༄༅། །ཕྱི་ལོ་ ༢༠༢༡ ཟླ་ ༩ ཚེས་ ༦ ཉིན་བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་གི་གོ་སྒྲིག་འོག་བཞུགས་སྒར་ཉེ་འཁྲིས་སུ་ཆགས་པའི་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ཚོགས་ཁང་དུ་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་གསར་འདེམས་བྱུང་བ་རྣམས་ལ་བོད་ཡིག་གཙོ་རྒྱུར་ཐོག་འཛིན་སྐྱོང་དང་འབྲེལ་བའི་ཟབ་སྦྱོང་དབུ་འབྱེད་ཀྱི་མཛད་སྒོ་ཚོགས་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨ ཐོག་སྐུ་མགྲོན་གཙོ་བོ་ལས་བྱེད་འདེམས་ལྷན་དང་འོས་བསྡུའི་འགན་འཛིན་གཅིག་ལྕོགས་དཔེ་ཟུར་དབང་འདུས་ཚེ་རིང་ལགས་དང་། ལས་བྱེད་འདེམས་ལྷན་གྱི་ཚོགས་མི་ན་ག་སངས་རྒྱས་བསྟན་དར་ལགས་དང་ཆོས་དབྱིངས་དོན་གྲུབ་ལགས། ལས་བྱེད་འདེམས་ལྷན་གྱི་དྲུང་ཆེ་ཚེ་རིང་དབྱངས་སྐྱིད་ལགས། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱིས་གཙོས་པའི་ཟབ་ཁྲིད་པ་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་དཔོན་རྣམ་པ།  དེ་བཞིན་གསར་དུ་བདམས་པའི་སྲི་ཞུའི་ལས་བྱེད་གྲངས་ ༢༡ བཅས་ཚང་འཛོམས་ཐོག་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སློབ་སྤྱི་པ་སངས་ཚེ་རིང་ལགས་ཀྱིས་ཕེབས་བསུའི་གསུང་བཤད་གནང་གྲུབ་མཚམས་སྐུ་མགྲོན་གཙོ་བོ་ལས་བྱེད་འདེབས་བསྐོ་ལྷན་ཁང་གི་འགན་འཛིན་དཔེ་ཟུར་དབང་འདུས་ཚེ་རིང་ལགས་དང་འདེམས་ལྷན་ཚོགས་མི་ན་ག་སངས་རྒྱས་བསྟན་དར་ལགས། ཆོས་དབྱིངས་དོན་གྲུབ་ལགས་བཅས་ནས་ས་རཱ་མཐོ་སློབ་ཀྱི་ལོ་རྒྱུས་སློབ་དཔོན་གཙང་ཕྲུག་སྟོབས་ལགས་ཀྱིས་བརྩམས་པའི་ ༼ གཞུང་འབྲེལ་ཡིག་བཟོའི་འགྲོ་སྟངས་དང་བརྗོད་འགྲོས། ༽ ཞེས་པའི་དཔེ་དེབ་དབུ་འབྱེད་གནང་གྲུབ་མཚམས་ལོ་རྒྱུས་སློབ་དཔོན་གཙང་ཕྲུག་སྟོབས་ལགས་ཀྱིས་དཔེ་དེབ་ངོ་སྤྲོད་སྙིང་བསྡུས་གནང་།དེ་རྗེས་སྐུ་མགྲོན་གཙོ་བོ་ལས་བྱེད་འདེམས་བསྐོ་ལྷན་ཁང་གི་འགན་འཛིན་དཔེ་ཟུར་དབང་འདུས་ཚེ་རིང་ལགས་ཀྱིས་འཚམས་འདྲི་དང་འབྲེལ་གསུང་བཤད་གནང་དོན། ས་རཱའི་སློབ་དཔོན་གཙང་ཕྲུག་སྟོབས་ལགས་ལ་སྙིང་ཐག་པ་ནས་ཐུགས་རྗེ་ཆེ་ཞེས་ཞུ་རྒྱུ་ཡིན། གང་ཡིན་ཞེ་ན། གཞུང་འབྲེལ་ཡི་གེའི་བརྗོད་འགྲོས་ཀྱི་གནས་སྟངས་འདི་བཞིན་ཧ་ཅང་གལ་ཆེན་པོ་ཆགས་ཀྱི་ཡོད། བོད་པའི་རིག་གཞུང་སྲུང་སྐྱོབ་ཞེས་ཚིག་གི་གནད་དོན་མང་པོའི་ཐོག་གསུང་གི་ཡོད། གང་ལྟར་ཐུག་སའི་གནས་སྟངས་འདི་སྐད་དང་ཡི་གེ་གཉིས་ལ་ཐུག་གི་ཡོད། འདིར་དཔེ་དེབ་འདི་ཉིད་ལས་དང་སྨོན་ལམ་གྱི་ཆ་ནས་ཟབ་སྦྱོང་གི་དུས་ཚོད་ཐོག་དབུ་འབྱེད་གནང་བ་ཡག་པོ་བྱུང་སོང་། ཚང་མར་ཐུགས་ཕན་གསོ་རྒྱུའི་རེ་བ་དང་སྦྲགས་ངེས་པར་ཐུགས་སྣང་གནང་རོགས་ཞེས་ཞུ་རྒྱུ་ཡིན། ང་ཚོ་ཚང་མའི་མྱོང་ཚོར་ལྟར་ཁྱོན་ཡོངས་ཀྱི་སའི་གོ་ལ་ནང་རྒྱ་ནག་ཝུ་ཧན་གྲོང་ཁྱེར་ནས་མཆེད་པའི་ཏོག་དབྱིབས་གཉན་རིམས་ཀྱིས་རྐྱེན་པས་འདས་པའི་ལོ་གཉིས་རིང་མི་རྒྱུ་གཉིས་ལ་བསམ་ཡུལ་ལས་འདས་པའི་སྡུག་བསྔལ་གྱི་གནས་སྟངས་བྱུང་བ་ཙམ་མ་ཟད། གཞི་རྩའི་ཤེས་ཡོན་བསྟི་གནས་ཚང་མ་སྒོ་བརྒྱབ་དགོས་པ་དང་། དེ་བཞིན་ལས་དོན་རྣམས་དུས་ཐོག་ཏག་ཏག་འགྲོ་མི་ཐུབ་པ། མིའི་འཚོ་བའི་ཐོག་ལ་གཉེར་དགོས་པའི་ལས་དོན་མང་དག་འཐུས་ཤོར་གྱི་གནད་དོན་ཚབས་ཆེན་པོ་བྱུང་ཡོད།འཛམ་གླིང་ཁྱོན་ཡོངས་ནང་ཏོག་དབྱིབས་གཉན་རིམས་ཕོག་པའི་ནད་པ་ཁྱོན་མི་གྲངས་དུང་ཕྱུར་གཉིས་ལྷག་ཙམ་བྱུང་ཡོད་སྐོར་དང་འདས་གྲོངས་སུ་སོང་མཁན་མི་གྲངས་ས་ཡ་བཞི་ལྷག་ཙམ་བྱུང་ཡོད་སྐོར་བཤད་ཀྱི་ཡོད། ལོ་རྒྱུས་ནང་བྱུང་མ་མྱོང་བའི་གནས་སྟངས་ཤིག་ཆགས་ཡོད། ང་ཚོས་གནས་སྟངས་འདི་བཞིན་དངོས་སུ་མྱོང་པར་བརྟེན་དེའི་ཐོག་ཐུགས་སྣང་གནང་དགོས།དུས་ཚོད་སྡུག་ཅག་དེའི་འོག་ནས་དེ་རིང་བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་ནས