༄༅། །བདུན་ཕྲག་སྔོན་མར་རྒྱ་ནག་གཞུང་གིས་རྫ་དབོན་པོའི་སྡེ་དགོན་གཉིས་སུ་དམག་མི་འབོར་ཆེན་བཏང་སྟེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་སྒྲིག་གཤོམ་བྱས་པའི་ཉེས་མིང་འོག་སེར་སྐྱ་གྲངས་ ༦༠ ཙམ་འཛིན་བཟུང་བྱས་ཏེ་སེར་ཤུལ་རྫོང་དུ་བཙན་ཁྲིད་བྱས་ཡོད་པ་ལྟར། ཉེ་ཆར་སླར་ཡང་བོད་མི་གྲངས་ ༥༣ ཙམ་འཛིན་བཟུང་བྱས་ཏེ་རྫ་སྨན་དབོན་པོ་སྡེ་དགོན་གཉིས་ནས་ཁྱོན་སྐྱ་སེར་མི་གྲངས་ ༡༡༣ ཙམ་འཛིན་བཟུང་བཙན་འཁྲིད་བྱས་ཡོད།
དེ་ཡང་ཕྱི་ཟླ་ ༨ ཚེས་ ༢༥ ནས་ ༢༩ བར་རྒྱ་ནག་གཞུང་གིས་རྫ་དབོན་པོ་སྡེ་པའི་ཁྱིམ་ཚང་རེ་རེ་དང་མི་སྒེར་གྱི་ཁ་པར་སོགས་ཀྱི་ནང་སྔོག་བཤེར་ནན་པོ་བྱས་པ་བརྒྱུད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་ཉར་ཚགས་བྱས་པའི་ཉེས་མིང་འོག་བསྐྱར་དུ་བོད་མི་གྲངས་ ༥༣ ཙམ་འཛིན་བཟུང་བཀག་ཉར་བྱས་ཡོད་པའི་ཁོངས་ནས་དགེ་འདུན་པ་གཅིག་དང་། བུད་མེད་གཅིག མི་སྐྱ་གཉིས་བཅས་ཁྱོན་མི་གྲངས་ ༤ གློད་བཀྲོལ་བཏང་ཡོད་ཀྱང་གཞན་རྣམས་ཉུང་མཐར་ཟླ་བ་གཅིག་ཙམ་རིང་བཀག་ཉར་བྱེད་ཀྱི་ཡོད་པ་ས་གནས་ཡུལ་མི་ཚོས་ཚོད་དཔག་བྱེད་བཞིན་ཡོད།
ཕྱི་ཟླ་ ༨ ཚེས་ ༣༡ ཉིན་རྒྱ་ནག་གི་སྐོར་སྲུང་བས་ས་གནས་བོད་མི་མང་ཚོགས་རྣམས་བསྐོང་ཚོགས་བྱས་ནས། རྫ་དབོན་པོ་དགོན་གྱི་རང་ལོ་བཅོ་བརྒྱད་ཡན་གྱི་དགེ་འདུན་པ་གྲངས་ ༢༠ རེ་ཉིན་ལྟར་རྫ་སྨད་སྲིད་གཞུང་གི་ལས་ཁུངས་སུ་ཆེད་འབོད་ཀྱིས་འདྲི་རྩད་བྱས་ཏེ་རང་ཉིད་ཀྱི་ངོས་ནས་ནག་ཉེས་བསགས་མེད་པ་དང་ཕྱི་ཕྱོགས་སུ་འབྲེལ་བ་གནང་མྱོང་མེད་པ། ཞལ་པར་ཐོག་ཆབ་སྲིད་དང་འབྲེལ་བའི་བཀའ་མོལ་གནང་མྱོང་མེད་པ། རྒྱ་ནག་གཞུང་གི་ཁྲིམས་སྒྲིག་དང་འགལ་མེད་པ། མ་འོངས་པ་ལའང་དེ་ལྟར་བྱ་རྒྱུ་མིན་པའི་ཁས་ལེན་དམ་བཅའ་འཇོག་དགོས་པའི་བྱ་འགུལ་ཞིག་ཀྱང་ལག་བསྟར་བྱེད་བཞིན་ཡོད།།
