལགས་ཉི་ཧོང་གི་སྲིད་བློན་ཐེངས་ ༡༠༠ ཐམ་པ་དང་། ཉི་ཧོང་གི་བུད་མེད་ཀྱི་སྲིད་བློན་ཐེངས་དང་པོ་ཆགས་ཀྱི་ཡོད། ད་ལྟའི་ཉི་ཧོང་གི་སྲིད་བློན་སྐུ་ཞབས་ཡོ་ཞི་ཧི་དེ་སུ་གཱ་ (Yoshihide Suga) མཆོག་གི་ལས་ཡུན་ཟླ་བ་རྗེས་མའི་ནང་འཁྱུར་འགྲོ་གི་ཡོད། ལྕམ་སྐུ་སཱ་ནེ་ཊ་ཀེ་ཆི་ལགས་ཉི་ཧོང་གི་གཞུང་འཛིན་མང་གཙོ་གུ་ཡངས་ཆབ་སྲིད་ཚོགས་པའི་ཚོགས་གཙོའི་འོས་མིར་བཞེངས་མཁན་བཞི་ཡོད་པའི་ཁྲོད་ནས་གཅིག་ཡིན་ཞིང་། ཕྱི་ཚེས་ ༢༩ ཉིན་ཉི་ཧོང་གི་གུ་ཡངས་ཆབ་སྲིད་ཚོགས་པའི་ཚོགས་གཙོའི་འོས་བསྡུའི་གྲུབ་འབྲས་གསལ་བསྒྲགས་གནང་གཏན་འཁེལ་ཡོད།དེ་ཡང་ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ལྕམ་སྐུ་སཱ་ནེ་ཊ་ཀེ་ཆི་ལགས་ལ་ཁ་བཏགས་ཕུལ་ཏེ་འཚམས་འདྲི་ཞུས་པ་དང་འབྲེལ་ཉེ་ཆར་ལྕམ་སྐུ་སཱ་ནེ་ཊ་ཀེ་ཆི་ལགས་ཀྱིས་ས་ཁུལ་གང་དུ་ཡིན་ཡང་དྲག་གནོན་དང་གཞི་རྩའི་རང་དབང་ལ་རྩིས་མེད་རྡོག་རོལ་བཏང་བ་ཡིན་ན་མཐའ་གཅིག་ཏུ་ངོ་རྒོལ་གནང་རྒྱུའི་བསྒྲགས་གཏམ་སྤེལ་བར་ཐུགས་རྗེ་ཆེ་ཞུས་ཡོད། ཕྱོགས་མཚུངས་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱིས་ལྕམ་སྐུ་སཱ་ནེ་ཊ་ཀེ་ཆི་ལགས་དང་གསར་འགོད་པ་རྣམས་ལ་ད་ལྟའི་བོད་ནང་གི་ཛ་དྲག་གནས་སྟངས་དང་། རྒྱ་ནག་དམར་ཤོག་གཞུང་གིས་བོད་མཐོ་སྒང་དམག་ས་ལྟ་བུར་ཇི་ལྟར་སྒྱུར་བཞིན་པ། འགྲོ་བ་མིའི་ཐོབ་ཐང་དང་ཆོས་དད་རང་དབང་ལ་རྩིས་མེད་རྡོག་རོལ་གཏོང་བཞིན་པ། དེ་བཞིན་བོད་མིའི་ཆོས་དང་རིག་གཞུང་། ངོ་བོ་དང་བཅས་པ་འཇིག་ཉེན་གྱི་མཚམས་སུ་སླེབས་ཡོད་པ་སོགས་ཀྱི་སྐོར་གསུངས། ཡུ་གུར་དང་། ལྷོ་སོག་པོ། ཧོང་ཀོང་བཅས་ཀྱི་སྐུ་ཚབ་རྣམས་ཀྱིས་ཁོང་ཚོའི་ལུང་པའི་ནང་རྒྱ་ནག་གཞུང་གིས་དྲག་གནོན་དང་རིག་གཞུང་གཏོར་བཤིག་གཏོང་བཞིན་ཡོད་སྟབས། ཐུགས་འཚབ་དང་སྦྲགས་ལྕམ་སྐུ་སཱ་ནེ་ཊ་ཀེ་ཆི་ལགས་ཀྱིས་རྒྱབ་སྐྱོར་གནང་དགོས་པའི་རེ་སྐུལ་ཞུས་ཡོད།  ལྕམ་སྐུ་སཱ་ནེ་ཊ་ཀེ་ཆི་ལགས་ཀྱིས་མང་གཙོ་དང་། རང་དབང་། འགྲོ་བ་མིའི་ཐོབ་ཐང་ལ་བརྩི་བཀུར་གནང་བཞིན་ཡོད་པའི་སྐོར་དང་། ས་ཁུལ་གང་དུ་ཡིན་ཡང་མང་གཙོ་དང་། རང་དབང་། འགྲོ་བ་མིིའི་ཐོབ་ཐང་བཅས་ལ་རྩིས་མེད་རྡོག་རོལ་བཏང་བ་ཡིན་ན། ཉི་ཧོང་དང་རྒྱལ་སྤྱིའི་ཚོགས་སྡེ་ཁག་ནས་དེར་བཟོད་བསྲན་གནང་གི་མ་རེད། ཅེས་དང་། གཞན་ཡང་ལྕམ་སྐུ་སཱ་ནེ་ཊ་ཀེ་ཆི་ལགས་ཀྱིས་རང་ཉིད་ཉི་ཧོང་གི་སྲིད་བློན་ཆགས་རྒྱུ་ཡིན་མིན་ལ་མ་ལྟོས་པར་བོད་དང་། ཡུ་གུར། ལྷོ་སོག་པོ། ཧོང་ཀོང་བཅས་ཀྱི་རང་དབང་གི་འཐབ་རྩོད་ལ་མཐའ་གཅིག་ཏུ་རྒྱབ་སྐྱོར་གནང་རྒྱུའི་ཞལ་བཞེས་གནང་ཡོད།ཉི་ཧོང་རྒྱལ་ཡོངས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་དྲུང་ཆེ་སྐུ་ཞབས་ནཱ་གའོ་བཀྲ་ཀ་ཤིས་ (Mr. Nagao Takashi) ལགས་དང་། ཉི་ཧོང་གི་གཞུང་འཛིན་མང་གཙོ་གུ་ཡངས་ཆབ་སྲིད་ཚོགས་པའི་དྲུང་ཆེའི་ཕྱག་རོགས་སྐུ་ཞབས་ཨུ་ནོ་ཧི་རོ་ཞི་ (Ueno Hiroshi) ལགས་ཚོགས་འདུར་མཉམ་ཞུགས་གནང་ཡོད། ཞི་བདེ་རྒྱ་མཚོ་མངའ་ཁུལ་གྱི་རྒྱ་གར་རང་དབང་མནའ་འབྲེལ་ཚོགས་པའི་ (Free-Indo Pacific Alliance) སྐུ་ཚབ་སྐུ་ཞབས་ཨི་ཞི་ཧི་དེ་ཊོ་ཞི་ (Ishii Hidetoshi) ལགས་ཀྱིས་ཚོགས་འདུ་གཙོ་སྐྱོང་གནང་ཡོད།

ཉི་ཧོང་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་དང་ལྷན་དུ་ཉི་ཧོང་དོན་གཅོད་ཁང་གི་དྲུང་ཆེ་ལས་ཚབ་འཇིགས་མེད་ཚེ་བརྟན་ལགས་ཚོགས་འདུར་མཉམ་ཞུགས་གནང་ཡོད་པ་བཅས།།