་སྲི་ཞུའི་ལས་བྱེད་གསར་པ་རྣམས་ལ་ཟབ་སྦྱོང་ཐོག་མ་འགོ་འཛུགས་གནང་བ་རེད། གོ་སྐབས་འདི་བརྒྱུད་ས་རཱ་མཐོ་རིམ་སློབ་གཉེར་ཁང་གི་སློབ་སྤྱིས་གཙོས་པའི་འབྲེལ་ཡོད་ལས་བྱེད་ཡོངས་ལ་ལས་བྱེད་འདེམས་བསྐོ་ལྷན་ཁང་གི་ངོས་ནས་ཐུགས་རྗེ་ཆེ་ཞུ་རྒྱུ་ཡིན། རྒྱུ་ནོར་གྱི་གནས་སྟངས་ཉམས་ཉེས་ཀྱི་གནས་སྟངས་རེད། འོན་ཀྱང་སོ་སོར་ཡོད་པའི་ཡོན་ཏན་དང་ཤེས་བྱ་འདི་སོ་སོ་རང་ཉིད་ལ་འཁྱེར་རྒྱུ་ཡོད་པར་བརྟེན་ཟབ་སྦྱོང་ནང་མཉམ་ཞུགས་གནང་མཁན་སྲི་ཞུའི་ལས་བྱེད་པའི་ངོས་ནས་ཉིན་གྲངས་བཅུ་གསུམ་རིང་ཟབ་སྦྱོང་གི་དུས་ཡུན་འདི་བཞིན་ཆུད་ཟོས་སུ་མི་གཏོང་བར་དུས་ཚོད་དམ་འཛིན་གནང་དགོས།

ད་ཆ་ཏོག་དབྱིབས་གཉན་རིམས་ཀྱི་གནས་སྟངས་མེད་པ་ཆགས་མེད་པ་དང་ནད་རླབས་གསུམ་པ་ཡོང་རྒྱུ་ཡིན་པ་ཚོད་དཔག་བྱེད་བཞིན་ཡོད་པར་བརྟེན་རྣམ་པ་ཚང་མས་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་སྒྲིག་ཁྲིམས་གང་ཡོད་པ་དེ་དག་ངེས་པར་ཉམས་ལེན་བྱེད་དགོས་ཀྱི་ཡོད། ཅེས་དང་། གཞན་ཡང་བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་གི་སྐོར་ངོ་སྤྲོད་སྙིང་བསྡུས་ཤིག་གནང་ཡོད། མཐར་ལས་བྱེད་འདེམས་བསྐོ་ལྷན་ཁང་གི་དྲུང་ཆེ་ཚེ་རིང་དབྱངས་སྐྱིད་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ།ཐེངས་འདིའི་ཟབ་སྦྱོང་ཐོག་སུམ་རྟགས་དང་རྒྱལ་རབས། ཡིག་བསྐུར་རྣམ་གཞག (Noting and Filing System) དང་།  (Communication Skills) བཅས་ཀྱི་སློབ་ཚན་དང་། གཞན་ཡང་བཅའ་ཁྲིམས་ངོ་སྤྲོད། བླང་དོར་སྒྲིག་གཞི། དབུ་མའི་ལམ། ནང་ཆོས་ ༼ བདེན་པ་བཞི་དང་སྒྲོལ་མའི་ཕན་ཡོན། ༽ ཕོ་མོའི་ཆགས་སྲེད་རྩུབ་སྤྱོད་འགོག་ཐབས་བཅས་ཀྱི་སྐོར་ལ་སློབ་འཁྲིད་གནང་རྒྱུ་ཡིན་འདུག  ད་ཐེངས་ཟབ་སྦྱོང་ཆེད་མཐུན་འགྱུར་རོགས་རམ་གནང་མཁན་ཨ་རིའི་རོགས་སྐྱོབ་ཚོགས་པ་ (USAID) ཡིན་འདུག་པ་བཅས།།