༄༅། །ཕྱི་ལོ་ ༢༠༢༡ ཟླ་ ༩ ཚེས་ ༡༣ ནས་ཟླ་ ༡༠ ཚེས་ ༨ བར་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༨ ཚོགས་བཞིན་ཡོད་པ་བསྟུན། སུད་སིའི་སྐུ་ཚབ་དོན་ཁང་ནས་རྒྱ་ནག་གཞུང་གིས་འཛུགས་སྐྲུན་ལས་གཞིར་ཁ་གཡར་ཏེ་བོད་མཐོ་སྒང་གི་ཁོར་ཡུག་ལ་དོ་ཕོག་ཤུགས་ཆེ་གཏོང་བཞིན་པའི་ཐད་རྒྱལ་ཚོགས་ནས་བོད་མཐོ་སྒང་གི་ཁོར་ཡུག་ལ་གནོད་འཚེ་ཇི་ཐེབས་རྟོག་ཞིབ་ནན་པོ་གནང་དགོས་པའི་འབོད་སྐུལ་ཞུས་ཡོད།

དེ་ཡང་སུད་སིའི་སྐུ་ཚབ་དོན་གཅོད་ཁང་གི་འབྲེལ་ཡོད་ལས་བྱེད་སྐལ་ལྡན་མཚོ་མོ་ལགས་ཀྱིས། རྒྱ་ནག་གཞུང་གིས་བོད་ནང་དབུལ་ཕོངས་ངལ་སེལ་དང་འཛུགས་སྐྲུན་ཡར་རྒྱས་ལས་གཞིར་ཁ་གཡར་ཏེ་བོད་མཐོ་སྒང་གི་འབྲོག་པ་བརྒྱ་ཕྲག་མང་པོ་བཙན་གྱིས་རང་གི་ཕ་མེས་ཡང་མེས་ཀྱི་ས་ཐོག་ནས་ས་ཆ་གཞན་ལ་གནས་སྤོ་བཅུག་ཡོད་པ་མ་ཟད། བོད་ཀྱི་ཁོར་ཡུག་སྲུང་སྐྱོབ་པ་ཀརྨ་བསམ་གྲུབ་ལགས་དང་། འབྲོག་མང་གི་འཚོ་གནས་ཐོབ་ཐང་རྩོད་ལེན་པ་ཨ་ཉ་སེང་སྒྲ་ལགས་གཉིས་འཛིན་བཟུང་བཙོན་བཅུག་བྱས་པའི་སྐོར་དང་།

རྒྱ་ནག་གཞུང་གིས་བོད་ནང་འཆར་གཞི་དང་ལྡན་པའི་ཐོག་ནས་འཛུགས་སྐྲུན་ཡར་རྒྱས་གཏོང་གི་ཡོད་ལུགས་བཤད་ཀྱང་། དོན་དངོས་སུ་འགྲོ་བ་མིའི་ཐོབ་ཐང་དང་། གཞི་རྩའི་རང་དབང་སོགས་གང་ཅིའི་ཐད་ནས་བོད་མིའི་ཐོག་དྲག་གནོན་ཅན་གྱི་སྲིད་བྱུས་ལག་བསྟར་བྱེད་བཞིན་པ་དེ་ནི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་གཞི་རྩའི་རྩ་འཛིན་ལའང་རྩིས་མེད་རྡོག་རོལ་གཏོང་གཞི་ཞིག་ཀྱང་ཆགས་ཀྱི་ཡོད། བོད་མཐོ་སྒང་གི་ཁོར་ཡུག་ལ་དོ་ཕོག་ཤུགས་ཆེ་གཏོང་བཞིན་པའི་ཐད་རྒྱལ་ཚོགས་ཀྱི་ལྷན་ཚོགས་དང་དམིགས་བསལ་ཁྱད་ལས་རྟོག་ཞིབ་ཚོགས་ཆུང་ནས་བོད་མཐོ་སྒང་གི་ཁོར་ཡུག་ལ་གནོད་འཚེ་ཇི་ཐེབས་རྟོག་ཞིབ་ནན་པོ་གནང་དགོས་པའི་འབོད་སྐུལ་ཞུས་ཡོད་པ་བཅས། །