༄༅། །སུད་སི་གྲོང་ཁྱེར་ཇི་ནི་ཝའི་ནང་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༨ འཚོགས་བཞིན་པའི་ཐོག་རྒྱལ་ཚོགས་ཀྱི་ཚོགས་མིས་རྒྱ་ནག་གཞུང་ལ་བོད་ནང་གི་འགྲོ་བ་མིའི་ཐོབ་ཐང་ལ་བརྩི་སྲུང་ཞུ་དགོས་པའི་འབོད་སྐུལ་གནང་ཡོད།
དེ་ཡང་རྒྱལ་ཚོགས་ཀྱི་ཚོགས་མི་རྒྱལ་ཁབ་ཌེན་མཱརྐ་དང་། ཇར་མ་ནཱི། ནི་དར་ལེནྜ། སྭི་ཌན། སུད་སི། ཨ་རི། དེ་བཞིན་བཞིན་རྒྱལ་ཁབ་ ༢༦ ལས་གྲུབ་པའི་ཡོ་རོབ་མཐུན་ཚོགས་བཅས་ཀྱིས་རྒྱ་ནག་གཞུང་གིས་བོད་གཙོ་བོ་གྱུར་པའི་ཤིན་ཅང་དང་། ཧོང་ཀོང་བཅས་ཀྱི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རྡོལ་བཏང་དང་གཏོང་བཞིན་པར་སེམས་འཚབ་ཆེན་པོའི་ངང་ནས་སྐྱོན་བརྗོད་ཤུགས་ཆེ་གནང་ཡོད།
སྐབས་དེར་ཨ་རིའི་སྐུ་ཚབ་ཀྱིས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་བརྩི་མེད་རྡོལ་རོལ་བཏང་དང་གཏོང་བཞིན་པའི་ཐོག་རིག་གཞུང་རྩ་གཏོར་དང་མི་རིགས་འཐེན་འཁྱེར། དཔལ་འབྱོར་བཤུ་གཞོག་བྱེད་བཞིན་པར་སྐྱོན་འཛུགས་ཤུགས་ཆེ་བྱེད་ཡོད་པ་མ་ཟད། ལྷག་པར་རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་སྐད་ཡིག་སོགས་ལ་དམ་བསྒྲགས་བྱེད་བཞིན་པར་སེམས་འཆབ་ཀྱི་རྣམ་པ་ཤུགས་ཆེ་བཏོན་གནང་ཡོད།
ཕ་རན་སི་སྐུ་ཚབ་ཀྱིས་རྒྱལ་ཁབ་ ༢༦ ལས་གྲུབ་པའི་ཡོ་རོབ་མཐུན་ཚོགས་ཀྱི་ཚབ་ཞུས་ཏེ་བསྒྲགས་གཏམ་སྒྲོགས་སྦྱང་གནང་ཡོད་པ་དང་། སྐབས་དེར་ཡུ་རོབ་མཐུན་ཚོགས་ཀྱིས་རྒྱ་ནག་གཞུང་ལ་རྒྱལ་སྤྱི་དང་རྒྱ་ནག་རྒྱལ་ནང་གི་ཁྲིམས་གཞིར་བཟུང་བོད་གཙོ་བོར་གྱུར་པའི་གྲང་ཉུང་མི་རིགས་ཤིན་ཅང་དང་ནང་སོག་བཅས་ཀྱི་རང་དབང་ལ་རྩི་མཐོང་དགོས་སྐོར་ནན་བརྗོད་གནང་ཡོད།
ཌེན་མཱརྐ་སྐུ་ཚབ་ཀྱིས་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བཞིན་པའི་སྙན་ཐོ་ལ་སེམས་འཚབ་ཤུགས་ཆེ་བཏོན་གནང་ཡོད་པ་དང་། རྒྱ་ནག་གཞུང་ནས་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་དང་རང་དབང་ཅན་གྱི་རྟོག་ཞིབ་པ་རྣམས་བོད་ནང་ཡོང་ཆོག་པའི་ཆོག་མཆན་སྤྲོད་དགོས་པའི་བསྐྱར་དུ་འབོད་སྐུལ་ཞུས་ཡོད།
གཞན་ཡང་ཇར་མ་ནཱི་དང་ནི་དར་ལེནྜ། སུད་སི། སྭི་ཌན། ཨིན་ཡུལ། ཕིན་ལེནྜ། ནོར་ཝེ་བཅས་ཀྱི་སྐུ་ཚབ་རྣམས་ཀྱིས་རྒྱ་ནག་གཞུང་གིས་བོད་ཀྱིས་གཙོས་གྲངས་ཉུང་མི་རིགས་གཞན་ཁག་གཅིག་ལ་འཆར་གཞི་ལྡན་པའི་སྒོ་ནས་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་བཏང་དང་གཏོང་བཞིན་པར་བློ་འཚབ་ཀྱི་རྣམ་པ་བཏོན་ཡོད་པ་བཅས། །
