༄༅། །མཉམ་འབྲེལ་རྒྱལ་ཚོགས་ཀྱི་བཙན་དབང་འོག་གར་སོང་ཆ་མེད་བཟོས་པའི་ཡུལ་མི་ཞིབ་བཤེར་ལས་དོན་ཚོགས་ཆུང་དང་། རྒྱལ་ཚོགས་ཀྱི་ཆོས་དད་རང་དབང་སྲུང་སྐྱོབ་ཚོགས་ཆུང་། རྒྱལ་ཚོགས་ཀྱི་གང་བྱུང་འཛིན་བཟུང་དང་བཙོན་འཇུག་རྟོག་ཞིབ་ཚོགས་ཆུང་། རྒྱལ་ཚོགས་ཀྱི་དམིགས་བསལ་གྲངས་ཉུང་མི་རིགས་ཀྱི་གནད་དོན་ཞིབ་འཇུག་ཚོགས་ཆུང་བཅས་རྒྱལ་ཚོགས་ཀྱི་རང་དབང་ཅན་གྱི་སྡེ་ཚན་བཞིའི་འགྲོ་བ་མིའི་ཐོབ་ཐང་ཐོག་ཁྱད་མཁས་མི་སྣས་རྒྱ་ནག་གཞུང་ལ་ཕྱི་ལོ་ ༢༠༢༠ ཟླ་ ༡༠ ཚེས་ ༢༦ ཉིན་ཨ་མདོ་རྔ་བ་ཁུལ་ནས་ཡིན་པའི་རྩོམ་པ་པོ་སྒོ་ཤེས་རབ་རྒྱ་མཚོའམ་སྒོ་ཤེར་ལགས་རྒྱ་ནག་གཞུང་གིས་རྒྱུ་རྐྱེན་གང་ཡིན་གསལ་ཆ་མེད་པར་སི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་ནས་གློ་བུར་དུ་འཛིན་བཟུང་བྱས་ཏེ་ད་ཆ་གར་སོང་ཆ་མེད་དུ་གྱུར་ཡོད་པའི་སྐོར་དང་། དེ་བཞིན་བོད་རྔ་བ་རྫོང་དཀར་ཤུལ་སྡེ་བ་ནས་ཡིན་པའི་སྣང་ཞིག་དགོན་པའི་གྲྭ་རིན་ཆེན་ཚུལ་ཁྲིམས་ལགས་ཕྱི་ལོ་ ༢༠༡༩ ཟླ་ ༨ ཚེས་ ༡ ཉིན་རྔ་བ་རྫོང་གི་ཉེན་རྟོག་པས་འཛིན་བཟུང་བྱས་ཏེ་ད་བར་གང་དུ་ཡོད་མེད་ཀྱི་གནས་ཚུལ་ཤེས་རྟོགས་བྱུང་མེད་པའི་སྐོར་འདྲི་རྩད་ཀྱིས་ཁོང་རྣམ་པ་གཉིས་ད་ཆ་གང་དུ་ཡོད་མེད་ཀྱི་གནས་ཚུལ་དང་། ཁོང་གཉིས་འཛིན་བཟུང་བཙོན་འཇུག་བྱེད་དགོས་པའི་ཁྲིམས་ལུགས་ཀྱི་རྒྱབ་ལྗོངས་གནས་ཚུལ། ཁྲིམས་ཐག་ཇི་ལྟར་བཅད་པའི་གནས་ཚུལ་བཅས་མཁོ་སྤྲོད་བྱེད་དགོས་པའི་འབོད་སྐུལ་ཤུགས་ཆེ་གནང་འདུག
དེ་ཡང་སྒོ་ཤེས་རབ་རྒྱ་མཚོ་ལགས་ནི། ཕྱི་ལོ་ ༡༩༧༦ ཟླ་ ༩ ཚེས་ ༩ ཉིན་རྔ་བ་རྫོང་ཁ་ཤི་སྡེ་པའི་ཕ་སྒོ་བརྩོན་དང་མ་སྒྲོལ་དཀར་གཉིས་ཀྱི་བུ་རུ་སྐྱེས་ཤིང་། ཆུང་དུས་ནས་ཀིརྟི་དགོན་གྱི་ཆོས་སྒར་ཞུགས་ཏེ་སློབ་གཉེར་གནང་ཡོད་པ་དང་། ཕྱིས་སུ་བོད་ཀྱི་རྒྱལ་ས་ལྷ་སར་ཡོད་པའི་འབྲས་སྤུངས་དང་སེ་ར་དགོན་དུ་མུ་མཐུད་སློབ་གཉེར་གནང་ཡོད། སྒོ་ཤེས་རབ་རྒྱ་མཚོ་ལགས་ཀྱིས་ནང་པའི་ལྟ་གྲུབ་དང་། སྲོལ་རྒྱུན། རིག་གཞུང་བཅས་ཀྱི་སྐོར་དཔེ་དེབ་འགའ་ཤས་བརྩམས་གནང་ཡོད་པ་དེ་དག་ནི། ང་ཚོ་སད་རན་དང་། རྒྱུན་ཤེས་དང་ལམ། དཔྱད་འཚོལ་དང་ལྟ་ཚུལ། རང་ལམ་རང་འཚོལ། བླང་དོར་ལྟ་ཚུལ། སྐྱེས་ཆེན་གྱི་བཞུད་ལམ། གསེར་ཐང་འཆད་ཁྲིད། བསམ་གཞིག་པའི་སེམས་སྒྲ་བཅས་དཔེ་དེབ་བརྒྱད་ལྷག་པར་སྐྲུན་གནང་ཡོད། གཞན་ཡང་ཁོང་གིས་དབུ་མ་འཇུག་པ་དང་། གཏམ་རྒྱུད་གསེར་ཐང་། ས་སྐྱ་ལེགས་བཤད་སོགས་འཆད་ཁྲིད་གནང་ཡོད།
སྤྱིར་ཕྱི་ལོ་ ༢༠༢༠ ལོར་སྒོ་ཤེས་རབ་རྒྱ་མཚོ་ལགས་བཀག་ཉར་མ་བྱས་གོང་ཁོང་གིས་དགོན་པའི་ནང་ཤེས་ཡོན་གྱི་རང་དབང་ཐོག་རྩོད་ལེན་བྱས་པར་རྒྱ་གཞུང་གིས་ཁོང་བཀག་ཉར་དང་བཙོན་འཇུག་ཐེངས་མང་བྱས་ཡོད་པ་ཟད། མཐའ་ན་ཁོང་རང་ཉིད་ཀྱི་དགོན་པ་ནས་ཀྱང་བྲོས་བྱོལ་དགོས་པ་བྱུང་ཡོད། ཕྱི་ལོ་ ༡༩༩༨ ལོར་རྒྱ་ནག་གཞུང་གིས་རྔ་བ་ཕྱོགས་སུ་རྒྱལ་གཅེས་ཆོས་གཅེས་ཀྱི་ལས་འགུལ་ཤུགས་ཆེ་སྤེལ་སྐབས་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་ཕར་ཕྱིན་དམ་བཅའ་འཇོག་སྐབས་བཤམས་ཡོད་ལུགས་ཀྱིས་འཛིན་བཟུང་གིས་ལོ་བཞིའི་ཁྲིམས་ཐག་བཅད་ནས་བཙོན་འཇུག་བྱས་མྱོང་བ་དང་། དེ་རྗེས་ཕྱི་ལོ་ ༢༠༠༨ ལོར་བོད་ས་ཁྱོན་ཡོངས་སུ་བྱུང་བའི་ས་བྱི་ཞི་རྒོལ་ཆེན་མོའི་སྐབས་ལྷ་ས་ནས་འཛིན་བཟུང་བྱས་ནས་ལོ་གཅིག་ཙམ་རིང་བཀག་ཉར་བྱས་མྱོང་ཡོད་པ་དང་། ཕྱི་ལོ་ ༢༠༡༡ ལོར་ཀིརྟི་དགོན་གྱི་གྲྭ་བ་ཞིག་གིས་རྔ་བ་ཁུལ་དུ་རང་ལུས་མེར་སྲེག་བཏང་སྟེ་རྒྱ་ནག་གཞུང་ལ་ངོ་རྒོལ་བྱས་རྗེས་སྒོ་ཤེས་རབ་རྒྱ་མཚོ་ལགས་རྒྱ་གཞུང་གིས་འཛིན་བཟུང་བྱས་ཡོད།
གྲྭ་རིན་ཆེན་ཚུལ་ཁྲིམས་ལགས་ནི། ཕྱི་ལོ་ ༢༠༡༩ ཟླ་ ༨ ཚེས་ ༡ ཉིན་རྔ་བ་རྫོང་གི་ཉེན་རྟོག་པས་འཛིན་བཟུང་བྱས་ཏེ་ད་ཆ་གང་དུ་ཡོད་མེད་ཀྱི་གནས་ཚུལ་ཤེས་རྟོགས་བྱུང་མེད། རིན་ཆེན་ཚུལ་ཁྲིམས་ལགས་མདོ་སྨད་སི་ཁྲོན་ཞིང་ཆེན་རྔ་བ་རྫོང་གི་དཀར་ཤུལ་སྡེ་པའི་གཉེར་བ་ཚང་ཞེས་པའི་ཞིང་པའི་ཁྱིམ་ཚང་དཀྱུས་མ་ཞིག་ལ་སྐྱེས་ཤིང་། ཁོང་གིས་དགུང་ལོ་དྲུག་ཙམ་ནས་མདོ་སྨད་རྔ་ཡུལ་གྱི་བོན་གྱི་དགོན་པ་ཆེ་ཤོས་སྣང་ཞིག་དགོན་པར་ཆོས་ཞུགས་བྱས་ཏེ་སློབ་གཉེར་རྒྱུན་སྐྱོང་གིས་སྔགས་ཀྱི་འཛིན་གྲྭ་ཐོན་ཡོད་པ་བཅས།།
