༄༅། །ཕྱི་ལོ་ ༢༠༢༡ ཟླ་ ༨ ཚེས་ ༢༢ ནས་ཕྱི་ཟླ་ ༩ ཚེས་ ༡༤ བར་རྒྱ་ནག་གཞུང་གིས་རྫ་དབོན་པོའི་སྡེ་དགོན་གཉིས་ནས་སྔ་ཕྱིར་བོད་མི་སེར་སྐྱ་གྲངས་ ༡༢༡ ཙམ་འཛིན་བཟུང་བཙན་ཁྲིད་བྱས་པའི་ཁོངས་ནས་དགེ་འདུན་པ་གཅིག་དང་། བུད་མེད་གཅིག མི་སྐྱ་གཉིས་བཅས་ཁྱོན་མི་གྲངས་ ༤ ལས་གཞན་བོད་མི་གཅིག་ཀྱང་ད་བར་གློད་བཀྲོལ་བཏང་མེད་པ་མ་ཟད། འཛིན་བཟུང་བཀག་ཉར་འོག་ཡོད་པའི་བུད་མེད་རང་ལོ་ ༥༠ ནང་ཞིག་ཡིན་པ་སྐལ་བཟང་སྒྲོལ་མ་ ༼དཀར་སྒྲོན། ༽ ལགས་ནད་གཞི་ལྗིད་པོའི་རྐྱེན་པས་དཀའ་ངལ་འཕྲད་སྐབས་རྒྱ་ནག་གཞུང་གི་ཉེན་རྟོག་པས་སེར་ཤུལ་རྫོང་གི་སྨན་ཁང་དུ་ཁྲིད་ཡོད་ཀྱང་སྨན་ཁང་དེས་སྨན་བཅོས་བྱེད་ཐུབ་པའི་ཁས་ལེན་བྱས་མེད་པ་མ་ཟད། འབྲེལ་ཡོད་སྨན་པ་དང་ཉེན་རྟོག་པ་ཁ་མཐུན་གྱིས་སྨན་ཁང་གཞན་དུ་བསྟེན་གཏུགས་ཆེད་ཆོག་མཆན་མ་སྤྲད་པར་བརྟེན་ད་ལྟའི་ཆར་བཀག་ཉར་ཁང་ནང་མུ་མཐུད་དཀའ་ངལ་འོག་གནས་ཡོད།
དེ་བཞིན་འཛིན་བཟུང་བཀག་ཉར་འོག་ཡོད་པ་རྣམས་ལ་ཉིན་ལྟར་འདྲི་རྩད་ནན་པོ་བྱས་པ་དང་གཅར་རྡུང་བཏང་བ། ཁ་ལག་མ་སྤྲད་པ་སོགས་ཀྱི་དཀའ་ངལ་ཤུགས་ཆེ་འཕྲད་བཞིན་ཡོད་པ་མ་ཟད། མ་འོངས་པར་སྤྱི་སྒེར་སུ་རུང་ནས་སྐད་འཕྲིན་ཚོགས་པ་སོགས་ཀྱི་ནང་མཉམ་ཞུགས་མི་ཆོག་པའི་བཙན་བཀའ་ཡང་བཏང་ཡོད་པ་བཅས།།
