༄༅། །ཕྱི་ལོ་ ༢༠༢༡ ཟླ་ ༩ ཚེས་ ༡༦ ཉིན་ཡུ་རོབ་གྲོས་ཚོགས་ནང་ཡུ་རོབ་དང་རྒྱ་ནག་གཉིས་ཀྱི་ཐབས་བྱུས་སྐོར་སྙན་ཐོ་བཏོན་ཏེ་རྒྱ་ནག་གཞུང་གིས་བོད་ནང་ངལ་རྩོལ་བསྒྱུར་བཀོད་ལས་གཞི་སྤེལ་བཞིན་པར་ཐུགས་འཚབ་གནང་བ་དང་སྦྲགས། བོད་ཀྱི་ས་ཁུལ་ཁག་ཏུ་རང་དབང་གི་སྒོ་ནས་ཡུ་རོབ་ཀྱི་གཞུང་ཚབ་མི་སྣ་དང་གསར་འགོད་པ་སོགས་ཡོང་ཆོག་པའི་གོ་སྐབས་བསྐྲུན་དགོས་པའི་སྐོར་གླེང་སློང་ཤུགས་ཆེ་གནང་ཡོད།
དེ་ཡང་སྙན་ཐོའི་ནང་རྒྱ་ནག་གཞུང་གིས་སྤྲུལ་སྐུའི་ཡང་སྲིད་ངོས་འཛིན་བྱེད་ཕྱོགས་སྐོར་བཀའ་ཨང་ ༡༥ ཞེས་པའི་ནང་ཡང་སྲིད་ངོས་འཛིན་བྱེད་པར་རྒྱ་ནག་གཞུང་གིས་ངོས་ལེན་དགོས་པའི་སྐོར་འཁོད་ཡོད་པ་དེར་ཐུགས་འཚབ་དང་སྐྱོན་བརྗོད་གནང་ཡོད། རྒྱ་ནག་གིས་བཀའ་ཨང་ ༡༥ ཞེས་པ་བརྒྱུད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ངོས་འཛིན་ཞུ་ཕྱོགས་ལ་སྟངས་འཛིན་བྱ་འཆར་ཡོད།
ཡུ་རོབ་གྲོས་ཚོགས་ཀྱི་འཐུས་མི་རྣམ་པས་རྒྱ་ནག་དམར་ཤོག་གཞུང་གིས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པར་མཐའ་གཅིག་ཏུ་ངོ་རྒོལ་དང་། ཡུ་རོབ་གྲོས་ཚོགས་འཐུས་མི་རྣམ་པས་བོད་དང་། ཡུ་གུར། ལྷོ་སོག་པོ། ཧོང་ཀོང་བཅས་ཀྱི་འགྲོ་བ་མིའི་ཐོབ་ཐང་སྐོར་རྒྱ་ནག་གཞུང་དང་ལྷན་དུ་གྲོས་མོལ་གནང་དགོས་པ་གསུངས་ཡོད། གཞན་ཡང་སྙན་ཐོ་དེའི་ནང་ཡུ་རོབ་སྤྱི་མཐུན་ཚོགས་པ་དང་། དེའི་ཚོགས་མི་རྒྱལ་ཁབ་ཁག་གི་འགོ་ཁྲིད་རྣམ་པས་རྒྱ་ནག་དང་ཧོང་ཀོང་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་མ་ཕྱིན་བར་དུ་ཕྱི་ལོ་ ༢༠༢༢ ལོའི་པེ་ཅིང་དགུན་དུས་ཨོ་རྩལ་འགྲན་ཚོགས་ཀྱི་མགྲོན་འབོད་དང་ལེན་གནང་རྒྱུ་མེད་པའི་སྐོར་འཁོད་ཡོད།
ཡུ་རོབ་གྲོས་ཚོགས་ཀྱི་འཐུས་མི་ཧིལ་ཌེ་ (Hilde Vautmans) ལགས་ཀྱིས། རྒྱ་ནག་དམར་ཤོག་གིས་དྲག་གནོན་ཅན་གྱི་ཕྱི་འབྲེལ་སྲིད་བྱུས་ལག་བསྟར་བྱེད་བཞིན་ཡོད་པ་མ་ཟད། ཡུ་གུར་དང་ཧོང་ཀོང་ནང་དེ་ལྟར་དྲག་གནོན་ཅན་གྱི་སྲིད་བྱུས་ལག་བསྟར་བྱེད་བཞིན་ཡོད་པས་དཔལ་འབྱོར་གྱི་ཁེ་ཕན་ཁོ་ནའི་སླད་དུ་རྒྱ་ནག་དམར་ཤོག་གི་ཆབ་སྲིད་ཀྱི་སླུ་ཁྲིད་འོག་ཚུད་རྒྱུ་མེད་པའི་སྐོར་གསུངས།།
