༄༅། །ཕྱི་ལོ་ ༢༠༢༡ ཟླ་ ༩ ཚེས་ ༡༣ ཉིན་གཡུང་དྲུང་བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གསོ་རིག་འབུམ་བཞིའི་མཐོ་སློབ་ཏུ་ཏོག་དབྱིབས་གཉན་རིམས་ཀྱི་སྔོན་འགོག་སྨན་ཁབ་རིམ་པ་སྔ་ཕྱི་གཉིས་ཀ་གཞིས་དགོན་གཉིས་ཀྱི་རང་ལོ་༡༨ ཡན་གྱི་མི་མང་ཚང་མར་བསྐྱོན་ཟིན་ཡོད་པ་རེད།དེ་ཡང་ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་གི་བཀའ་སློབ་ལམ་སྟོན་ལྟར།  ས་གནས་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གིས་ས་གནས་རྫོང་དཔོན་གཞོན་པ་མཆོག་ལ་སྙན་ཞུ་རིམ་པ་ཕུལ་བར་སྨན་རིའི་གསོ་རིག་འབུམ་བཞིའི་མཐོ་སློབ་དེ་ཉིད་སྔོན་འགོག་སྨན་ཁབ་རྒྱག་སའི་ས་ཚིགས་སུ་གཏན་འཁེལ་གནང་སྟེ་བོན་གཞིས་ཌོ་ལན་ཇིའི་གཞིས་དགོན་གཉིས་ཀྱི་རང་ལོ་ ༡༨ ཡན་གྱི་མི་མང་ཚང་མར་འགོག་ཁབ་སྔ་ཕྱི་གཉིས་ཀ་བསྐྱོན་ཐུབ་པ་བྱུང་ཡོད། སྤྱིར་བོན་གཞིས་ཌོ་ལན་ཇིའི་གཞིས་ཆགས་སུ་ཁྱོན་བསྡོམས་གཞིས་མི་གྲངས་ ༣༥༧ ཙམ་ཡོད་པ་དང་། རང་ལོ་ ༡༨ ཡན་གྱི་མི་མང་ཡོངས་ལ་སྔོན་འགོག་སྨན་ཁབ་རྒྱག་ཆོག་གི་ཡོད་པ་བཅས།།