༄༅། །ཕྱི་ལོ་ ༢༠༢༡ ཟླ་ ༩ ཚེས་ ༢༦ ཉིན་འོད་ཟེར་གསར་ཁང་ (IPK Media) ཞེས་པའི་གོ་སྒྲིག་འོག་དྲ་ལམ་བརྒྱུད་ཨུ་རུ་སུའི་དམར་ཤོག་ཚོགས་པའི་ལོ་ངོ་ ༧༤ རིང་གི་དབང་བསྒྱུར་དང་། རྒྱ་ནག་དམར་ཤོག་ཚོགས་པའི་དབང་བསྒྱུར་མཇུལ་སྒྲིལ་ལ་ཉེ་བའམ་རྒྱུན་སྲིང་སྲིད་པ་ (74 years of Soviet Union, the End or Continuation of the Chinese Communist Party) ཞེས་པའི་བརྗོད་གཞིའི་ཐོག་བགྲོ་གླེང་ཚོགས་ཡོད་པ་དང་། དྲ་ཐོག་གི་བགྲོ་གླེང་སྟེང་བྱང་ཨ་རིའི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་དང་། རྒྱ་ནག་དམར་ཤོག་ཚོགས་པའི་དཔོན་རིགས་མཐོ་གྲས་ཁག་ལ་ཆབ་སྲིད་སློབ་ཁྲིད་གནང་མྱོང་མཁན་སློབ་དཔོན་ཆེན་མོ་ཚའེ་ཤ་ (Cai Xia) ལགས། འོད་ཟེར་གསར་ཁང་གསར་འཛུགས་གནང་མཁན་དང་རྒྱ་ནག་མི་དམངས་འཐུས་མི་ཚོགས་ཆེན་གྱི་ཚོགས་གཞོན་གནང་མྱོང་མཁན་ཝང་རུ་ཆིན་ (Wang Ruiqin) ལགས། རྒྱ་རིགས་མང་གཙོ་དོན་གཉེར་བ་གྲགས་ཅན་ཝེ་ཇིན་ཧྲིན་ (Wei Jingsheng) ལགས། པེ་མིན་ (Bei Ming) ལགས། རྒྱལ་སྤྱིའི་ཡུ་གུར་ལྷན་ཚོགས་ཀྱི་རྒྱ་ནག་ལས་དོན་ཚན་པའི་ངེས་སྟོན་པ་སྐུ་ཞབས་ཨི་ཤ་ཊི་ཀོག་བྷོར་ (IIshat Kokbore) ལགས་སོགས་མཉམ་ཞུགས་གནང་ཡོད།
དེ་ཡང་ཐོག་མར་སློབ་དཔོན་ཆེན་མོ་ཚའེ་ཤ་ (Cai Xia) ལགས་ཀྱིས་བགྲོ་གླེང་དབུ་འབྱེད་ཀྱི་གསུང་བཤད་གནང་གྲུབ་མཚམས་ཝང་རུ་ཆིན་ (Wang Ruiqin) ལགས་ཀྱིས་གསུང་བཤད་གནང་ཡོད། དེ་རྗེས་བྱང་ཨ་རིའི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱིས་བོད་ཞི་བས་བཅིངས་འགྲོལ་བཏང་ནས་ལོ་ངོ་ ༧༠ འཁོར་བ་ཞེས་པའི་བརྗོད་གཞིའི་ཐོག་གསུང་བཤད་གནང་ཡོད། སྐབས་དེར་ཁོང་གིས་བོད་ཞི་བས་བཅིངས་འགྲོལ་བཏང་ནས་ལོ་ངོ་ ༧༠ འཁོར་བ་ཞེས་པ་ནི། བོད་མི་ཚོར་མཚོན་ན་བོད་ཀྱི་ལོ་རྒྱུས་ནང་ཆེས་མུན་ནག་གི་དུས་སྐབས་ཤིག་ལ་ངོས་འཛིན་གནང་བཞིན་ཡོད། ཅེས་དང་།
རྒྱ་ནག་དམར་ཤོག་གཞུང་གིས་བཙན་དབང་གིས་རྒྱ་ནག་གི་རྒྱལ་ས་པེ་ཅིང་དུ་བོད་ཀྱི་སྐུ་ཚབ་རྣམས་ལ་གྲོས་མཐུན་དོན་ཚན་བཅུ་བདུན་ཟེར་བ་བཞག་བཅུག་པ་དང་། དེ་རྗེས་རྒྱ་ནག་དམར་ཤོག་གཞུང་གིས་བོད་ནང་དྲག་གནོན་ཅན་གྱི་སྲིད་བྱུས་ལག་བསྟར་བྱས་དང་བྱེད་བཞིན་ཡོད་སྟབས། བོད་མི་ཚོས་སེམས་ལ་མ་བཟོད་པར་ཞི་བའི་ངོ་རྒོལ་རབ་དང་རིམ་པ་གནང་ཡོད་པ་མ་ཟད། ད་བར་བོད་མི་གྲངས་ ༡༥༥ ཡིས་རང་ལུས་མེར་སྲེག་བཏང་ཡོད། ཅེས་གསུངས།
གཞན་ཡང་ཁོང་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བཙན་བྱོལ་བོད་མི་རྣམས་ལ་མང་གཙོ་གསོལ་རས་སྩལ་རྗེས་བཙན་བྱོལ་བོད་མི་རྣམས་ཀྱིས་མང་གཙོའི་ལམ་ལུགས་ཚད་དང་ལྡན་པ་ལོངས་སུ་སྤྱོད་བཞིན་ཡོད་པ་སོགས་ཀྱི་སྐོར་གསུངས། རྒྱ་རིགས་མང་གཙོ་དོན་གཉེར་བ་ཝེ་ཇིན་ཧྲིན་ལགས་ཀྱིས་རྒྱ་ནག་གི་སྲིད་འཛིན་ཞི་ཅིན་ཕིང་གིས་རྒྱ་ནག་ནང་དྲག་གནོན་ཅན་གྱི་སྲིད་བྱུས་ལག་བསྟར་བྱས་དང་བྱེད་བཞིན་པའི་སྐོར་གསུངས། རྒྱལ་སྤྱིའི་ཡུ་གུར་ལྷན་ཚོགས་ཀྱི་རྒྱ་ནག་ལས་དོན་ཚན་པའི་ངེས་སྟོན་པ་སྐུ་ཞབས་ཨི་ཤ་ཊི་ཀོག་བྷོར་ལགས་ཀྱིས་རྒྱ་ནག་དམར་ཤོག་ཚོགས་པས་ཤར་ཏུར་ཀི་སི་ཐན་ནང་མི་རིགས་སྡེབ་གསོད་ཀྱི་སྲིད་བྱུས་ལག་བསྟར་བྱེད་བཞིན་པའི་སྐོར་གསུངས།།
