༄༅། །ཕྱི་ལོ་ ༢༠༢༡ ཟླ་ ༩ ཚེས་ ༢༤ ཉིན་བེལ་ཇི་ཡམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་བེལ་ཇི་ཡམ་ཨ་རིའི་གཞུང་ཚབ་ཆེན་མོའི་བཞུགས་གནས་ཀྱི་ཝི་ཊི་ལོག་ཚོགས་ཁང་ (Whitlock Hall) དུ་བེལ་ཇི་ཡམ་ནང་རྟེན་གཞི་བྱས་པའི་ཨ་རིའི་གཞུང་ཚབ་ཆེན་མོ་སྐུ་ཞབས་ནི་ཁོ་ལ་སི་བྷེར་ལི་ནེར་ (Nicholas Berliner) ལགས་དང་མཇལ་འཕྲད་ཞུས་གནང་ཡོད།

དེ་ཡང་ཨ་རིའི་གཞུང་ཚབ་ཆེན་མོ་སྐུ་ཞབས་ནི་ཁོ་ལ་སི་བྷེར་ལི་ནེར་ལགས་དང་བེལ་ཇི་ཡམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་དུས་ཡུན་སྐར་མ་ ༤༥ རིང་བོད་དོན་དང་གཞིས་བྱེས་བོད་མིའི་གནས་སྟངས་སྤྱིའི་སྐོར་གླེང་མོལ་གནང་ཡོད་པ་དང་། སྐབས་དེར་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ཉེ་ཆར་ཨ་རིའི་གཞུང་གིས་བོད་དོན་དང་བོད་མིར་རྣམ་པ་འདྲ་མིན་ཐོག་རྒྱབ་སྐྱོར་གནང་རྒྱུའི་ཞལ་བཞེས་གནང་བར་ཐུགས་རྗེ་ཆེ་ཞུས་ཡོད།ཨ་རིའི་གཞུང་ཚབ་ཆེན་མོ་སྐུ་ཞབས་ནི་ཁོ་ལ་སི་བྷེར་ལི་ནེར་ལགས་ཀྱིས་རྒྱལ་སྤྱིའི་སྟེང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྩི་བཀུར་ཞུ་བཞིན་ཡོད་པའི་སྐོར་དང་། ལྷག་པར་ཨ་རིའི་མི་མང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཧ་ཅང་བརྩི་བཀུར་ཞུ་བཞིན་ཡོད་པའི་སྐོར། དེ་བཞིན་ཨ་རིའི་གཞུང་གི་ངོས་ནས་བོད་མིར་མུ་མཐུད་རྒྱབ་སྐྱོར་གནང་རྒྱུ་ཡིན་པའི་སྐོར་གསུངས། ཨ་རིའི་གཞུང་ཚབ་ཆེན་མོ་སྐུ་ཞབས་ནི་ཁོ་ལ་སི་བྷེར་ལི་ནེར་ལགས་དང་ལྷན་དུ་ཨ་རིའི་གཞུང་ཚབ་ཁང་གི་སྲིད་དོན་ལས་བྱེད་ཧེ་ཌེ་རོ་ཇ་སི་ (Haydee Rojas) ལགས་ཕེབས་ཡོད། བེལ་ཇི་ཡམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་ལྷན་བེལ་ཇི་ཡམ་སྐུ་ཚབ་དོན་གཅོད་ཁང་གི་ལས་བྱེད་རིག་འཛིན་ཆོས་སྒྲོན་ལགས་ལྷན་བཅར་ཞུས་ཡོད་པ་བཅས།།