༄༅། །ཕྱི་ལོ་ ༢༠༢༡ ཟླ་ ༩ ཚེས་ ༡༠ ཉིན་ཏེ་འཛམ་གླིང་རང་ཤི་སྔོན་འགོག་ཉིན་མོ་དང་བསྟུན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་སེམས་ཁམས་འཕྲོད་བསྟེན་ཚན་པའི་གོ་སྒྲིག་འོག་བཞུགས་སྒར་རྡ་སར་རྟེན་གཞི་བྱས་པའི་བོད་ཀྱི་གསོལ་མགྲོན་ཁང་དུ་ས་གནས་འཐུས་ཚོགས་ཀྱི་ཚོགས་མི་དང་གཞུང་ཁོངས་མིན་པའི་ཚོགས་པ་ཁག་གི་ཚོགས་མི་རྣམས་ལ་རང་ཤི་སྔོན་འགོག་སྐོར་གོ་རྟོགས་སྤེལ་ཡོད། སྐབས་དེར་མཉམ་ཞུགས་གནང་མཁན་ཡོངས་ཀྱིས་རུ་ཁག་བཟོས་ཏེ་གྲོས་བསྡུར་དང་། རི་མོ་བྲིས་པ། འཁྲབ་སྟོན་སོགས་ཀྱི་བརྒྱུད་རང་ཤི་སྔོན་འགོག་སྐོར་གོ་རྟོགས་རྒྱ་ཆེ་སྤེལ་ཡོད། དེ་བཞིན་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་ཀྱི་འཚོ་བྱེད་སྨན་ཁང་དུ་རང་ཤི་སྔོན་འགོག་སྐོར་གོ་རྟོགས་སྤེལ་ཡོད།

བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་མི་སྒེར་པ་དང་ཚོགས་པ་ཁག་ལ་དྲ་ལམ་བརྒྱུད་སེམས་ཁམས་འཕྲོད་བསྟེན་སྐོར་གོ་རྟོགས་གང་ཐུབ་སྤེལ་དགོས་པའི་འབོད་སྐུལ་གནང་ཡོད། རང་ཤི་སྔོན་འགོག་གི་ལས་རིམ་ཁག་ལ་ཁྱོན་མི་གྲངས་ ༤༢ ཉམས་ཞུགས་གནང་ཡོད་པ་བཅས།།